Read lumasaaba Bafilipi 3 Bible Online

Bafilipi 3 - lumasaaba bible

Bafilipi 3

¹Shimaliilisi be buulebe, ni mwikhoyele mu Mukasya. Ise seshiinduyisa khukhwilaŋanamo khubaronela bibiindu nibyo bitweela ta, ne shili she khubawonesa inywe.

²Ni mwiliinde tsiimbwa itso, ni buraambi bwatsyo buubi. Ni mwiliinde ibo babaakhala kumubili.

³Khulwekhuuba ifwe nibo babenjila imbalu iya ŋali, babesaaya Wele mu mwoyo, luundi babekhoyela mu Kristo Yesu, nga sikhuli ni khukhwiyikina mu mubili ta.

⁴Ikhaba nga ise samweene nandinyalile khuuba ni khukhwiyikina mu mubili, ne umuundu yeesi n'ambaasa khukhwiyikina kumubili, ise imufuurisa.

⁵Ise nengila imbalu khu shifukhu she shinaane. Indi umusaalikhana uwe mu shikuuka sha Isiraeli, uwe muunda iya Benyamini. Indi Umuheburaniya, urura mu ba Heburaniya. Mu bye khuliinda kamakaambila, naba Umufarisaayo.

⁶Khulwe khuukana naabi bye kamakaambila, ise nataambisatsaka babaandu ba Wele, ni lwe bukhosefu bwe kamakaambila, nabonekha nga indi umuundu umulayi.

⁷Ne ibyo byoosi bibyabonekha nga bye kamafuurisa is'indi, nabibala nga khufiilwa khulwe bulayi bwa Kristo.

⁸Bibiindu byoosi nabibala nga khufiilwa khulwe bulayi bubiririfu, bubuuli mu khumanya Kristo Yesu, Umukasya wase. Khulw'omweene uyo, nafiilwa bibiindu byoosi. Nabibala nga kamaandu ke buumbi, nio inyoole kamafuurisa niko Kristo.

⁹Naluundi inyolekhe nga ndi mu niye ilala, nga s'indi ni bukwalaafu bubwase bubwiitsa lwe khulondelela kamakaambila busa ta, ne khurusakho ubwo bubwiitsa khulwe khufukiilila mu Kristo. Bukwalaafu ubwo bubwama isi Wele, naluundi nga bwayimikha khu khufukiilila.

¹⁰Ise sheesi ngana nikhwo khumanya Kristo, ni kamaani ke khulamukha khweewe khukhwaama mu bafu, ni butweela bwe khukabananila atweela mu butsiina bweewe. Naluundi khukalukha khuuba nga Kristo, mu khufwa khweewe,

¹¹ni khukhwiyikina ndi noole khu khulamukha khwe khurura mu bafu.

¹²Ise s'inoma indi naamala khaale khunyoola sheesi ise ingana ta, namwe ndi naamala khaale khuukalusibwa khuuba umulayi ta. Ne ikhakakho ndi nio inyoole isho sheesi Kristo Yesu aambiikhila ise.

¹³Bebuulebe, ise samweene sinambaasa ndi naamala khaale khukhwoola khu sheesi ingana ta. Ne shishiindu shitweela sheesi ikhola nikhwo khukhwibilila bye mukoongo, n'enga ikhakakho naabi khukhwoola khw'isho shishiili iburaangisi.

¹⁴Ikhakakho naabi noole khu shitsilililwa, nga nikhwo khunyoola shiwaanwa she khulaangibwa khwa Wele, khukhuuli mu Kristo Yesu, khwe buulamu bwe mu ngaaki.

¹⁵Nashiryo, ifwe fweesi khukhuuli bakhulu mu bye kumwoyo, khakhufukiilisane khuryo. Ne nibawo babambaasa shishiindu sha buraawa khukhwaama khu shino, Wele alibabimbulila mu shino.

¹⁶Ne isho sheesi khumalile khukhwoolakho, khayo khukyendele mu sheene isho.

¹⁷Bebuulebe, mweesitsana ni mwiyikile khu she khuubonelakho shase. Ni muyile she khuubonelakho sh'abo babaakhola baryo nga baloondelela ifwe sheesi khwakhola.

¹⁸Khulwekhuuba nga busheele ise ni mbaboolatsakila, luundi ari imbaboolela nga indila kamasika, ndi bakali bamenya nga basiku be kumusalaba kwa Kristo.

¹⁹Babeene abo, intsakamilo yaabwe nikhwo khuhela, ni wele waabwe niyo inda yaabwe. Ni shiriifwa shaabwe shili mu bye tsisoni byaabwe. Ni bibyambaaso byaabwe bili khu biindu bye mu shiibala.

²⁰Ne ifwe iweefwe niyo mwikulu. Naluundi khuliindiilila umuwonesi, Umukasya Yesu Kristo, khukhwaama ibweene iyo.

²¹Kristo uyo, khulwe kamaani kakamunyalisisa khuura bibiindu byoosi aasi e buwuli bweewe, alikalusa kimibili kyeefwe kino kimitoro naluundi kikifwa, kifwaanane ni kumubili kweewe kwe shiriifwa.