Read lumasaaba Baefeso 5 Bible Online

Baefeso 5 - lumasaaba bible

Baefeso 5

¹Khukhwaama nga ni muli babaana ba Wele bakanwa naabi, mwaakha mukhakekho mube nga niye umweene n'ali.

²Buulamu bweenywe bube bwe khuukana, nga Kristo n'akhukana ifwe, waawaanayo bulamu bweewe khulweefwe nga shiwaanwa luundi isaayilo iwunya isilikakha indayi isi Wele.

³Ne buyeyani, ni bunyaalu bwoosi, namwe kumulyuulyu, sibyaakha byalomebwakho khwiinywe, nga bakhosefu ba Wele ta.

⁴Namwe siyaakha khubayo bye tsisoni, namwe inganikha iye bunyaalu, namwe bye busilu ta, ne mwakha busa khusiima Wele.

⁵Lwekhuuba mwakha khumanya muri, mbaawo umuyeyani, namwe ulikho shiibi, namwe umuundu we kumulyuulyu yeesi, namwe uwiwuuma nga esaaya bifwaani, unyala khuuba ni kumukabo mu buyiinga bwa Kristo, ni bwa Wele ta.

⁶Ikhabawo umuundu yeesi ubawombesawombesa ni bilomo bye busilu ta, lwekhuuba lwe bilomo nga bino, lirima lya Wele liitsa khu baandu babaakhawulila ta.

⁷Nashiryo inywe mu khetubaasa ni nabo ta.

⁸Ikhaba nga mwabatsakakho mu shiilima, ne ari khukhwaama nga ni mwekyela be buwaanga mu Mukasya, ni mukyeende nga babaana be buwaanga.

⁹Lwekhuuba buwaanga nibwo bureera buulayi, bikwalaafu, ni bwa ŋali.

¹⁰Ni mukhakekho khukhwiyika ibyo bibikhoyesa Umukasya.

¹¹Ne mukhetubaasatsaka ni naabo babaakhola bye shishilima ta, ne ni mubireeratsake mu buwaanga.

¹²Lwekhuuba shiili she tsisoni khukanikha byeesi bamiinyi bakhola mu shimoonyo.

¹³Ne bibiindu byoosi bibireerebwa ibulafu mu buwaanga, bibonekha lubuula.

¹⁴Lwekhuuba buli shishiindu shishibonekha shiba buwaanga. Nashiryo kila shilomebwa shiri: “Sisimukha iwe ukona, yinyukha urure mu bafu, ni Kristo kane akhwaburukhile.”

¹⁵Nashiryo ni mwitsililise isaambo yeesi mumenyamo, mukhaba nga basilu ta, ne ni mube nga bakyesi.

¹⁶Ni muraambise bulayi imbuka isi muli nayo, lwekhuuba bifukhu bino biibi.

¹⁷Nashiryo, mukhasiluwala ta, ne ni mukhakekho khumanya sheesi Umukasya akana.

¹⁸Ni mulekheyo khukhwimeesa ni busela, bubunyala khubahesa, ne ni mwitsusibwe n'Umwoyo.

¹⁹Ni mukanikhe buli muundu isi uwashe mu Zabuli, ni tsinyiimba, atweela ni kimyeenya kimikhosefu. Ni mwiimbe muruuye Umukasya, mu myoyo kyeenywe,

²⁰nga musiima Wele busheele lwe bibiindu byoosi, mu lisiina ly'Omukasya weefwe Yesu Kristo.

²¹Ni muwulilisane mwenyene na mwenyene lwe khuurya Kristo.

²²Bakhasi ni muwulilatsake baseetsa beenywe, nga ni muwulila Umukasya.

²³Lwekhuuba umuseetsa niye kumurwe kw'omukhasi, nga Kristo naali kumurwe kwe kanisa, luundi ali umuwonesi wayo, ate nibo bali kumubili kweewe.

²⁴Nga ikanisa n'iwulila Kristo, ni bakhasi nabo baryo baakha khuuwulila baseetsa baabwe mu buli shiindu shoosi.

²⁵Ni baseetsa nanywe ni mukanaatsake bakhasi beenywe, nga Kristo n'akana ikanisa yeewe, wewaanayo umweene khulwaabwe.

²⁶Aashikhola aryo nio akile inywe mwiikele bakhosefu nga abasiinga ni kameetsi khuubirira mu shilomo,

²⁷nio abareere is'ali nga bali baafukiilisi be shiriifwa, nga sibalikho ni likoondo, namwe khukhwifunyaka khwoosi ta. Ne nga bali bakhosefu, luundi nga sibalikho likoondo ta.

²⁸Ni baseetsa nabo baryo, baakha khuukana bakhasi baabwe, nga ni bakana kimibili kyaabwe kimyeene, lwekhuuba uyo ukana umukhasi weewe aba wekanile umweene.

²⁹Lwekhuuba mbaawo umuundu unyala khuubiyila kumubili kweewe ta, ne akuliisa luundi waakulolelela buulayi, nga Kristo nalolelela baafukiilisi.

³⁰Lwekhuuba ifwe khuli bisiintsa bye kumubili kweewe.

³¹Nga bibyaronebwa ni biloma biri, “Ni lwe lomo yino, umusaani kane alekhatsake paapawe ni maayiwe, etubaase n'umukhasi weewe, ni nabo boombi kane bekyele kumubili mutweela.”

³²Mu shino mulimo bya ŋali bibyabisibwa, ne mukhwaambaasa khwase imbona ndi iliwo sheesi shileekela khu Kristo ni baafukiilisi.

³³Ne luundi shihaamba khwiinywe, buli museetsa aakha khuukana umukhasi weewe nga ni ekana umweene, na buli mukhasi aakha khukhwiisamo umuseetsa weewe lukoosi.