Read lumasaaba Baefeso 4 Bible Online

Baefeso 4 - lumasaaba bible

Baefeso 4

¹Ise nga umubowe mu Mukasya, imbekontselela ndi ni mumenye buulamu bweenywe mu bwitsililisi, mube nga Wele n'abalaanga.

²Busheele ni mube bawolu, babaakheyiinga ta, luundi babekhalilikhi, nga mwokesanisa khukana mwenyene na mwenyene.

³Ni mukhakekho mu buli saambo khuliinda butweela bweesi Umwoyo abawa, mu khuwaambanisa khwe lukoosi.

⁴Iliwo kumubili mutweela kwonyene, n'Umwoyo mutweela, nga n'iliwo khukhwiyikina khutweela khweesi Wele abalaangila inywe.

⁵Iliwo Umukasya mutweela, khufukiilila khutweela, khubatisibwa khutweela.

⁶Iliwo Wele mutweela, uli Paapa wa boosi, uwula byoosi, uraambila mu byoosi, luundi ali mu byoosi.

⁷Ne Kristo waaha buli mutweela khusiifwe shiwaanwa sheewe, nga umweene n'akhalawo.

⁸Nga bibyaronebwa ni biloma biri; “Nga n'aniina mu ngaaki aleeyi naabi, wayila babowe atweela ni naye, aryo waha babaandu biwaanwa.”

⁹Ne shimanyisa shiina khuuloma ndi, “Aaniina mu ngaaki?” Shino sishimanyisa shiri aanyoowa weekha aasi abweene mwiloba?

¹⁰Aso uyo uweekha aasi, niye umweeneyo uwaniina mu ngaaki, khubirisa likulu lyoosi, nio akile etsuse shiibala shoosi umweene.

¹¹Umweeneyo niye uwaha babaandu biwaanwa, balala wabarobola khuuba baarume, babaandi khuuba baŋoosi, babaandi khuuba bababoolela Kamakhuuwa Kamalayi, ni babaandi khuuba babaayi ni baleekeli.

¹²Shino ashikhola khuŋoonaŋoona bakhosefu ba Wele lwe buraambi bwe bubwakaanisi, lwe khukhwombekha kumubili kwa Kristo.

¹³Nio lwanyuma ibumalilisi, fweesi atweela khwiitse mu butweela bwe khufukiilila khweefwe, ni mu khumanya khw'Omwaana wa Wele, khukhwoolesa ni khuliba babaandu babetsufu, babatsoyile khukhwoolela ilala khu bwitsufu bwa Kristo umweene.

¹⁴Ulwo sikhuliba nga babaana luundi ta, babaayilibwa iyi ni naayi ni mbewo, ni khupamburusibwa ni buli imbewo iye khuleekela, ni bukyesikyesi ni buwombesi bwe babaandi mu khukhola bibikhaakha ta.

¹⁵Ne khube babakanikha bya ŋali mu khukana, nio khutsowe mu biindu byoosi mu Kristo, niye uli kumurwe.

¹⁶Mu Kristo uyo, kumubili kwoosi kwayitubaasa atweela, luundi kwawaambanila atweela na buli nyiingo yoosi ikulimo. Nashiryo kumubili kwoosi kwatsowa, kweyombekha kumweene mu khukana, nga buli shisiintsa shiraamba kumulimo kwasho.

¹⁷Aso kila mbaloma luundi nga mbareewula inywe khulw'Omukasya ndi, mukhakyeenda nga babaakhamanya Wele ta, nga babaandu babaandi be shiibala mu byambaaso byaabwe bibikhalimo ta.

¹⁸Khuumanya khwaabwe khuli mu shiilima luundi baayiyawula khu bulamu bwa Wele lwe khuukoraana khwaabwe ni khuusitowa khwe kimyoyo kyaabwe.

¹⁹Sibawaambiwakho tsisoni ta, ne bewaanayo mu buyeyani nga bakhola bye bumoyaani bwoosi, ni kumuluungo kwe khuukhola buli she bunyaalu shoositana.

²⁰Ne inywe simweyika Kristo muryo ta.

²¹Ilala mwamuwulila niye umweene, luundi nga baloondeleli beewe, mwaleekelwa bya ŋali nga ni bili mu Yesu.

²²Nashiryo khwiibyo bibiwaamba khu saambo tseenywe tsikhale, ni mwiyabulekho umuundu uyo umukhale, uli umubowe lwe khukhwiwuuma khwe buwombesi.

²³Mwaakha mwikyele bashaakha mu myoyo kyeenywe ni mu byambaaso byeenywe.

²⁴Mukwaare umuundu uyo umuyaakha uwabuumbiwa mu shifwaani sha Wele, mu bukwalaafu bwa ŋali ni mu bukhosefu.

²⁵Ni nashiryo, ni mwiyabule bubeeyi bwoosi. Mukanikhatsake bya ŋali buli muundu isi uwashe, lwekhuuba ifwe fweesi khuli bisiintsa bye kumubili mutweela.

²⁶Ne noola mukhalala, khukhalala khweenywe khukhabayila mukhwonaka ta, namwe inyaanga ikhakwa nga mushikhalala muryo ta.

²⁷Mukhawatsakakho Sitaani imbuka ta.

²⁸Umuundu yeesi abe uweebatsaka alekhe khukhwiiba, ne arakikhe buraambi buulayi ni kamakhono keewe, nio anyoole bibimuyeeta umweene, ni khunyala khuyeeta bataambi.

²⁹Ne ilomo yoosi imbi ikharuratsakakho khukhwaama mukhanwa kheenywe ta, ne ni mukanikhatsake tsilomo tsindayi tsitsombekha, ni naabo babawulila banyale khunyoola tsikhabi.

³⁰Ne mukhakhalasatsaka Umwoyo Umukhosefu wa Wele ta, lwekhuuba Umwoyo weewe uyo niye khabonelo khakhokyesana khari inywe muli babeewe, khukhwoolesa shifukhu she buwonesi.

³¹Ni mulekhe bye khururira babaandi, khukhwilihaasa ni lirima, liyoombo ni khukhomyaasa, atweela ni buubi bwoosi.

³²Ne ni mubaatsake be shiisa, luundi balayi buli umuundu isi uwashe, nga mwiyakhanila mwenyene na mwenyene, nga Wele n'abeyakhila inywe khuubirira mu Kristo.