Read lumasaaba Bagalatiya 1 Bible Online

Bagalatiya 1 - lumasaaba bible

Bagalatiya 1

¹Ibaluwa yino yaama isi ise Paulo umurume, uwarumanibwa ni Yesu Kristo, ni Wele. Wele uyo niye uwalamusa Yesu Kristo khukhwaama mu bafu. Akhuba bari ise ndi umurume khukhwaama isi umuundu, namwe n'umuundu yeesi ta.

²Ise ni be buulebe boosi babaali ni nase, khubasheesa inywe mweesi bafukiilisi mu Yesu, babaali mu Galatiya.

³Bubweela ni lukoosi bibyaama isi Wele Paapa weefwe, n'Umukasya Yesu Kristo, bibe khus'inywe.

⁴Kristo umweene ewaanayo khulwe bibyoonako byeefwe, ari nio akhuwonese ifwe mu muboolo kuno kumumooyaani, nga khuukana khwa Wele weefwe, naluundi uli Paapa weefwe, ni khuli.

⁵Wele uyo aweebwe shiriifwa, biilo ni biilo. Amiina.

⁶Ise neyangile khubona nga khaangu akho mwarurire khu Wele uwabalaanga lwe bubweela bwa Kristo, nga mulikho mwiila khuwulilisa kamakhuuwa kamalayi ke isaambo ikiindi.

⁷Ne nga muŋali, mbaawo kamakhuuwa kamalayi kakaandi ta. Ne inoma shino khulwekhuuba iliwo babaandu babaandi babakosaasa kosaasa inywe, naluundi bakana khuborosa kamakhuuwa kamalayi ka Kristo.

⁸Ne ikhaba ifwe fwabeene, namwe Malayika khukhwaama mwikulu, n'ababoolela inywe kamakhuuwa kamalayi kakaandi busa akhali iko keesi ifwe khwababoolela ta, umuundu uyo khali ewuumile.

⁹Nga ni khwashiloma khaale, ni aluno ari ishiloma luundi ndi: noola iliwo umuundu yeesi ulikhuboolela Kamakhuuwa Kamalayi kakaandi akhali ako keesi mwaweebwa ta, khali umuundu uyo awumibwile atsya mu khuhela.

¹⁰Ne shino shibonekha shiri ise ndi khubonekha nga uweentsa khufumisibwa ni babaandu namwe ni Wele? Namwe imbonekha nga ukhakakho khukhwikhoyesa babaandu? Ne noola ikhakakho khukhwikhoyesa babaandu, abe sinakhila khuuba umwakaanisi uwa Kristo ta.

¹¹Lekha mbaboolele inywe be buulebe, indi Kamakhuuwa Kamalayi keesi ise nababoolela, sikali ke khola iy'omuundu taawe.

¹²Khulwekhuuba ise sinakafuna khukhwaama khu muundu yeesi ta. Namwe mbaawo uwakandeekela ta. Yesu Kristo umweene niye uwakamimbulila.

¹³Mwawulila isaambo isi ise nabamo nga ishiili mu diini iye Shiyudaaya, nga ninakholesa babaandu ba Wele shiisa, ni khukhwoola khukana khubahesa boosi.

¹⁴Ise imbonekha nga abe niye uminyisa Bayudaaya bashaase be kumuboolo kwase, mu khuliinda kamakaambila ke diini iye Shiyudaaya, ni mu khulondelela tsisaambo tsye bakuuka baase.

¹⁵Ne Wele, mu bweela bweewe, ni mu shisa sheewe, uwantsawula ise khukhwaama mu khusaalikha khwase, anaanga.

¹⁶Anaanga wamimbulila umwaana weewe ari nio imboolele Kamakhuuwa Kamalayi isi Banaambo. Ni nase abweene awo shinereebakho isi umuundu yeesi khu she khukhola ta.

¹⁷Namwe sinatsya i Yerusalemu khukhwireebakho isi abo babanyoowa khuuba baarume ta. Akhali nanyoowa khuutsya i Buwarabu, ne lwanyuma nakobola i Damasiko.

¹⁸Ne lwanyuma lwe kimiiko kitaru natsya i Yerusalemu, khubonana ni Petero. Namenyakho iyo ni naye khumala bifukhu liikhumi na biraano.

¹⁹Nga ndi ibweene iyo, sinabonakho umurume ukuundi yeesi ta, khurusakho Yakobo, yaaya w'Omukasya.

²⁰Ise imbaŋaŋasa inywe mu lisiina lya Wele ndi bilomo bino byoosi byeesi ise mbaboolela bili bya ŋali.

²¹Lwanyuma natsya mu byaalo bibiili i Siriya, ni i Kilikiya.

²²Ni mu mbuka iyo, ise naba nga nakhumanyikhakho isi babaandu ba Wele, khuubirira mu Kristo, babaali mu Yuda ta.

²³Baawulila busa byeesi babaandu baaba baloma bari: “Umuundu uwakhukubyeengatsaka bona ari aboolela khuufukiilila tsana khweesi aakhakakho khukhwoonakisa.”

²⁴Baryo baabuyila Wele khulwase.