Read lumasaaba Baefeso 2 Bible Online

Baefeso 2 - lumasaaba bible

Baefeso 2

¹Ni nanywe mwaba muli baafu lwe bumiinyi ni bibyoonako byeenywe.

²Khaale mwaba mukyeendatsaka nga mulondelela shiibala shino byeesi shikana; nga mulondelela umuwuli we bisimu bye mu mbewo, nga niye umwoyo umubi uraambila akari muubo babamiinyalila Wele.

³Ni nafwe lutweela khwaba nga nibo, nga khulondelela khukhwiwuuma khwe kimibili kyeefwe, khwebirisa nga kimibili ni bibyambaaso byeefwe ni byakana. Khuryo mu busaalikhana bweefwe khwaba babaandu be khukhaliwila kumusaango ni Wele, nga babaandu babaandi boosi ni bali.

⁴Ne Wele mu buyiindifu bwe shiisa sheewe, ni khuukana khweewe khukali khweesi akhukanamo ifwe,

⁵ikhaba nga khwaba baafu mu byoonako, wakhuwa ifwe buulamu atweela ni Kristo. Shino shili lwe bubweela bwa Wele kila abawonesa inywe.

⁶Ni Wele akhulamusa ifwe atweela ni Kristo Yesu, naluundi wakhwikhasa atweela ni Kristo mweene mu shiibala she mwikulu.

⁷Shino ashikhola ari nio manya mu miboolo kikiitsa mumoni, okesanise buyiindifu bukali bwe bubweela bweewe, ni shiisa sheewe isiifwe mu Kristo Yesu.

⁸Lwekhuuba inywe babafukiilila mwawonesebwa lwe bubweela bweewe, akhuba lwekhuuba ndi inywe mumwashikhola ta, ne shili shiwaanwa sha Wele.

⁹Shino sishakholebwa lwe buraambi bweenywe bulayi ta, nio ilekhe khubawo umuundu yeesi uwibuyila ta.

¹⁰Ifwe khuli buraambi bwa Kristo, khukhwabuumbiwa mu Kristo Yesu khuraamba buraambi bulayi, bweesi Wele umweene amala khaale khukhuŋoonaŋoonela ari ifwe khukholatsake.

¹¹Ni mushebulile muri inywe muli Banaambo mu busaalikhana, beesi Bayudaaya balaangatsaka bari basiinde, ni nabo babeene belaanga bari babenjile lwekhuuba baaba baayinjila imbalu iye kumubili ni kamakhono ke babaandu.

¹²Ni mushebulile muri khaale'kho abe mwayawukhanisibwa khukhwaama khu Kristo, mwaba muli Banaambo busa, nga si muli batweela khu baandu ba Wele ta. Abe inywe babaromboora khukhwaama kh'undakaano iilimo ibyo byeesi Wele asuubisa babaandu beewe, mwaba mu shiibala muno nga simuli ni kumwiyikino naluundi nga simuli ni Wele ta.

¹³Ne mu Kristo Yesu, inywe mumwaba aleeyi, ari mwareerebwile ambi khulwe khutsukha kamafuki keewe.

¹⁴Lwekhuuba Kristo umweene niye lukoosi lweefwe, nga akalusa Bayudaaya ni Banaambo khuuba babaandu batweela, nga awaanayo kumubili kweewe kumweene kukwaarusawo shiseenge she bubiyile shishawukhanisa.

¹⁵Niye mu mubili kweewe arusawo kamakaambila ke Bayudaaya, ni bilakilo ni khuwula khwako khwoosi, nio akile mu manaambo kabili arewo umuundu mutweela umuyaakha mu butweela ni naye, areere lukoosi.

¹⁶Lwe khuufwa khweewe khu musalaba, Kristo akobosawo busaale akari we Bayudaaya ni Banaambo mu mubili mutweela wabakobosa isi Wele, wahesa bubiyile bubwabawo.

¹⁷Aryo Kristo eetsa waababoolela Kamakhuuwa Kamalayi ke lukoosi, is'inywe mumwaba aleeyi, n'isi abo babaaba aambi.

¹⁸Lwekhuuba khulwa Kristo, fweesi Bayudaaya ni Banaambo khunyala khukhwiitsa isi Paapa mu Mwoyo mutweela.

¹⁹Nashiryo, inywe simuli luundi Banaambo namwe babeetswa ta, ne muli basaalikhana atweela ni bakhosefu ba Wele, naluundi muli babaandu be ntsu ndweela iya Wele.

²⁰Ni nanywe mwayombekhebwa khu luwoongwa lwe baarume, ni baŋoosi, ni Kristo Yesu umweene nga niye libaale likhulu lilimisibwile mu soonda.

²¹Mu niye nimwo mweesi shishombekhe shoosi shiwaambanila atweela sheema, luundi shatsowa, shekyela lisaayilo likhulu likhosefu ly'Omukasya.

²²Luundi mu niye mweesi mwombakhibwila atweela khukhwikyela shishikhalo sha Wele mweesi Umwoyo weewe amenya.