Read lumasaaba Bagalatiya 4 Bible Online

Bagalatiya 4 - lumasaaba bible

Bagalatiya 4

¹Ne sheesi ise inoma nisho shino indi, umuundu umusikha n'aba nga ashiili umwaana, mbaawo shishiindu shimwawukhanisakho akari ewe n'umukulwa busa ta, akhaba nga niye uyila bibiindu byoosi.

²Niye aba awulibwa ni babamutsoyisa, naluundi baba baaliindi khukhwoolesa bifukhu ni byoola byeesi paapa weewe arekekha.

³Nashiryo, ni nafwe ni khwaba nga khushiili babaana, khwaba mu bukulwa, nga khuwulibwa ni bye khaale, bye mu shiibala.

⁴Ne bifukhu bibyeene ni byoola, Wele arumana Umwaana weewe uwasaalikha n'umukhasi, mu saambo iye kamakaambila.

⁵Nio asikule abo babaaba aasi e kamakaambila, ari nio manya khunyale khufuna shiifwo shisheene she khuuba babaana.

⁶Ne khukhwokesana shiri khuli babaana beewe, Wele arumana Umwoyo w'Omwaana weewe mu myoyo kyeefwe. Umwoyo uyo nga alaangila angaaki ari, “Abba, Paapa.”

⁷Nashiryo iwe s'ushiili umukulwa luundi ta, akhali ndi uli umwaana, naluundi nga n'uli umwaana, Wele wakhwikyelisile iwe khuuba umusikha.

⁸Bifukhu bibyabira, inywe mwaba simwamanya Wele ta. Mwaba muli baraambi be ba wele bakhali Wele umweene ta.

⁹Ne ari khukhwaama nga ni mumanyile Wele, namwe ndi nga Wele n'abamanyile inywe, munyala muryeena khushuukha mwelayo isi kimyoyo kye shitaambi luundi kikikhalimo ta, mwekyela babakaanisi baakyo? Mukana ndi mwileyo mubowebwe ni nakyo luundi?

¹⁰Aluno mulikho mulondelela bifukhu bya buraawa, ni kimyeesi, ni bubwiile, ni kimiiko.

¹¹Ni nase ndi umwiyeembelefu naabi, ndi shinyala shonakisa, ni khukhalaabana khwase isi muli khwaba khwa busa.

¹²Imbekontselela be buulebe, ni mwikyele nga ise n'indi. Khulwekhuuba nase nekyela nga nanywe. Inywe simwaambirisakho ise buubi ta.

¹³Nanywe nga ni mumanyile, makiboole bulwaale bwase bwe kumubili nibwo bubwakila nanyoola ikhabi iye khubaboolela inywe Kamakhuuwa Kamalayi.

¹⁴Ikhaba nga khulwe bulwaale bwase bwe mubili naba shisiro isi muli, ne inywe simwandoba ise ta, namwe mwandekelesa ta. Ne mwantsikhoyela nga malayika wa Wele, namwe nga Kristo Yesu umweene.

¹⁵Ne ari kumwikhoyo kweesi mwabatsaka nakwo, kuli ena? Iba nga shishanyalikha khali mwarusamo tsimoni tseenywe mutsiimba ise. Ise ndi umujulisi wenywe khu shino.

¹⁶Ne ari ise nekelile umusiku weenywe, khulwe khubakanishila inywe bya ŋali?

¹⁷Babaandu babaandi abo bekholisaka busa khubokesa bari babenaanayo isi muli, ne mbaawo sheesi babayeeta ta. Nibo sheesi baweentsa shili khubawukhanisa inywe khukhwaama khusi ifwe, nio inywe mube babenaanayo isi bali.

¹⁸Busheele shiba shilayi khukhwinaanayo isi babaandi, singa shitsilililwa shiba nga shilayi; luundi shibatsaka shiryo busheele. Ne akhuba nga ise indiyo ni nanywe shonyene ta.

¹⁹Baana baase bakanwa, butsiina bweesi indimo khulweenywe khukhwoolisa ni mulikyela nga Kristo, buli busa nga butsiina bwe khusaala umwaana.

²⁰Abe ari imba nga ubeele ni nanywe, nandishuusilekho likono lyase, khulwekhuuba ari imbekanakana.

²¹Ni mumboolele inywe babakana khuwulibwa ni kamakaambila! Simuwulila sheesi kamakaambila kaloma ta?

²²Lwekhuuba bibyaronebwa bikhosefu biloma biri: Iburayimu aba ni babaana babili. Mutweela aba uw'omukhasi umukulwa, ne ukuundi uw'omukhasi uwe lukoosi.

²³Umwaana weewe uw'omukhasi umukulwa, asaalikha mu saambo iya busheele nga umuundu yeesi. Ne umwaana weewe uw'omukhasi uwe lukoosi, aasaalikha khulwe khusuubisa khweesi Wele akhola.

²⁴Bibiindu bino binyala byaayilibwa nga she khuubonelakho busa. Khulwekhuuba bakhasi bano nitso tsindakaano tsiibili. Indakaano ndweela yarura khu lukiingi Sinaayi. Niyo isaala be bukulwa; niyo Hagali.

²⁵Ari Hagali yuno nilwo lukiingi Sinaayi, luluuli mu Buwarabu lulwokesana Yerusalemu uwe shaleelo. Khulwekhuuba ali mu bukulwa ni babaana beewe.

²⁶Ne Yerusalemu uwe mwikulu ali uwe lukoosi, naluundi niye maayi weefwe.

²⁷Khulwekhuuba bibyaronebwa biloma biri: “Ni wikhoye iwe umukhasi umukuumba, ukhasaalatsakakho babaana ta. Yokesela angaaki iwe yeesi umwaana akhalyatsakakho ta. Khulwekhuuba umukhasi isi baantsukha aliba ni babaana bakali khufuura b'omukhasi uli n'umuseetsa.”

²⁸Ari be buulebe, ifwe khuli babaana be khuusuubisa khweesi Wele aakhola, nga Isaaka n'aba.

²⁹Mu bifukhu ibyo, umwaana uwasaalikha mu saambo iya busheele nga umuundu yeesi, aakubyeenga umwaana uwasaalikha khulwe kamaani k'Omwoyo. Ni aluno ari shili shiryo.

³⁰Ne bibyaronebwa bikhosefu biloma biryeena? Biloma biri: “Timisa umukhasi umukulwa n'umwaana weewe. Khulwekhuuba umwaana w'omukhasi umukulwa s'aliba umusikha, atweela n'umwaana w'omukhasi uwe lukoosi ta.”

³¹Ni nashiryo, be buulebe, ifwe sikhuli babaana b'omukhasi umukulwa ta, ne khuli babaana b'omukhasi uwe lukoosi.