Read lumasaaba Bafilipi 4 Bible Online

Bafilipi 4 - lumasaaba bible

Bafilipi 4

¹Nashiryo be buulebe baase, inywe beesi ingana naluundi beesi intsiinikhanila, inywe mumuuli kumwikhoyo kwase naluundi ikuutwa yase, ni mwiime nga mwawandalaliile mu Mukasya, bakanwa baase.

²Nikontseleele Ewudio ni Sutike, ndi bafukiilisane mu Mukasya.

³Ikhuloomba ni nawe umwakaanisi washase uwe ilala, ndi n'uyeete bakhasi bano, bababeele nga baraambila atweela ni nase, mu khusalanisa Kamakhuuwa Kamalayi. Ni khutubakho ni Kelementi, ni babakaanisi bashaase babaramile boosi, babaali ni kamasina kaabwe nga karonebwa mu burone bwa Wele, bwe buulamu.

⁴Ni mwikhoyatsakile mu Mukasya busheele; naluundi inoma ndi ni mwikhoye.

⁵Kha buwolu bwenywe bumanyikhe isi babaandu boosi. Umukasya ali aambi khukobola.

⁶Mukheyembelelatsaka khulwe lomo yoosi ta, ne mu buli lomo yoosi, ni mukiboolatsakile Wele mu khuloomba, ni mu khwikontselela, atweela ni khusiima.

⁷Ni lukoosi lwa Wele lulufuura khuumanya khw'omuundu khwoosi, luliinde kimyoyo kyeenywe, ni bibyambaaso byeenywe bibe mu Kristo Yesu.

⁸Ni shishakamayo be buulebe, bibiindu bya ŋali byoosi, bye shiriifwa byoosi, bye bubwilama byoosi, bibikhalikho lisaanda lyoosi, bibibonekha bulayi byoosi, bibilomebwakho bulayi byoosi, noola iliwo shishiindu shishifuurira ilala, noola iliwo shishaakhilwa khubuyilibwa, ni mwaambaasatsake khu biindu nga bino.

⁹Bibiindu ibyo byoosi byeesi baamala khaale khubaleekela, namwe byeesi mwanyoola, namwe byeesi mwawulila khukhwaama is'ise, ni byeesi mwabona mus'iise, ni mubikhole. Ni Wele uwe lukoosi kane abatsake ni nanywe.

¹⁰Ise nikhoyela naabi mu Mukasya, khulwekhuuba lwanyuma lwe mbuka indeeyi, luundi ndi mwokesanile muri muntsinaanayo. Ilala, mubeele nga mwinaanayo, ne simwaba ni mbuka khushokesanisa ta.

¹¹Inoma shino akhuba ndi lwekhuuba nataambile ta, ne lwekhuuba namala khukhwiyika khuuba nga buli shiindu shoosi sheesi imba ni nasho shimala.

¹²Naamanya nga ni shifwaana khuuba mu butaambi, naluundi naamanya nga ni shifwaana khuuba ni bikali. Nayiyika shimoonyo she khuuba mu buli mbuka yoosi, na buli osi esi mba, oba imba nekurire, namwe nga ndi intsala, oba ndi n'abikali, namwe nga ndi na bifwiiti, shoosi shimala.

¹³Ise inyalisa khukhola byoosi khuubirira m'uyo uwamandalasa.

¹⁴Ne mwakhola bulayi khukhunjeeta ise mu bihangafu byase.

¹⁵Inywe Bafilipi mwabeene mwamanya bulayi muri khukhwaama khu bifukhu bibyanyoowa byeesi mwafukiilisilamo Kamakhuuwa Kamalayi, nga ni naama i Masedoniya, imbaawo bafukiilisi babaandi mu Kristo babatubaana ni nase mu khuwana namwe mu khwakaanila ta, khurusakho inywe mwenyene.

¹⁶Khulwekhuuba nga ni naba mu Sesalonika, mwantsakaanisa byeesi nakana, khubirisa mu muluundi mutweela.

¹⁷Akhuba indi ise ingana naabi biwaanwa ta, ne ingana khubona bibyaano bibiloosela khu bukali bwenywe.

¹⁸Ise namalile khufuna bibiindu byoosi, ni khuminyisakho. Ni nase ari byaamalile, lwanyuma lwe khufuna khukhwaama isi Epafurodito biwaanwa byeesi mwakaanisile. Bili biwaanwa bibiwunya isilikakha indayi, shiwaanwa shishiwongebwayo, sheesi Wele afukiilisa.

¹⁹Ni Wele wase kane olelese byeesi mukana, khulwe shiriifwa shishiili mu Kristo Yesu.

²⁰Shiriifwa shibe isi Paapa Wele weefwe, biilo ni biilo. Amiina.

²¹Ni musheese bakhosefu ba Wele boosi mu Kristo Yesu. Balebe babaali ni nase baabasheesele.

²²Bakhosefu ba Wele boosi babaali ano baabasheesele, ni khufuura abo babaali mu lumako lwa Kayisaali.

²³Bubweela bw'Omukasya weefwe Yesu Kristo, bube ni nanywe mweesi. Amiina.