Read lumasaaba Bagalatiya 5 Bible Online

Bagalatiya 5 - lumasaaba bible

Bagalatiya 5

¹Khulwe lukoosi, Kristo waakhulekhuula ifwe khuuba be lukoosi. Nashiryo ni mwiime ni kamaani, mulekhe khuba ni bibiindu bibibasitowela inywe naluundi ni busiro bwe bukulwa ta.

²Ni mundekeerese bulayi. Ise Paulo imbaloma ndi, ni mulifukiilila khukhwinjila imbalu, Kristo aba s'ashiili uwe lisuno isi muli ta.

³Luundi mboolela buli musaani ufukiilila khukhwinjila imbalu ndi ali ni likobi lye khukhwoolelesa kamakaambila koosi.

⁴Inywe babakana khulondelela kamakaambila nio bari musiimibwe ni Wele, mweyawuule khu Kristo, mwakwiile ibulafu we bubweela bwa Wele.

⁵Ne ari ifwe khusuubila khuri Wele alikhukalusa khwikyele bakwalaafu mu moni tseewe. Ni shisheene isho nisho sheesi khuliindilila, khu lwe kamaani k'Omwoyo wa Wele uraambila mu khufukiilila khweefwe.

⁶Khulwekhuuba mu Kristo Yesu khukhwinjila imbalu ni khulekha khwinjila imbalu, byoosi bili shitweela busa. Ne shishiindu shitweela shikhulu nikhwo khufukiilila khukhwiyokesanila mu khukana.

⁷Inywe mwaba mulikho mutima bulayi busa, ne naanu uwabengiilemo wabakhasisa khuwulila bya ŋali?

⁸Khuukhongelesa khukhufwaana khuryo sikhwaama isi Wele uwabalaanga inywe ta.

⁹Kamamela makyeekhe kari kakila buufu bwoosi bwasiila.

¹⁰Ne niyikina ndi mu Mukasya, inywe simulyambaasakho khu shiindu shishindi ta. Ne uyo yeesi uli khubataambisa aryo, aliiwotsa kumusaango kweewe isi Wele, akhaba naanu oba naanu.

¹¹Bebuulebe, noola ise ishilangilila bye khukhwinjila imbalu, khulwashiina bangubyeenga ise? Isho shiba shishiili shiryo, khali nga ise ni nangilila khu bye kumusalaba kwa Kristo, khali seshiireera bihangafu byoosi ta.

¹²Abe nandikanile ndi babeene babataambisa abo khali babeene bewomoole.

¹³Ne inywe be buulebe mwalaangibwa khuuba balekhuule. Ne mukharaambisa lukoosi lweenywe ulwo khukhola byeesi kumubili kukana ta, ne ni muluraambise mu khukana ni mu khubakalusa inywe khukhwikyela babakaanisi akari a mwabeene ni mwabeene.

¹⁴Khulwekhuuba kamakaambila koosi kolelela mu bwitsufu mu likaambila litweela, liliiloma liri, “Kanatsaka umwesanwa woowo nga iwe ni wikana wamweene.”

¹⁵Ne noola mwiloosela khukhwibirisa nga tsisolo tsye mwiirome, nga mulumana kameeno naluundi nga mutsiinisana mwenyene na mwenyene, muli ni khukhwitsililisa, khulwekhuuba buli mutweela kane onakise uwashe.

¹⁶Ise shino nisho sheesi inoma ndi: khayo Umwoyo araangilile buulamu bwenywe, nio mulekhe khuliliilila byeesi kumubili kwikoomba ta.

¹⁷Khulwekhuuba khukhwikoomba khwe kumubili khukhaandisana ni byeesi Umwoyo akana, n'Umwoyo wakhaandisana ni byeesi kumubili kukana. Bino byoombi birekana nio ulekhe khukhola sheesi wandikanile khukhola ta.

¹⁸Ne n'uba nga Umwoyo niye ukhuraangilila iwe, uba s'uwulibwa ni kamakaambila ta.

¹⁹Buuraambi bwe bye busaalikhana bw'omuundu bili bya lubuula, nga nibyo bino: buyeyani, bunyaalu, khukhwibirisa shifwaabi, ni lukhobe.

²⁰Khukhwisaaya bifwaani, bubini, busiku, khulomana, liibuba, lirima, butakha, khukhwiyawulanamo, ikirombooli,

²¹ni likoko, bumeesi, khuwosiina, ni bibiindi bibiili nga ibyo. Imbareewula nga esi namala khubareewulakho makiboole, indi ibo babaakhola bibiindu bibiili nga bino biri, sibaliba ni kumukabo mu Buyiinga bwa Wele ta.

²²Ne bibyaamo by'Omwoyo nibyo bino: khukana, kumwikhoyo, lukoosi, khukhwikhalilikha, shiisa, buulayi, bubwiyikinwa mu khufukiilila,

²³buwolu, ni khukhwiliinda wamweene. Imbaawo likaambila lilyareebwawo khureesa bibiindu nga bino ta.

²⁴Ni naabo babaali ba Kristo Yesu baamala khutsaangilila kumubili atweela ni khukhwikoomba khwakwo ni kameelu kakwo, khu musalaba.

²⁵Ifwe ni khuba nga khuli mu Mwoyo, khayo khulondelele buli shitweela sh'Omwoyo.

²⁶Khakhulekhe khukhwiniinisaka angaaki, khulekhe khurunyisana, namwe fwenyene na fwenyene khulekhe khuwaambila basheefwe liibuba ta.