Read lumasaaba Bakolosaayi 2 Bible Online

Bakolosaayi 2 - lumasaaba bible

Bakolosaayi 2

¹Ise ingana inywe mumanye khuurekana khweesi indekanamo khulweenywe, ni khulwe babaandu be mu Lawodikiya, ni khulw'abo babaashiili khukhumbonakho ise ni tsimoni tsaabwe ta.

²Shitsilililwa shase shili ndi bawandalasibwe mu mwoyo, babe mu butweela, mu khukanana, nio akile babe ni buyiindifu mu khumanya bulayi shimoonyo sha Wele, sheesi abimbula, nga nisho Kristo.

³Mu Kristo, nimwo mweesi buyiindifu bwoosi bwe kamakyesi ni khumanya, biibisile.

⁴Ni nase imbaboolela shino ndi nio manya mulekhe khuwoombesebwa n'umuundu yeesi ta, mu khukhaandisana ni bilomo bye bubeeyi.

⁵Khulwekhuuba akhaba nga s'indi ni nanywe mu mubili ta, ne indi ni nanywe mu mwoyo. Naluundi nikhoya khubona nga bibiindu byawaambiwile bulayi, ni khufukiilila khwenywe mu Kristo nga ni khulikho khuwandalasibwa.

⁶Ne khukhwaama nga ni mwafukiilila Kristo Yesu nga Umukasya, ni mwiloosele khuumenya mu niye.

⁷Ni mwikhise kimili kyeenywe mu Kristo, naluundi mwombakhe buulamu bweenywe mu niye. Mutsowe ni kamaani mu khufukiilila khweenywe, nga esi baabaleekela, luundi nga mwetsuule ni khuusiima.

⁸Ne ni mwitsililise, umuundu yeesi alekhe khubekyelisa babowe khulwe bibyambaaso bye bubeeyi, bibyaama mu makyesi k'omuundu kakaama mundeekela iye bibiindu bikhale ta, ni kamakyesi ke mu shiibala kakakhali ka Kristo ta.

⁹Lwekhuuba mu Kristo nimwo mumuuli bubwitsufu bwe bwa Wele, nga bubonekhela mu mubili.

¹⁰Naluundi khuubirira mu Kristo inywe mwaweebwa bubwitsufu bwe buulamu nga niye umweene kumurwe kwe bye buwuli byoosi ni bunyala bwoosi.

¹¹Khuubirira mu Kristo, nanywe nywe babenjila imbalu, akhuba ni khukhebebwa khukhukholebwa ni kamakhono ke babaandu ta, ne khukhebebwa khukhukholebwa ni Kristo, mwarusibwakho kamaani ke shishonako.

¹²Lwekhuuba nga ni mwapyeluusibwa, mwasiikhibwila atweela ni Kristo. Lwanyuma mwalamusibwila atweela ni naye, khulwe khufukiilila khwenywe, khuubirira mu maani ka Wele, uwalamusa Kristo khukhwaama mu bafu.

¹³Ne inywe mumwaba baafu khulwe khukhwoneka khwenywe, ni khulwe khulekha khwinjila imbalu mu mubili ta, ari Wele wabekyelisa balamu atweela ni Kristo umweene. Wele akhwiyakhila ifwe bibyoonako byeefwe byoosi.

¹⁴Wakhalamo indakaano iyakholebwa mu makaambila kaakhukhingilila ifwe. Aryo, waabirusawo byoosi waabiyila waabitsaangilila khu musalaba.

¹⁵Nga n'amala khuuwulila ilala buwuli bwe kamaani ke shishilima ni be bunyala, wabikyelisa she khubonelakho sha lubuula, nga abiwulila mu khuwula khwe kumusalaba.

¹⁶Nashiryo mukhafukiilisa umuundu yeesi khubawa kamakaambila mu byeesi mwakha mwalya, namwe byeesi mwakha mwanywa ta. Namwe umuundu akhabawa kamakaambila mu bilomo bye khuliinda bifukhu bikhosefu, nga bye kumweesi kumushaakha, namwe bye shifukhu sha Sabato ta.

¹⁷Bino byoosi byaba bibiniini busa bye bibiindu ibyo bibyaba nga bitsya khwiitsa. Ne shishiindu shisheene nisho Kristo.

¹⁸Mukhafukiilisatsaka umuundu yeesi uwiyambaasakho khuuba nga niye uwe angaaki, khulwe khubonekhelwa khwa buraawa ta. Namwe khukhwisaaya bamalayika khukhabarusa khu shitsilililwa sheenywe ta. Umuundu ufwaanana aryo, eniinisa khulwe khukhwaambaasa khwe kamakyesi k'omuundu busa.

¹⁹Umuundu uyo aba wakhwihamba khu Kristo ta. Kristo niye kumurwe kwe kumubili, kukwiimisawo byoosi, naluundi kukuhambanisa atweela kimikotyo ni tsinyama, byatsowa nga Wele umweene niye ubitsowesa.

²⁰Ne noola inywe mwafwa ni Kristo, mwekaana kimyoyo kikiwula shiibala, lwashiina ndi mumenya nga babaandu be mu shiibala? Lwashiina muwulibwa ni kamakaambila nga kakaloma kari:

²¹“Mukhahambakho khu shiindu isho ta,” “Isho mukhakhoombakho ta,” namwe “Mukhatiilakho khu shiindu ta?”

²²Bino byoosi biwaamba khu biindu bibiwawo, lwanyuma lwe khubiraambisa khusintsiila khu makaambila ni indeekela iye babaandu.

²³Bye kamakaambila nga kano bibonekha nga bye kamakyesi, musaambo yeesi bihanyiinyamo khukhwisaaya. Khukhwiyisa aasi khwe bubeeyi, ni khutsiinisa khwe kumubili ne nga muŋali sibanyala khuyeeta mu khuliinda kumubili, khulekha khukhasikhila mu khwiwuuma khwe bye kumubili ta.