Read lumasaaba Bagalatiya 6 Bible Online

Bagalatiya 6 - lumasaaba bible

Bagalatiya 6

¹Bebuulebe, nga umuundu yeesi wanyoolekhaane nga wonakile, inywe mumuuli be mu mwoyo, mukhakekho mu mwoyo kumulayi khumukobosa khu mukhoosi kumurereefu. Ne ni mwiliinde mwabeene, buli mutweela khus'inywe mulekhe khukhonjelesebwa ta.

²Buli mutweela n'ayeete khusutakho shisiro sh'owashe, nio musaambo yino kane mube nga mwolelesa likaambila lya Kristo.

³Ne noola umuundu yeesi eyambaasakho umweene khuuba shishiindu she angaaki, ate nga ali uwe aasi, umuundu uyo aba umweene ewombesa busa.

⁴Ne khayo buli muundu atseme buraambi bweewe. Noola buli bulayi kane umweene eruuye khulwe ibyo byeesi akholile, nga s'elekhaasa ni byeesi ukuundi akholile ta.

⁵Khulwekhuuba buli mutweela ali ni khusuta shisutwa shisheewe umweene.

⁶Umuundu isi baleekela shilomo aakha akabanane bibiindu bilayi byoosi ni nooyo umuleekela.

⁷Mukhewombesa mwabeene nga mwaambaasa muri munyala khuutsekhelela Wele ta. Khulwekhuuba umuundu sheesi amiitsa, ni shisheene isho sheesi alikyesa.

⁸Uyo umiitsa nga khukhwikoomba khwe kumubili ni khuli, alikyesa khuhela khukhwaama mu bweene umwo. Ne uyo umiitsa khulw'Omwoyo, alikyesa buulamu bubukhawawo ta, khukhwaama isi Umwoyo.

⁹Nashiryo busheele ni khwiloosele khukhola bibiindu bilayi; khukhakamisa ta. Khulekhe khukhwakamisa ta, lwekhuuba imbuka inyene iye khuweebwa shiwaanwa ikhoole.

¹⁰Ni nashiryo, ni khuba nga khushiili ni imbuka, khayo khukhole bilayi isi babaandu babaandi boosi. Ne khufuurisa isi ibo babaali mu ntsu iye bafukiilili.

¹¹Ni mubone tsinukuta ni tsili tsimboofu, tseesi imbaroneele mu mukhono kwase kumweene.

¹²Abo babaakana khukhwiyokesana nga ni bali balayi mu moni tse babaandu, nibo babawanyiinya inywe khukhwinjila imbalu. Bakhola baryo bari nio balekhe khubakubyeenga khu lwe kumusalaba kwa Kristo ta.

¹³Lwekhuuba ni nabo babeene benjila imbalu, ne sibaloondelela kamakaambila ta. Ne bakana inywe khukhwinjila imbalu, nio bebuyile khulwe khabonelo akho khu mibili kyeenywe.

¹⁴Ne khu luwaande lulwase, s'inyala khukhwibuyila mu lomo yoosi ta. Khurusakho ni buyila khulwe kumusalaba kw'Omukasya weefwe Yesu Kristo. Khuubirira mu musalaba ukwo, shiibala shatsaangiliwa isi ise, ni nase isi shiibala.

¹⁵Lwekhuuba khukhwinjila imbalu namwe khuulekha khwinjila imbalu, seshili shiindu ta. Shishiili shilayi nikhwo khuuba shibuumbe shiyaakha.

¹⁶Lukoosi ni shiisa bibe isi abo babaloondelela khuleekela ukhwo mu bulamu bwaabwe, naluundi ni khu baandu ba Wele boosi.

¹⁷Ni shishakamayo, ikhabayo umuundu yeesi khukhuundambisa ise luundi ta. Khulwekhuuba tsimbaaso tseesi ndi ni natso khu mubili kwase tsokesana tsiri indi umukulwa uwa Kristo.

¹⁸Bebuulebe, bubweela bw'Omukasya weefwe Yesu Kristo, bube ni nanywe mweesi. Amiina.