Read lumasaaba Baefeso 3 Bible Online

Baefeso 3 - lumasaaba bible

Baefeso 3

¹Ni lwe lomo yino, ise Paulo umubowe khulwa Kristo Yesu khulweenywe Banaambo, imbaloombela isi Wele.

²Lwekhuuba ilala mwaawulila muri, lwe bubweela bweewe, Wele wayimaambisa ise buufunisi khulweenywe.

³Wele waayimimbulila iŋoonaŋoona iye shimoonyo, luundi waakintsokesa nga ni namala khaale khubaronela mu bwiimbi khu biindu ibyo.

⁴Ne ni kane musome byeesi imalile khurona, kane mumanye muri, ise namalile khumanya bulayi shimoonyo sha Kristo.

⁵Ne mu muboolo kumutaayi, shino sishamanyikha mu baandu ta, ne ari Umwoyo Umukhosefu washibimbulila baarume beewe bakhosefu ni baŋoosi.

⁶Ne shimoonyo shino nisho ndi, khuubirira mu Makhuwa Kamalayi, Banaambo bakabananiile atweela ni Bayudaaya tsikhabi tsa Wele. Nibo babaandu be kumubili mutweela, luundi bali babaandu babakabananila atweela tsikhabi tseesi Wele abalomela, tsitsolelesebwa mu Kristo Yesu khuubirira mu Makhuwa Kamalayi.

⁷Ise nekyela umwakaanisi we Kamakhuuwa Kamalayi lwe shiwaanwa she bubweela bwa Wele sheesi amba ise khuubirira mu buraambi bwe kamaani keewe.

⁸Ni nase umukyeekhe mu bakhosefu ba Wele boosi, Wele wayimaambisa ikhabi yino lwe bubweela bweewe, iye khuuboolela Banaambo kamakhuuwa kamalayi ke buyiindifu bwa Kristo, bubukhanyala khukyeelasikha ta.

⁹Naluundi wayiimba ise khukhwokesa buli mutweela ikhola iye shimoonyo sha Wele nga ninyala yareebwawo yaraamba. Wele umubuumbi wa byoosi abisa shimoonyo sheewe shino khukhwaama khaale ni khaale,

¹⁰nio akile khu mbuka yino khuubirira mu baandu ba Wele babafukiilila, kamakhuuwa keewe ke tsisaambo tsoosi kamanyisibwe isi bawuli, ni bebunyala be mu bifwo bye mwikulu.

¹¹Bino byoosi Wele abirekekha nga emikha khu shitsilililwa sheewe shishiiliwo khukhwaama khaale ni khaale, shisholelela mu Kristo Yesu, Umukasya weefwe.

¹²Mu butweela ni Kristo ni khuubirira mu khufukiilila mu niye, ifwe khwisyende aambi ni Wele mu lukoosi akhali khukhwikanakana ta.

¹³Ni nashiryo, imbekontselela ndi, mukhatendemela kimyoyo lwe khutsiinisibwa khwase khulweenywe ta. Bino byoosi biliwo lwe khubareerera inywe shiriifwa.

¹⁴Ni lwe lomo yino, ise ifukhamila isi Paapa,

¹⁵nga niye isi buli shikuuka she mwikulu ni she khu shiibala shamisa lisiina lyasho.

¹⁶Inoomba ndi khulwe buyiindifu bwe shiriifwa sheewe, abesemo inywe kamaani ni bunyala khulw'Omwoyo weewe, mu byambaaso byeenywe bye mukari,

¹⁷nio Kristo ekhalatsake mu myoyo kyeenywe lwe khufukiilila. Naluundi inoomba ndi inywe nga mwabeele ni kimili kyeenywe, luundi nga mwawangasiwile mu khukana,

¹⁸nio inywe atweela ni bakhosefu ba Wele boosi, munyale khumanya bubalaayi, ni buleeyi, ni buleeyi khuniina mu ngaaki, ni khukhwiikha aasi; bye khuukana khwa Kristo nga ni khuli.

¹⁹Naluundi inoomba ndi mumanye khuukana khwa Kristo khukhubiririsa khumanya khwoosi, nio mwitsusibwe bubwitsufu bwoosi bwa Wele.

²⁰Aso, ari Wele uyo unyala khuukhola bikali bifuura bukali khu byeesi khunyala khuloomba namwe khwaambaasakho, nga kamaani keewe kakaakholela musiifwe ni kali,

²¹aweebwe shiriifwa shoosi mu baandu ba Wele babafukiilila, ni mu Kristo Yesu khukhwaama shaleelo khukhwoolesa biilo ni biilo. Amiina.