Read lumasaaba 2 Bakorinso 6 Bible Online

2 Bakorinso 6 - lumasaaba bible

2 Bakorinso 6

¹Nga ni khuli babaraambakanila atweela ni Wele, khubakhupilisa khuri mulekhe khuweebwa bubweela bwa Wele busa ta.

²Lwekhuuba aloma ari, “Mu mbuka isi nakana, nakhuwulila, ni khu shifukhu she buwonesi, nakhuyeeta.” Ari ikhuboolela ndi iyi niyo imbuka iye khuufukiilililamo, ni naari nisho shifukhu she buwonesi.

³Ifwe sikhurawo she khukhwituyisa isi umuundu yeesi ta, nio ilekhe khubawo khukhwikiitsa bubwakaanisi bweefwe ta.

⁴Ne nga babakaanisi ba Wele, khwiboolakho fwabeene musaambo tsoosi; nga mu khwikhalilikha khukali, mu khukholaka shiisa, mu bikosi ni mu mitaambo;

⁵mu khukhupiwa tsimiimbo, mu khubowebwa, mu bisaayumba, mu miboraniso, mu khuba meeso shiilo, ni mu khubuya intsala;

⁶mu bukwalaafu bwa ŋali bubuukhalikho lisaanda ta, mu khumanya, mu khwinyindaalila, ni mu shiisa, lw'Omwoyo Umukhosefu, ni lwe khuukana khukhweene.

⁷Mu khukanikha khwa ŋali ni mu maani ka Wele, ni bye busoolo bye bukwalaafu mu mukhono kumulayi ni mu munyeletsi,

⁸mu shiriifwa ni mu khulekelesebwa, mu khukhomebwa ni mu khusiimibwa, nga baŋali ne nga khuyilibwa nga babawombesa,

⁹nga bakhamanyikha ta, ate nga babamanyikhila ilala, nga babaafwa ate nga khuli balamu, nga babataambisibwa ate nga sikhwiiribwa ta,

¹⁰nga bakhalafu ate nga busheele khukhwikhoya, nga bataambi ate khwikyelisa babaandi khuuba bayindifu, nga bakhali na shiindu ta, ne nga khuli ni bibiindu byoosi.

¹¹Inywe babaandu be Korinso, khwakanikha isi muli bibiindu byoosi byeesi khubeele nabyo mu myoyo kyeefwe ni lukoosi.

¹²Ifwe mbaawo sheesi khwabeemanakho ta nenjeeba inywe babeemanile bibyeenywe isiifwe.

¹³Inganikha isi muli nga babaana baase, ni mwikulewo mubalaayise kimyoyo kyeenywe isiifwe.

¹⁴Inywe mukhetubaasatsaka ni babaakhali baafukiilisi ta. Lwekhuuba bukwalaafu bunyala buryeena bwetubaasa ni bubwoonaki? Namwe buwaanga bunyala buryeena khuuba butweela ni shishilima?

¹⁵Namwe Kristo anyala aryeena khufukiilisana ni Beliyali? Ni nooyo ufukiilila anyala aryeena khufukiilisana ni nooyo ukhali umufukiilisi?

¹⁶Namwe lisaayilo likhulu lya Wele linyala liryeena khuwulilisana ni bifwaani bibisaayibwa? Lwekhuuba ifwe khuli lisaayilo likhulu lya Wele Umulamu. Nga Wele n'aloma ari, “Kane imenye luundi injendatsakile akari mu nibo, imbe Wele waabwe, ni nabo babe babaandu baase.”

¹⁷Ni nashiryo Umukasya aloma ari, “Ni mubaruremo, mwiyawule khu nibo, mukhawaambatsaka khu shiindu shoosi shiibi ta. Ni nase indibakaanila.

¹⁸Ise indiiba Paapa weenywe, ni nanywe muliba babaaana baase, besiinde ni bakhaana.” Wele umunyali wa byoosi niye umweene ubiloma.