Read lumasaaba Baefeso 6 Bible Online

Baefeso 6 - lumasaaba bible

Baefeso 6

¹Babaana, ni muwulilatsake basaali beenywe khulw'Omukasya; lwekhuuba shino shilayi inywe khuushikhola.

²“Yiisatsakamo paapawo ni maayiwo lukoosi” nilyo likaambila liliinyoowa liilimo khusuubisa khwa Wele,

³nio akile iwe ube buulayi luundi umenyewo lukali mu shiibala.

⁴Ne basaali nanywe mukhabirisatsaka buubi babaana beenywe, khubakhalasaka ta. Ne ni mubatsowese nga mubaleekela musaambo tse khufukiilila Yesu.

⁵Baakulwa, ni muwulilatsake babaandu babaali bakoosi beenywe be mu shiibala ni khuurya ni khuunikina ni kumwoyo mutweela, nga ni mwandikholele Kristo.

⁶Ne mukhakaanisa lwekhuuba imoni yaabwe yaababoone nio bari babaasiime ta. Ne ni mukhole ni kumwoyo mutweela byeesi Wele akana, nga babakaanisi ba Kristo.

⁷Ni mwakaanise ni kumwoyo mutweela, nga babakaanisa Umukasya, ne akhuba babaandu ta.

⁸Nga mushebulila muri, Umukasya aliiwa buli muundu kumukheemba kweewe; umukulwa ni nooyo ukhali umukulwa ta, nga emikha khu buraambi bulayi namwe buubi bweesi akhola.

⁹Ni bakoosi nanywe, ni mubirisatsake babakaanisi beenywe musaambo niyo ndweela. Mukhabariisariisa ta, nga mushebulila muri mweesi babakaanisi ni bakoosi muli aasi o Mukasya uwe mwikulu, ni naye ayila babaandu boosi shitweela.

¹⁰Shishakamayo be buulebe, ni mube ni kamaani mu Mukasya, khulwe bunyala bwe kamaani keewe.

¹¹Ni mukwaare bye busoolo byoosi bya Wele nio akile munyale khushingilila tsimbomelo tsa Sitaani.

¹²Lwekhuuba ifwe si khusoolana ni kumubili ni kamafuki ta, ne khusoolanisa bawuli ni bebunyala, luundi khusoolanisa kamaani ke shiibala ke shishilima, ni kamaye ke kumwoyo kamabi ke shiibala she mungaaki.

¹³Nashiryo ni mukwaare bye busoolo byoosi bya Wele ana ari, nio munyale khuuba nga mwiimikhawo khu shifukhu shiibi nga shoolile. Naluundi ni muba nga mwaamalile khukhola byoosi, munyale khuuba nga mwiyimisawo mwabeene.

¹⁴Nashiryo ni mwiimikhe nga mwenywesile, nga mweboyile mu bibuno byeenywe bwa ŋali nga lukhoba, ni mukwaare bukhosefu mu bifuba byeenywe,

¹⁵nga mwakwaarire bubwirekefu bwe khuboolela Kamakhuuwa Kamalayi ke lukoosi mu bikyele byeenywe.

¹⁶Ne mu byoositsana, mubukule ingabo ye khufukiilila isi munyala khuraambisa khuusimisa buyiingo bubwaburukha bweesi Sitaani alasa.

¹⁷Ni mubukule ni kuutwa iye buwonesi, ni Ilomo ya Wele nga lurima lulwaama isi Umwoyo.

¹⁸Ni mwiwaaneyo mu khuloomba busheele mu maani k'Omwoyo, mube meeso nga mubelelela mu khuloombela bakhosefu ba Wele.

¹⁹Ni nase ni munoombelekho, nio nga ninyusa kumunwa kwase khuukanikha, inyoole bilomo bye khuukanikha, indekhe khuba ni buuri khukhwokesana bye shimoonyo she Kamakhuuwa Kamalayi,

²⁰sheesi nakaanisilamo nga umurume uli mu minyololo ta. Ni munoombelekho indekhe khuba umuri mu khuboolela khwase ta, nga ni naakha khukhola.

²¹ Uwe buulebe Tikiko luundi umuyeeti umwiyikinwa mu buraambi bw'Omukasya kana ababoolele byoosi bibimaambakho, nio mumanye nga n'indi ni byeesi ndi khuukhola.

²²Nilwe lomo yino, imurumana isi muli, ababoolele nga ifwe ino ni khuli, naluundi abawandalase kimyoyo kyeenywe.

²³Lukoosi lube isi be buulebe mweesi ni khuukana atweela ni khuufukiilila khukhwaama isi Wele Paapa n'Umukasya Yesu Kristo.

²⁴Bubweela bwa Wele bube khuubo boosi babakana Umukasya weefwe Yesu Kristo ni khuukana khukhukhakama ta.