Read lumasaaba Bakolosaayi 1 Bible Online

Bakolosaayi 1 - lumasaaba bible

Bakolosaayi 1

¹Ibaluwa yino yaama isi ise Paulo, umurume uwa Kristo Yesu, khulwe khuukana khwa Wele. Naluundi n'isi Timosewo, uwe buulebe weefwe.

²Khukironela bakhosefu ba Wele be mu Kolosaayi, bafukiilisi babeyikinwa mu Kristo. Bubweela ni lukoosi bibyaama isi Wele Paapa weefwe, bibe isi muli.

³Busheele ni khuba nga khubaloombela, khusiima Wele, Paapa w'Omukasya weefwe Yesu Kristo.

⁴Lwekhuuba khwaawulila khu biwaamba khufukiilila khweenywe, mu Kristo Yesu, ni khuukana khweesi muli ni nakhwo, isi bakhosefu ba Wele boosi.

⁵Khuufukiilila ni khuukana ukhwo bibyaama mu mwiyikino kukwababiikhibwila bulayi mwikulu. Naluundi mwaamala khaale khushiwulilakho mu burume bwa ŋali, nga nibwo Kamakhuuwa Kamalayi kakaboolakho.

⁶Kamakhuuwa Kamalayi kano kalikho kaama bibyaamo, luundi kelooselela ilala khubalaayisibwa mu shiibala shoosi. Nga ni kabeele mus'iinywe khukhwaama khu shifukhu sheesi mwakawulililakho, naluundi mwofwasa bubweela bwa Wele mu bwa ŋali bwabwo bwoosi.

⁷Ne bino mwabiiyika khukhwaama khu Epafura, umwakaanisi washeefwe esi khukana. Niye ali umuraambi umwiyikinwa uwa Kristo khulweefwe.

⁸Niye waakhuboolela ifwe khu khukana khweesi muli ni nakhwo isi ifwe, khweesi Umwoyo abawa.

⁹Ni lwe lomo yino, khukhwaama khu shifukhu khweesi khwawulilakho bibibawaambakho, ifwe sikhwalekhatsakayo khuubaloombela inywe ta. Nga khuloomba khuri Wele abetsuse inywe ni khuumanya byeesi akana, naluundi khuri mube ni kamakyesi mu khumanya khweesi Umwoyo abawa.

¹⁰Naluundi khuloomba khuryo khuri nio manya mumanye buulamu bweesi Umukasya akana, naluundi mu buli isaambo, mukhole biilayi bibiimwikhoyesa nga mutsowela mu khumanya khwa Wele.

¹¹Muhaandalasibwe ni kamaani koosi kakaama isi Umukasya, mu shiriifwa sheewe nga ni shili, nio manya mube ni khukhunyindaalila ni khukhwikhalilikha. Muryo mube ni kumwikhoyo,

¹²nga musiima Paapa uwabatsowesa khukabananila atweela mu busikha bwe bakhosefu ba Wele, mu buyiinga bwe buwaanga.

¹³Wele wakhuwonesa ifwe khukhwaama mu bunyala bwe shishilima, wakhukalusa ifwe wakhureera mu buyiinga bw'Omwaana weewe, umukanwa.

¹⁴Umweene uyo wakhureerera ifwe buwonesi, nga akhwiyakhila bibyoonako byeefwe.

¹⁵Kristo niye shifwaani shisheene shishibonekha sha Wele, nga niye umukiboole mu bibuumbe byoosi.

¹⁶Lwekhuuba khuubirira mu niye, Wele abuumba bibiindu byoosi, bibiili mwikulu ni khu shiibala; bibiibonekha, ni bibikhabonekha ta. Nga mubweene umwo mulimo bitsoloŋo ni bukasya, ni bawuli, ni be bunyala. Bibiindu byoosi byabuumbibwa ni naye naluundi byabuumbibwa khulweewe.

¹⁷Niye aabawo nga bibiindu byoosi bishiili khubawo ta. Ni bibiindu byoosi bitubaanila atweela mu niye.

¹⁸Niye ali kumurwe kwe babaandu ba Wele bafukiilisi. Niye ali bunanikhilo naluundi niye ali umukiboole uwalamusibwa khukhwaama mu bafu, nio akile mu biindu byoosi niye yenyene ayile shiifwo shishinyoowa.

¹⁹Lwekhuuba Wele umweene shamwikhoyesa khukhalawo ari bubwitsufu bubweene bwoosi bubonekhele mu mwaana.

²⁰Naluundi khuubirira mu Kristo, Wele akobosawo busaale akari we shibala ni naye umweene. Bibiindu byoosi bibiili mu shiibala namwe bibiili mwikulu, abiisa isi umweene ali, nga areera lukoosi khu lwe kamafuki k'Omwaana weewe, kakatsutsukhila khu musalaba.

²¹Ni nanywe mwabeene khaale mwaba abe mwayawukha khukhwaama khu Wele, luundi nga muli basiku beewe, mu myoyo kyeenywe, khulwe buraambi bwenywe buubi.

²²Ne ari Wele wakobosawo busaale isi umweene ali, mu mubili kwa Kristo, khuubirira mu khufwa. Nio akile abareere mu moni tseewe nga muli bakhosefu, nga simulikho ni likoondo lyoosi ta, naluundi nga simulikho ni sheesi Wele anyala wabeekiitsamo ta.

²³Mube nga mwiloosela mu khufukiilila khwenywe, khukhuuli kumusiinji kwe kamaani, naluundi kumuhandalafu. Akhuba babayilibwa ino ni naayi ta, ne murame nga mwiyikina Kamakhuuwa Kamalayi keesi mwawulila. Kano niko Kamakhuuwa Kamalayi keesi baboolela bibuumbe byoosi, mu shiibala shoosi aasi e likulu. Ni nase Paulo nakalusibwa khuuba umwakaanisi uwe kamakhuuwa ako.

²⁴Ni aluno ari ise isangaala khulwe khuubona ndi intsiinisibwa khulweenywe. Ni khulwe khuutsiinisibwa khwe mu mubili kwase, injeeta khuumalilisa khutsiinisibwa khwa Kristo khukhwarama, khulwe kumubili kweewe, nibo babaandu ba Wele babafukiilila.

²⁵Ise nayikyela umwakaanisi uwe bafukiilisi ba Wele, khulwekhuuba Wele niye uwamaambisa kumulimo kuno. Kumulimo kweesi Wele aamba khulweenywe, nikwo kwe khuuboolela Kamakhuuwa Kamalayi mu bwitsufu.

²⁶Naluundi khumanyisa shimoonyo abe shishabisibwa khukhwaama khaale ni khaale, ne ari Wele washokesanisa isi bakhosefu beewe.

²⁷Babaandu bano nibo beesi Wele aarobola khukhwaama mu Banaambo, ari abamanyise shimoonyo she buyiindifu bwe shiriifwa. Shimoonyo shino nisho shili Kristo mus'iinywe, nga niye kumwiyikino kwe khufuna shiriifwa.

²⁸Uyo niye uwehaanayo, isi ifwe khuboolelakho, nga khureewula buli muundu, luundi khuleekela buli mutweela mu makyesi koosi, nio khunyale khureera buli mutweela mu moni tsa Wele, nga ilala umuhandalafu mu Kristo.

²⁹Khulwa shino intitiikhana, nga inaamba ni kamaani koosi ka Kristo kakaraambila mus'iise.