Read lumasaaba 2 Bakorinso 7 Bible Online

2 Bakorinso 7 - lumasaaba bible

2 Bakorinso 7

¹Ni nashiryo bakanwa baase, nga ni khuli ni bibyasuubisibwa biryo, khakhwiŋoone fwabeene, khurure mu bye bunyaalu, bibisinyisa kumwoyo ni kumubili, nga khwoolelesa bukhosefu mu khurya Wele.

²Ni mukhukholele ifwe shifwo mu myoyo kyeenywe. Ifwe sikhwabirisakho buubi umuundu yeesi ta, naluundi sikhulyakhanatsakakho umuundu yeesi ta.

³Shinoma shino khubakhalila kumusaango ta, lwekhuuba ni namala khaale khubaboolela ndi muli ni shifwo mu myoyo kyeefwe, oba mu khufwa oba mu bulamu.

⁴Ise imbewulililamo inywe naabi, imbekanilamo naabi, ikhaba nga khuli mu bukosi bukali naabi, ne mwambeele kamaani, naluundi kumwikhoyo kwase kuli mubiririfu naabi.

⁵Lwekhuuba ikhaba nga ni khweetsa i Masedoniya, kimibili kyeefwe kino sikyafuna khuwola ta, ne khwataambisibwa tsimbeka tsoosi, nga ibulafu iliyo busoolo, ni mukari nga mulimo buuri.

⁶Ne Wele uwikhoyesa babaali mu mutaambo, akhwikhoyesa ifwe lwe khukhwiitsa khwa Tito.

⁷Ne akhuba lwe khukhwiitsa khweewe khwonyene ta, ne ni lwe khukhwikhoyesebwa khweesi ekhoyesebwa ni nanywe. Luundi akhuboolela khukhwiwuuma khweesi muli nakhwo isiindi, kimitaambo kyeenywe, ni khutsiinikha khweesi muli nakhwo isiise, nisho shishakila khukhwikhoya khwase khwafuurisakho.

⁸Ikhaba nga ibaluwa yase yabakhalasa, ne ise sinisonesa ndi khali sinakirona ta. Ikhaba nga nesonesamo, lwekhuuba ndi yababirisa buubi, ne nabona nga yabakhalasa mu mbuka ifwiiti.

⁹Ne ana ari, ise nikhoya akhuba ndi lwekhuuba mwakhalasibwa ta, ne lwekhuuba ndi kumutaambo kweenywe kwabarereera khukhwibiiyisa. Lwekhuuba mwabirisibwa buubi lwe khuukana khwa Wele, nashiryo simwafiilwa shishiindu shoosi ta.

¹⁰Kumutaambo kweesi Wele araambisa kureera khukhwibiiyisa khwe buwonesi, se kushuukhakho ta. Ne kumutaambo kwe shiibala kureera khuufwa.

¹¹Lwekhuuba ni mubone kumutaambo kwe bwa Wele kuno sheesi kubarereera; khukhakakho naabi nga mwisoolanakho mwabeene, ni khukhalala khufwaana khuryo, ni khuurya ni khukhwiwuuma bukwalaafu, ni khuuba berekefu khurusawo shiibi lwe khubiiyisa uyo uwoneka. Inywe mwayiŋaŋasa mu byoosi nga babaandu babaakhalikho ni lisaanda mulomo yino ta.

¹²Ikhaba nga nabaronela ibaluwa, ne sinakirona lw'oyo uwebirisa buubi ta, namwe lw'oyo uwakholekhakho buubi ta, ne nakirona lwe khukhwokesana khurabila khweenywe mu moni tsa Wele khulweefwe, nga ni khuli.

¹³Shino nisho shishakila khweesibwamo kamaani. Ne akhuba khukhwisibwamo kamaani shonyene ta, ne khwasangaala naabi lwe khubona kumwikhoyo kweesi Tito aba nakwo, lwekhuuba inywe mweesi mwawosawosa kumwoyo kweewe.

¹⁴Ise nebuyila naabi is'ali khulweenywe, muryo nanywe simwamambisa tsisoni ta. Ne nga mu buli lomo yoosi yeesi khwabakanikhayo n'ili iyaŋali, ni mulomo iyo khukhwibuyila khweefwe isi Tito nakhwo khwaba khwelala.

¹⁵Ni khuukana khweewe khwe mu mwoyo isi muli khwayiloosela naabi, nga wakhebuliile isaambo yeesi mwaba babawulila, luundi nga ni mwamwakaanila ni khuurya, ni khunikina.

¹⁶Ni nase nekhoyele naabi khuuba nga imbeyikinila ilala mu byoosi.