Read lumasaaba Bagalatiya 3 Bible Online

Bagalatiya 3 - lumasaaba bible

Bagalatiya 3

¹Inywe Bagalatiya nga muli baasilu! Naanu uwabaloka inywe? Ise nabokesanisila ilala mu moni tseenywe isaambo isi Yesu Kristo aatsaangililwa khu musalaba.

²Lekha mbareebe shireebo shitweela shonyene: Mwafuna Umwoyo umukhosefu khulwekhuuba mwawaamba kamakaambila, namwe khulwekhuuba mwafukiilila Kamakhuuwa Kamalayi nga ni mwakawulila?

³Munyala muryeena khuuba basilu muryo? Munyala muryeena mwarakikha buulamu bushaakha n'Umwoyo wa Wele, ate ari ndi ikhumalilisa mwelayo khu maani ka keenywe?

⁴Inywe mwabira mu biindu bikali byoosi biryo, ne mbaawo sheesi mweyikamo ta? Ilala mbaawo sheesi mwafunamo ta?

⁵Mwaambaasa muri Wele abawa Umwoyo weewe ni khukhola bye kamakaanga mus'iinywe, bari khulwekhuuba mwawaamba kamakaambila? Namwe abawa Umwoyo weewe khulwekhuuba mwafukiilila Kamakhuuwa Kamalayi keesi mwawulila?

⁶Nga ni mubona Iburayimu byeesi abiramo, nga bibyaronebwa ni biloma biri, “Niye ara khufukiilila khweewe mu Wele, ni khulwe khufukiilila ukhwo, mu moni tsya Wele wabalikha khuuba umuundu umukwalaafu.”

⁷Aso, ni mumanye muri babaandu babaali ni khufukiilila, nibo babetsukhulu ba Iburayimu babeene.

⁸Ni bibyaronebwa bikhosefu byalomakho nga bushiili biri Wele aliwa Banaambo bukwalaafu, khulwe khufukiilila. Shikila Kamakhuuwa Kamalayi kaaboolelwa isi Iburayimu nga bushiili nga kaloma kari, “Khuubirira mwiiwe, kamanaambo koosi kalinyoola ikhabi.”

⁹Nashiryo boosi babafukiilila bakabananila atweela tsikhabi ni Iburayimu uwaba ni khufukiilila.

¹⁰Abo boosi babaakhola bikholwa nga beyikina kamakaambila, bali aasi e shitsubo. Khulwekhuuba buurone buloma buri, “Umuundu yeesi ukhaasikha khulondelela buli shitweela shisharonebwa mu shitabo she kamakaambila, baamala khumutsuba.”

¹¹Ilala, shamanyikha lubuula shiri mbaawo ubalibwa mu moni tsa Wele khuuba umukwalaafu khulwe kamakaambila ta. Khulwekhuuba sharonebwa shiri, “Umuundu uli umukhosefu isi Wele khulwe khufukiilila, niye yenyene uliba umulamu.”

¹²Ne kamakaambila sikeemikha khu khufukiilila ta. Ne nga bibyaronebwa bikhosefu ni biloma biri, “Uyo yeesi ukhola byoosi byeesi kamakaambila kaloma, aliba umulamu.”

¹³Kristo akhusikula ifwe khwarura mu shitsubo sheesi kamakaambila kareera, nga umweene ekyela shitsubo isho khulweefwe. Khulwekhuuba nga bibyaronebwa ni biloma biri, “Uyo yeesi utsaangililwa khu kusaala aba ali uweshitsubo shishaama isi Wele.”

¹⁴Kristo shino ashikhola khulwe khukhusikula ifwe, nio tsikhabi tsitsaweebwa Iburayimu tsinyale khukhwoola khu Banaambo, khuubirira mu Kristo Yesu. Nio khulwe khufukiilila nafwe khunyoole shiwaanwa sh'Omwoyo, sheesi Wele akhulomela ifwe.

¹⁵Bebuulebe, lekha imbawe she khuubonelakho, khukhwaama mu bulamu bwa busheele. Ni mwaambaase khu ndakaano ikholebwa ni babaandu babili; n'imala khuŋaŋasibwa, imbaawo umuundu ufukiilisibwa khukirusamo shishiindu shoosi, namwe khukilooselakho ta.

¹⁶Ne ari Wele sheesi aloma, alomela Iburayimu ni lisaaye lyeewe. Ne bibyaronebwa sibiloma biri, “N'isi be lisaaye lyeewe,” nga shiwaamba khu baandu bakali ta. Ne biloma biri, “N'isi lisaaye lyeewe,” nga amanyisa umuundu mutweela, nga niye Kristo.

¹⁷Ne sheesi ise imanyisa nisho shino indi: kamakaambila kakaweebwa kimiiko bitoondo bine, ni kamakhumi kataru (430) lwanyuma busa, sikanyala kafuniaaka indakaano iyo, iyanyoowa ta. Shikanyala kafuniaaka indakaano iyakholebwa ni Wele, karyo kaaba nga karusawo sheesi Wele asuubisa ta.

¹⁸Khulwekhuuba noola busikha bwimikha khu makaambila, buba sibushiimikha ndi luundi khu khusuubisa khwa Wele ta. N'enga ni shili, Wele mu bweela bweewe, awa Iburayimu busikha khulwe khusuubisa.

¹⁹Aso, ne shitsilililwa she kamakaambila nisho shili ena? Kamakaambila kaareebwawo khukhwokesana nga khukhwoneka ni khuli. Naluundi kaabawo khukhwoolesa lisaaye lya Iburayimu lilyalomebwakho ni lyeetsa.[1] Kamakaambila kano kaareebwawo ni bamalayika mu mikhono ky'omuundu umutubaasi.

²⁰Ne umutubaasi s'akanibwa ta, khukhwaama nga ni shili sh'omuundu mutweela, ni Wele ali mutweela.

²¹Ne ari shimanyisa shiri kamakaambila kakhaandisa sheesi Wele asuubisa? Taawe! Khulwekhuuba iba nga kamakaambila kakaareebwawo kakanyala khureera buulamu isi babaandu, khali buli muundu wabaliwa khuuba umukwalaafu mu moni tsa Wele, khulwe khulondelela kamakaambila.

²²Ne bibyaronebwa bikhosefu biloma biri, “Shibala shawulibwa ni kamaani ke shishonako nio ibo babaafukiilila mu bisuubiso bya Wele banyale khufuna shiwaanwa, khulwe khufukiilila mu Yesu Kristo.”

²³Ne nga khufukiilila khuno khushiili khukhwiitsa ta, ifwe fweesi kamakaambila kaaba kakhuliinda mu bubowe, khukhwoolesa khu mbuka isi khufukiilila khwabimbulilwa.

²⁴Nashiryo kamakaambila kabeele nga kakaatsowesa busa, nga kakakhuroongesa ifwe khukhwoolesa isi Kristo. Nio khunyale khubalibwa khuuba bakwalaafu mu moni tsa Wele, khulwe khufukiilila.

²⁵Ne nga ari ni shili ndi khufukiilila khwayitsa, ifwe sikhushiliindibwa ni kamakaambila ta.

²⁶Khulwekhuuba khuubirira mu khufukiilila, inywe mweesi muli babaana ba Wele, mu Kristo Yesu.

²⁷Inywe mweesi mumwabatisibwa mu Kristo mwakwaarisibwa ni Kristo nga shikwaaro.

²⁸Nashiryo ari mbaawo Umuyudaaya namwe Umuyonaani ta, umukulwa namwe ukhali umukulwa ta, umusaani namwe umukhasi ta. Inywe mweesi muli umuundu mutweela mu Kristo Yesu.

²⁹Inywe noola muli ba Kristo, muryo muli lisaaye lya Iburayimu. Naluundi muli basikha be shisuubiso sheesi Wele asuubisa.