Read lumasaaba 2 Bakorinso 9 Bible Online

2 Bakorinso 9 - lumasaaba bible

2 Bakorinso 9

¹Ne bibiwaamba khu khwakaanisa buyeeti isi bakhosefu ba Wele, imbaawo ilomo ikila nabaronela ta.

²Lwekhuuba namanyile nga ni muli berekefu khuwana lwe khuyeeta, nga esi ni nebuyila khulweenywe isi babaandu be Masedoniya, nga mbaboolela ndi inywe babaandu be mu Akaya, muli berekefu khuwana khukhwaama kumwiiko kukubirire, ni khuukana khweenywe khukali, khwakhupilisile bakali khu nibo.

³Ne shitsilililwa shase mu khwakaanisa be buulebe bano isi muli shili ndi nio khukhwibuyila khweefwe khulweenywe khulekhe khuba khwa busa mulomo yino ta, nio munyale khuuba berekefu nga esi nabalomakho ndi kane mube.

⁴Ne noola netsileyo ni babaandu khukhwaama i Masedoniya, ne banyoola nga mwakhurekekha ta, akhali khubalomakho inywe, kane khuswale naabi lwe khubebuyililakho naabi.

⁵Nashiryo nambaasile ndi shilayi khuloomba be buulebe bano, baranjile khukhwiitsa isi muli, baŋooneŋoone nga bushiili biwaanwa byeesi mwaloma khuwayo, nio nga netsile inyoole nga shili shiwaanwa shiwaanibwileyo mu khukana, ne akhuba nga babawanyiinyibwa khuwaanayo ta.

⁶Ni mukhebulile shino, uyo umiitsa bikyeekhe, alikyesa bikyeekhe, ni nooyo umiitsa bikali alikyesa bikali.

⁷Ne buli muundu n'akhole nga n'akhalilewo mu mwoyo kweewe, akhuba nga esonesa namwe nga awanyinyibwa ta, lwekhuuba Wele akana umuundu uwaanayo ni kumwikhoyo.

⁸Luundi Wele anyala khubawa bye bubweela bweewe, nio inywe mubaatsake ni bibamala mu biindu byoosi, mu bifukhu byoosi, nio mubiririre mu buli mulimo kumulayi kwoosi.

⁹Nga ni sharonebwa shiri: “Asalaasa bibiindu bilayi, waakabila bataambi. Bukwalaafu bweewe sibuwawo biilo ni biilo ta.”

¹⁰Aryo Wele uwa umumiitsi bumiitso, ni biilyo bye khuulya, alibawa luundi alibalaayisa libikhilo lye bumiitso, luundi alooselekho likyesa lye bukwalaafu bweenywe.

¹¹Nanywe muliyindila musaambo tsoosi, nio munyale khuuwaanayo biseela byoosi, nio khuuwaanayo khweenywe khubiririre mwiifwe khusiimise Wele.

¹²Lwekhuuba bubwakaanisi buno bwe khuuwaanayo sibuyeeta mu bikanibwa lwe bakhosefu ba Wele shonyene ta, ne khulooselela ilala khusiima khukali isi Wele.

¹³Naluundi lwe bubwakaanisi bweesi mwiyokesanilemo mwabeene, babaandu balibuyila Wele nga baboone buwolu bwe khuwulila khweenywe, ni mu khwofwasa khweenywe khwe Kamakhuuwa Kamalayi ka Kristo, ni buwaani bweenywe bwe khukabanana ni babaandu babaandi boosi.

¹⁴Ni nabo nga ni betubaasa atweela mu khuloomba khulweenywe, kimyoyo kyaabwe kibatsiinikhanila, khulwe bubweela bwa Wele bukali bubuuli mwiinywe.

¹⁵Wele asiimibwe naabi lwe shiwaanwa sheewe sheesi khukhanyala khwara mu bilomo busa ta.