Read lumasaaba 2 Bakorinso 5 Bible Online

2 Bakorinso 5 - lumasaaba bible

2 Bakorinso 5

¹Ifwe lwe khuumanya khuri intsu iye lisari isi khumenyamo ari n'ilyonakisibwa, khuliyo ni shishombekhe shishaama isi Wele, intsu ikhombekhebwa ni kamakhono ta, iye biilo ni biilo, iye mwikulu.

²Ne mu bulamu khwilootsa, nga khwiwuuma khuukwaarisibwa ni buumenyo bweefwe bwe Mwikulu,

³lwekhuuba ni khukwaarisibwa khuryo, khuulekha khunyoolekha nga khuli bukhuna ta.

⁴Lwekhuuba nga khushiili mu lisari lino, khwilootsa nga khwiwuuma, naluundi buulamu busitowesebwa, akhuba khuri khukhakwaarisibwa ta, ne khuri khwilooselekho khukwaarisibwa ni buumenyo bweefwe bwe mwikulu, nio manya kumubili kukuufwa kumilikhe ni bulamu.

⁵Wele umweene niye uwakhuŋoonaŋoona aryo lwe lomo yino, naluundi wakhuwa ifwe Umwoyo nga shisuubiso shishiŋaŋasa bibiitsya khubawo.

⁶Ni nashiryo kila busheele khuba ni kamaani, nga khumanya khuri, ni khuba nga khuli nga khukhuuli ingo mu mubili, khuba khuli aleeyi n'Umukasya.

⁷Ifwe khuliwo lwe khufukiilila ne akhuba lwe khubona ta.

⁸Shino ishilamo luundi ndi, khwawandalala kumwoyo, ne khwandikanile khufuurawo, nikhwo khuuba aleeyi ni kumubili, nio khube atweela n'Umukasya.

⁹Khuryo kila khushikhola shaaba shitsilililwa sheefwe: khumwikhoyesa niye, oba khuli mu mubili namwe nga khuli atweela ni naye.

¹⁰Lwekhuuba fweesi khwakha khubonekhe mu moni tse shitsoloŋo iye khukhalilakho kimisaango, iya Kristo, nio buli mutweela anyoole shishimwakhila lweebyo byoosi byeesi akhola, nga ashiili mu mubili; oba bilayi namwe biibi.

¹¹Ni nashiryo, khukhwaama nga ni khumanyile khuurya Umukasya nga ni khuli, khukhakakho khukhonjelesa babaandu. Bulamu bweefwe bwamanyikha isi Wele, naluundi niyikina indi, shamanyikha isi kimyoyo kyeenywe kye mukari.

¹²Luundi ndi sikhuli khukhwibuyila fwabeene isi muli ta, ne khubawa inywe sheesi kane mwimekho mwibuyile khulweefwe, nio munyalise khubeelamo abo babebuyila babeene lwe mbonekha ni lubuyi lwe khu ngaaki, akhuba lweebyo bibiili mu mwoyo ta.

¹³Ne ni khuba nga khwalalukhile, khuulalukha khweefwe khuba khulwa Wele, ne noola khuli balamu, khuba balamu khulweenywe.

¹⁴Lwekhuuba khuukana khwa Kristo khukhupilisa ifwe, lwekhuuba kufukiilila khuri, mutweela afwa khulwe babaandu boosi, nashiryo boosi bakabanana mu khufwa khweewe.

¹⁵Aryo afililila boosi nio manya ibo babaali balamu balekhe khuuba balamu khubwaabwe bonyene ta, ne babewo khulw'ooyo uwafwa khulwaabwe, luundi walamusibwa.

¹⁶Ni khukhwaama ari, sikhwakha khumanya umuundu yeesi lwe shiibala ta, ikhaba nga Kristo khwamumanya musaambo iyo, ne ari sikhumumanya luundi khuryo ta.

¹⁷Nashiryo umuundu yeesi naaba mu Kristo, ekyela shibuumbe shishaakha, bikhale biba byaweelewo, ni bishaakha biba byaarakikhile.

¹⁸Bino byoosi byaama isi Wele, uwakila wakhutubaasa ifwe babaandu n'umweene, nga abirira mu Kristo, nio wakhuwaambisa ifwe bubwakaanisi bwe khukobosa babaandi nabo babe basaale beewe.

¹⁹Sheesi imanyisa nisho ndi, Wele aba mu Kristo nga akobosa babaandu isi umweene, nga sehaambilila bibyoonako byeesi babaandu boneka ta. Aryo wakhuwaambisa ifwe bubwakaanisi bwe khukwangwanisa.

²⁰Nashiryo, ifwe khuli baabakha ba Kristo, shifwaanana nga Wele abekontselelela musiifwe, ne mu lisiina lya Kristo khubakhupilisa khuri ni mube basaale ni Wele.

²¹Lwekhuuba khulweefwe, Wele akalusa Kristo ukhaaba ni bibyoonako khuuba nabyo khulwe babaandu nio mu niye khube bukwalaafu bwa Wele.