Read lumasaaba Bafilipi 1 Bible Online

Bafilipi 1 - lumasaaba bible

Bafilipi 1

¹Ibaluwa yino yaama isi ise Paulo, ni Timosewo, babaakaanisi ba Kristo Yesu, nga ingironela inywe bakhosefu ba Wele mu Kristo Yesu, babaali mu Filipi, atweela ni baraangilisi ni babaandu babayeetakho.

²Bubweela ni lukoosi bibyaama isi Wele Paapa weefwe, n'Umukasya Yesu Kristo, bibe ni nanywe.

³Buli lweesi ise imbashebulila inywe, isiima Wele wase khulweenywe mweesi.

⁴Busheele buli lweesi imbaloombela inywe, inoomba ni kumwikhoyo,

⁵khulwe'saambo isi munjeetilemo khusalanisa Kamakhuuwa Kamalayi, khukhwaama makiboole, khukhwoolesa ari.

⁶Ni nase niyikinila ilala ndi, Wele uwananikhisa kumulimo kuno kumulayi mus'iinywe, alikumaliilisa khu shifukhu sha Yesu Kristo.

⁷Busheele ise imbambaasakho mu mwoyo kwase, khulwekhuuba mwetubila atweela mu bweela bwa Wele ni nase, oba nga ndi mu bubowe, namwe nga ndi umulekhuule mu khuboolela ni khukumisa Kamakhuuwa Kamalayi.

⁸Wele niye umujulisi wase mu byeesi inoma ndi imbatsiinikhila inywe mweesi, mu khukana khwa Kristo Yesu.

⁹Ni nakhuno nikhwo khuuloomba khwase ndi, khuukana khweenywe khwilooselatsake naabi, atweela ni khuumanya khwe khukhwawulawo khwoosi.

¹⁰Nio manya munyalise khukhwawulawo bibifuura bulayi, nio munyale khuuba bakwalaafu, namwe babaakhekiitsibwa khu shifukhu sha Kristo ta.

¹¹Khali bulamu bwenywe bwitsusibwile ni bubwilama bubwiitsa khukhwaama isi Yesu Kristo, khulwe shiriifwa ni lubuyi lwa Wele.

¹²Bebuulebe, ingana mumanye muri bibiindu bibyangwakho byeetsa khulwe khubalaayisa Kamakhuuwa Kamalayi.

¹³Ni shishamamo, bubowe bwase bwamanyikha mu basilikhale mu lubili ano osi. Ni babaandu boosi bashimanya nga n'indi umubowe, khulwekhuuba ndi umwakaanisi wa Kristo.

¹⁴Ni khulwe khubowebwa khwase mu mapuusu, khwawandalasa be buulebe bakali mu Mukasya, nio bakila baaba ni kamaani khukanikha ilomo ya Wele, nga sibarya ta.

¹⁵Ne muŋali ndi, balala baboolela bibiwaamba khu Kristo, lwe liibuba ni khulomana, ne babaandi baboolelela mu mwoyo kumulayi.

¹⁶Naluundi bashikhola mu khukana nga bamanyile bari ise nareebwawo ni Wele khulwe khutseeta Kamakhuuwa Kamalayi.

¹⁷Ne babaandi babaaramile ibo si baboola bya ŋali bibiwaamba khu Kristo ta, ne baboola khulwe bitsiilililwa bibiindi. Nga bambaasa bari banyala khulooselakho kimitaambo kyase nga n'indi mu bubowe mu mapuusu.

¹⁸Ne ari shino shimanyisa shiina? Ari musaambo tsoosi, oba mu khuboolela khulwe bitsiilililwa bibiindi, namwe khulwe muŋali, shitweela busa boosi baboolela bilomo bya Kristo. Ni khulwe lomo nyene iyo, ise ndi umusangaafu. Naluundi, ilala kane niloosele khusangaala.

¹⁹Lwekhuuba namanyile ndi khulwe khuloomba khwenywe, ni lwe buyeeti bwenywe bubuwebwa n'Umwoyo wa Yesu Kristo, kane shintsamilemo ise khukangululibwa.

²⁰Ne khuukana khwase khukhweene ni khukhwiyikina bili ndi, indekhe khuwaambibwa tsisoni mu lomo yoosi ta. Naluundi ifune kamaani, indekhe khuba ni khuurya ta, nio Kristo esibwemo shiriifwa bifukhu byoosi, ni ana ari mu mubili kwase, ni mu bulamu, namwe mu khuufwa.

²¹Lwekhuuba is'ise, khuuba umulamu, niye Kristo, ne khuufwa nikhwo kamafuurisa.

²²Ne noola khukhwiloosela khuuba umulamu mu mubili khuloosela khuraamba kumulimo kumulayi, simanya shiina sheesi inyala khurobolawo ta.

²³Indyo nawaambibwiile tsimbeka tsibili, nga ingana khuutsya imbe ni Kristo, shino nga nisho shishiminyisa bulayi.

²⁴Ne shishifuurisa bulayi khulweenywe, nisho shili ndi ise khuuba umuundu umulamu mu bulamu buno.

²⁵Shino nashimanyiile ilala ndi kane iname ni nanywe naluundi kane niloosele. Ni nanywe mweesi muryo mwiloosele ni kumwikhoyo mu khufukiilila.

²⁶Nio shikile nga netsile khuuba ni nanywe luundi, khusangaala khwenywe khwiloosele naabi mu Kristo Yesu.

²⁷Ne ari shishiindu shishifuura bukhulu isho nisho shino; injeenda yeenywe ikwangwaane ni Kamakhuuwa Kamalayi ka Kristo. Nio nyaanga oba netsile khubabona oba s'indiyo ta, ne imbulile bari mu myoyo kyeenywe mwawandalalila mu shitsilililwa shitweela, nga musoolanila atweela mu khufukiilila khwe Kamakhuuwa Kamalayi,

²⁸nga basiku sibabariisa inywe mulomo yoosi ta. Shino kane shibe she khubonelakho isi bali, shiri nibo babaalihela, ne inywe muliwonesebwa. Lwekhuuba Wele umweene niye ubawa inywe bunyali ubwo.

²⁹Khulwekhuuba Wele wabawa inywe tsikhabi khulwa Kristo akhuba khulwe khuubirira mu khumufukiilila shonyene ta, ne ni mu khutaambisibwa khweewe.

³⁰Ari inywe muli atweela ni nase mu khusoolana ukhwo khweesi mwabona lutweela, ni naari khweesi muwulila nga ishisoolana.