Read lumasaaba 2 Bakorinso 8 Bible Online

2 Bakorinso 8 - lumasaaba bible

2 Bakorinso 8

¹Bebuulebe, ari khukana mumanye bibiwaamba khu bweela bwa Wele bweesi aawa babaandu babaafukiilila Yesu babaali mu Masedoniya.

²Baryo ikhaba nga babira mu khutsemebwa khuurafu khwe khuufukiilila khwaabwe, lwe butaambi bwaabwe buubiririfu, ne kumwikhoyo kwawe kwaba kumukali, bakhakakho khuwana bulayi naabi.

³Ise imbaweela bujulilwa ndi bawaana nga esi banyala, ni khufuurisakho ni bunyali bwaabwe, naluundi akhali khuwanyiinyibwa ta.

⁴Baakhuloomba ifwe ni khukhwikontselela khukali, bari nabo babe batweela khu baandu babaawa buyeeti isi bakhosefu ba Wele mu Yuda.

⁵Ne shino baashikhola khufuurisa nga ni khwabambaasa, ni khunyoowa bewaanayo babeene isi Umukasya, n'isi ifwe lwe khuukana khwa Wele.

⁶Nafwe khuryo khwaloomba Tito khuri khukhwaama nga niye n'ananikhisa kumulimo kuno kwe bubweela mus'iinywe khukhwaama makiboole, akumaliilise.

⁷Inywe muli bayindifu mu buli shiindu: nga mu khufukiilila, mu khukanikha, mu khumanya, mu khurabila lwe buyeeti khwoosi, ni mu khukhukana ifwe, ni mubone muri mubiriirisakho ni mu bweela bwe khuukabanana buno bwoosi.

⁸Ne shino ise s'indi khuubaloma nga imbalakila ta, ne intsema khuukana khweenywe noola khuli khwelala, nga ikhufwaananisakho ni khuurabila khwe babaandi.

⁹Lwekhuuba mwaamanya bubweela bw'Omukasya weefwe Yesu Kristo, nga niye ikhaba nga aaba umuyindifu, ne khulweenywe ekyela umutaambi, nio akile abakaluse inywe mube bayiindifu lwe butaambi bweewe.

¹⁰Ni mulomo yino ise imbawa byeesi nambaasa, lwe buulayi bweenywe ndi mumalilise ari byeesi mwasimamakho kumwiiko kukubirire, luundi mube ni kumwoyo kukukana khukhola kuryo.

¹¹Ari ingana mwiloosele mumalilise kumulimo, mube ni khuukana mu khukhola nga ni mwerekekha khunyoowa, mumalilisile ilala, luundi muwane nga ni munyala.

¹²Lwekhuuba noola khuukana khwe khuuwaana khubawo, shiwaanwa kane shifukiilisikhe khukhwimikha khu byeesi unyala khuwana, ne akhuba khu byeesi ukhali nabyo ta.

¹³Ise shinoma shino lwekhuuba ndi ngana babaandi balye byabusa ne inywe murekane ta, ne shili lwe khuukana khulekhaasa.

¹⁴Khu mbuka iya ari iyi, inywe byeesi mulinabyo bibifuurisakho biyeete abo babaakhali na khaandu ta, nio akile nabyo byeesi baliba nabyo bibifuurisakho biliiba bibayeeta nga nanywe simuli na khaandu ta; nio abewo khulekhaanisa,

¹⁵nga bibyaronebwa ni biloma biri, “Umuundu ubuusanisa bikali s'arama na bikali ta, ni nooyo uwabuusanisa bikyeekhe s'aba na bikyeekhe naabi ta.”

¹⁶Ise isiima Wele uwenjisa mu Tito kumwoyo kukwinaanayo isi muli nga ifwe ni khuli.

¹⁷Ne mwilala, Tito s'afukiilila khuloma khweefwe shonyene ta, ne lwe khuukana khweewe khukali, ali khukhwiitsa isi muli ni kumwikhoyo nga umweene niye uwirumana.

¹⁸Atweela ni naye khwabarumaniile uwe buulebe umanyikhile isi bafukiilisi boosi mu Yesu lwe khulaangilila Kamakhuuwa Kamalayi.

¹⁹Ne akhuba isho shonyene ta, ne warobolebwa ni kamatuuli ke bafukiilisi mu Yesu khukyeenda ni nafwe mulomo iye bubweela buno bweesi khwakaanisilamo Umukasya umweene, khulwe shiriifwa ni khukhwokesanisa kumwoyo kukukana khukhwakaanisa.

²⁰Ne khwitsililisa khuri umuundu yeesi alekhe khukhwikiitsa ifwe musaambo yeesi khuwaambamo shiwaanwa shino shikhulu sheesi khwakaanisilamo ta.

²¹Lwekhuuba shitsilililwa sheefwe mu nisho nikhwo khukhola shilayi, akhuba mu moni ts'Omukasya shonyene ta, ne ni mu moni tse babaandu.

²²Ne atweela ni nabo, khurumana uwe buulebe weefwe ukuundi isi khutsemelekho kimishiimba mikali, ne khwamunyoola nga busheele mwirekefu khuyeeta, ne ari mwirekefu naabi khufuura mataayi lwe bubwiyikinwa bukali bweesi ali nabwo mus'iinywe.

²³Khwiibyo bibiwaamba khu Tito, niye umusaale wase luundi umuraambi washaase mus'iinywe, ni khu be buulebe beefwe babaandi, nibo bali baarume be bafukiilisi mu Yesu, luundi bali shiriifwa sha Kristo.

²⁴Nashiryo, ni mubokesane khuukana khweenywe, shishokesana khubuyila khweefwe isi muli, ni bafukiilisi boositsana mu Yesu bashibone.