Read lumasaaba Bafilipi 2 Bible Online

Bafilipi 2 - lumasaaba bible

Bafilipi 2

¹Noola buulamu bwenywe buwandalasibwa khulwe butweela bweenywe ni Kristo, noola khuukana khweewe khubeesamo inywe kamaani ni butweela bw'Omwoyo, namwe noola khuusaasila ni shiisa,

²ni mwitsusilise isangaalo yase nga mweesi mwaambaasa ni kumwoyo mutweela. Naluundi nga muli ni khuukana khukhufwaanana, luundi mube ni kumwoyo mutweela, nga mwaambaasa shitweela.

³Mu khakhola shishiindu shoosi nga si shiili ndi buli muundu eyinaanakho umweene yenyene ta, namwe khulwe khukhwibuyila busa ta. Ne buli muundu n'abe umuwolu isi uwashe, nga buli muundu abuyila uwashe khukhwiminyisa niye umweene.

⁴Buli muundu akhenaanayo khubyeewe yenyene ta, ne ni enaaneyo khu bye babaandi.

⁵Ni mube ni kumwoyo ukwo nga kweesi Kristo Yesu aaba ni nakwo. Khulwekhuuba:

⁶Akhaba nga Kristo abe mu buli shitweela ali Wele, ne s'eyambaasakho umweene khukhwihanyiinya ari elekhaase ni Wele ta.

⁷Ne eyisa aasi wayila shifwaani sh'omwakaanisi, wekyela nga babaandu ni bali.

⁸Ne nga n'anyoolekhana khuuba mu shifwaani sh'omuundu, umweene weyisa aasi, ni khukhwoolisa khuufwa, khufwila khu musalaba.

⁹Ni lwe lomo yino, Wele wamuniinisa niye mu shifwo she angaaki, wamuwa lisiina lilifuura kamasina koosi,

¹⁰nio akile bibiindu byoosi bye mwikulu ni mu shiibala, ni bye mwiloba aasi, bifukhamilile lisiina lya Yesu.

¹¹Naluundi buli lulimi lurumbule luri Yesu Kristo ali Umukasya, khulwe khukhwiisa shiriifwa mu Wele Paapa.

¹²Nashiryo be buulebe, bakanwa baase, ni mubaatsake babaawulila nga ni mubeele mukhola busheele. Ne akhuba ise nga ise indiyo shonyene ta, ne ari khufuurisa nga ise s'indiyo ta. Inywe mwabeene mwakha khuraambilila buwonesi bwenywe, nga mwokesanisa khuurya ni khukhwisanamo lukoosi.

¹³Lwekhuuba Wele busheele araamba nga abirira mus'iinywe, nga akana inywe muraambe, naluundi mube babawulila sheesi niye umweene akana.

¹⁴Ni mukhole bibiindu byoosi akhali khukhwiŋuluŋuunya namwe khukhaandisana ta,

¹⁵nio mulekhe khubakho ni she khukhwikiitsibwa shoosi ta. Ni mube balayi, nga babaana ba Wele, babaakhalikho likoondo lyoosi ta, akari mu muboolo kuno kukwaborokha naluundi kukukhenaanayo ta. Mweesi mwakha khukhwaburukha mu shiibala nga tsinieniesi ni tsikhosesa likulu,

¹⁶nanywe muryo mubawe bubakha bwe buulamu. Nanywe nga mwakholile muryo, nio nase inyale khukhwibuyila khu shifukhu sheesi Kristo etsilakho, nga imanya indi naakhutima busa ta, namwe nakhukhalaabana busa ta.

¹⁷Akhaba nga kamafuki kaase katsukhiwa nga shiwaanwa khusaayilo, shishaama mu khufukiilila khwenywe, ndi ni kumwikhoyo luundi nasaangaliile atweela ni nanywe mweesi.

¹⁸Ni nanywe muryo, mwakha mube basangaafu, mukabanane kumwikhoyo kwenywe ni nase.

¹⁹Nga Umukasya wakanile, ise isuubila khubarumanila Timosewo, mu bifukhu bibikhali bye aleeyi ta, nio manya nase isangaale mu mwoyo, nga namanyile bibibamakho.

²⁰Ise s'indikho n'umuundu ukuundi uli nga niye, unyala khubenaanakho inywe mu mwoyo kumulayi ta.

²¹Khulwekhuuba buli muundu aweentsa bibyeewe khubweewe, ne akhuba bya Yesu Kristo ta.

²²Inywe mwabeene mwamanya nga Timosewo wamala khukhwiŋaŋasa umweene, nga niye ni nase ni khwakaanisatsaka nga paapa n'umwaana weewe, mu lisiina lye Kamakhuuwa Kamalayi.

²³Nashiryo umweene uyo ise nambaasa khuumurumana wangu, nga naamalile khubona nga bibyase ni bili.

²⁴Ni nase samweene niyikina mu Mukasya, ndi indiitsa isi muli wangu.

²⁵Ne naboone nga shilayi khuubarumanila uwe buulebe Epafurodito. Ali umusaale mu buraambi buno naluundi umusoolani washaase. Ali umurume wenywe esi mwarumana khukhuntsakaanisa ise mu byeesi ingana.

²⁶Lwekhuuba abatsiinikhila naabi inywe mweesi, inywe kumutaambo kwabawaamba khulwekhuuba mwawulila muri ali umulwaale.

²⁷Ni abweene, khulwaala alwaala, ambi afwe, ne Wele amuwaambila shiisa, ne akhuba niye yenyene ta, ne ni nase, khukhumbonisa ise kimitaambo kilekhe khukhwiloosela khu mitaambo kikiindi.

²⁸Nashiryo nakanile naabi khumurumana isi muli, nio nga mwamuboone mube ni kumwikhoyo. Ni nase inyale khubombesa khu mutaambo kwase.

²⁹Aso, ni mumwakaanile nga uwe buulebe mu Mukasya, ni kumwikhoyo kumukali. Luundi babaandu babafwaana nga yuno ari ni mubesaatsakemo lukoosi.

³⁰Lwekhuuba ataambakho khafwiiti afwe khulwe kumulimo kwa Kristo, nga s'enaanayo khulwe buulamu bweewe ta, nio atabuse abe inywe byeesi mukhanyala khukhola ta.