Read lumasaaba Bagalatiya 2 Bible Online

Bagalatiya 2 - lumasaaba bible

Bagalatiya 2

¹Lwanyuma lwe kimiiko liikhumi na kine, nelayo luundi i Yerusalemu. Khu muluundi kuno natsya ni Balunaba, nga mbila Tito naye.

²Natsya khulwekhuuba Wele antsokesana ari ikhoole ndyo. Naba ni lubusano mushimoonyo ni baraangilisi bonyene, naababoolela Kamakhuuwa Kamalayi keesi imboolela akari mu Banaambo. Shino nashikhola khulwe khuukana ndi buraambi bwase butaayi ni bwe aluno ari, bulekhe khuba bwa busa ta.

³Ne akhaba Tito uli Umuyonaani uwabayo ni nase, s'awanyiinyibwa khukhwinjila imbalu ta.

⁴Ilekha khuba babaandu babaandi babelaanga khuuba be buulebe, ne nga sibali be buulebe ta, khali bilomo bino sibyamanyikha ta. Bano bakhwiyingisamo khukhurusakho lukoosi lweesi khuli ni nalwo mu Kristo Yesu. Bano bakhukalusa ifwe khuuba bakulwa.

⁵Ifwe sikhwafukiilisakho na khafwiiti khoosi ta. Khwakhola shino khuri nio bwa ŋali bwe Kamakhuuwa Kamalayi buliindibwe bulayi khulweenywe.

⁶Ne khulwaabo babaabonekha nga baraangilisi, sishili ndi bukhulu bwaabwe bulikho ni sheesi bunjeetakho ta. Wele s'akhala kumusaango khukhwaama khw'ibyo bibibonekha khu ngaaki ta. Ni baraangilisi ibo mbaawo ilomo isi balooselakho khu burume bwase ta.

⁷Ne khu lubeka luluundi bashibona bari Wele wayimaambisa ise kumulimo kumukhulu kwe khuuboolela Kamakhuuwa Kamalayi isi Banaambo, nga n'awaambisa Petero.

⁸Khulwekhuuba Wele uyo uwanyalisa Petero khuuba umurume isi Bayudaaya, niye mutweela uwanyalisa nase khuuba umurume isi Banaambo.

⁹Baryo Yakobo, ni Petero, ni Yokana, bababonekha nga tsintseko tsinyene tse bafukiilisi mu Yesu, ise ni Balunaba, baakhuwa lukoosi. Khuno khwaba khukhwokesanisa butweela ni kumukhono kumulayi, nga babona bubweela bweesi Wele amba ise. Baafukiilisa bari ifwe khutsye isi Banaambo, ne nibo batsye isi Bayudaaya.

¹⁰Ne bakhuloomba ifwe shishiindu shitweela: bari khulekhe khukhwibilila bataambi ta. Ni nase nisho shishiindu shitweela tsana sheesi indeerekho kumwoyo kwase.

¹¹Ne Petero n'etsa i Antiyoki, ise namukhaandisa lubuula khulwekhuuba, muŋali aba wakholele buubi.

¹²Mu khunyoowa khukhweene, Petero alyatsaka biilyo ni Banaambo, nga babaandu babaama isi Yakobo abe bashiili khwiitsa ta. Ne basaani bano ni beetsa Petero warakikha khukhwisyeenda andulo, ni khukhwiyawula umweene, bari khulwekhuuba arya abo babaaba be mwituuli lye khusheba imbalu.

¹³Ni Bayudaaya babaandi betubaasa khu Petero khukhola baryo, khukhwoolisa ni Balunaba wawombesebwa ni khukhwikholisa khwaabwe.

¹⁴Ne ise ni nabona nga sibali khukyeendela mu ntsila iye bukwalaafu bwa ŋali nga Kamakhuuwa Kamalayi ni kaloma ta, nalomela Petero mu moni tsaabwe boosi indi, “Iwe uli Umuyudaaya, ne ubeele umenya nga Umunaambo, akhuba nga Umuyudaaya ta. Lwashiina uwanyiinya Banaambo khulondelela tsisaambo tse Bayudaaya?”

¹⁵Ifwe fabeene khuli Bayudaaya basaalikhana, akhuba ndi khuli Banaambo babonaki ta.

¹⁶Khwaamanya khuri umuundu s'abaliwa khuuba umukwalaafu khulwe khuuliinda kamakaambila ta, ne akhali khulwe khuufukiilia mu Yesu Kristo. Ni nafwe khuryo, khwara khufukiilila khweefwe mu Yesu Kristo, nio khunyale khubalibwa nga bakwalaafu, khulwe khumufukiililamo, ne akhuba khulwe khulondelela kamakaambila ta. Khulwekhuuba imbaawo umuundu na mutweela ukwalaasibwa mu moni tsa Wele khulwe khulondelela kamakaambila ta.

¹⁷Ne noola mu khukhakakho khweefwe khulwe khubalibwa bakwalaafu mu Kristo, shibonekha shiri khuli babonaki nga Banaambo ni bali, shino shimanyisa shiri Kristo akhalabaanila bubwoonaki? Seshili shiryo ta.

¹⁸Ne n'imba nga ingobosawo bye kamakaambila byeesi namala khukhwonakisa, shimanyisa shiri ise samweene ndi umufuniaki uwe kamakaambila.

¹⁹Khulwekhuuba khu lubeka lwase, ise ndi umufu isi kamakaambila. Nga kamakaambila meene niko kakantsira ise, nio imbe umulamu khulwa Wele. Aluno ise natsaangililwa khu musalaba atweela ni Kristo,

²⁰nio shibe shiri s'ali ise niye uli umulamu ta, akhali Kristo niye uli umulamu mus'iise. Bulamu bweesi ise imenya mu mubili kwase, imbumenya khulwe khufukiilila mu Mwaana wa Wele, uwaangana ise naluundi waawaanayo buulamu bweewe khulwase.

²¹Ise shinyala neesa andulo bubweela bwa Wele ta. Khulwekhuuba iba nga bari bukhosefu bunyolikhana khulwe kamakaambila, Kristo aba imbaawo sheesi afwiila ta.