Read lumasaaba Bakolosaayi 3 Bible Online

Bakolosaayi 3 - lumasaaba bible

Bakolosaayi 3

¹Ni nanywe noola mwalamusibwa ni Kristo khukhwaama mu bafu, ni mure kimyoyo kyeenywe khu biindu bye mwikulu, isi Kristo ekhaale khu mukhono kumulayi kwa Wele.

²Ni mure bibyambaaso byeenywe khu biindu bye mwikulu, akhuba khu biindu bye mu shiibala ta.

³Khulwekhuuba buulamu bweenywe bwaafwa, ne ari mwaabisibwa atweela ni Kristo, mu Wele.

⁴Kristo nga niye buulamu bweenywe bubweene, n'alibonekha, ni nanywe muryo mulibonekhela atweela ni naye, mukabane khu shiriifwa sheewe.

⁵Ne nashiryo ni mwiire khuukana khwe kumubili khukhuuli mus'iinywe, nga buyeyani, bunyaalu, lukhobe, khukhwiwuuma khwe tsisoni, ni kumuluungo. Lwekhuuba kumuluungo nasho shili nga khukhwisaaya bifwaani.

⁶Khulwe bibiindu nga bino, lirima lya Wele liitsila ibo babamumiinyaalila.

⁷Inywe mwabeene khaale mwabatsaka mu bulamu bwe isaambo nga yino, ni mwamenyatsaka ni nabyo.

⁸Ne ari nga babaloondelela Kristo, mwakha mwiyabulile ilala bibiindu nga bino: lirima, khukhwilihaasa, liibuba, khukhomyaasa. Naluundi inganikha iye tsisoni, ikhaama mukhanwa mwenywe ta.

⁹Mukhawombesana mwenyene na mwenyene ta. Khulwekhuuba mwayiyabula buulamu bukhale ni bye tsisaambo tsabwo.

¹⁰Ne ari mwakwaarire umuundu umushakha, wutsya nga ashuusibwa busheele mu makyesi ke shifwaani sh'omubuumbi.

¹¹Ni lwashino, imbaawo lulwakha akari wo Muyonaani n'Umuyudaaya ta. Ni akari wo mu Isiraeli n'umunaambo ta. Naluundi imbaawo Umunaambo namwe uyo uwibirisaka ni burafu, mbaawo umuundu umukulwa namwe umulekhuule busa ta, khurusakho ndi Kristo niye byoosi luundi mu boosi.

¹²Nashiryo nga babaandu ba Wele barobole, babaali bakhosefu luundi beesi niye akana naabi, ni mukwaarisibwe ni khutsiinikhila babaandi. Mube be shiisa, bawolu, basile, luundi babekhalilikhi.

¹³Ni mwikhaliilikhane mwenyene na mwenyene, naluundi mwiyakhanile singa umuundu yeesi aba n'ilomo iye khu khwiŋuluŋuunya is'ukuundi. Ni mwiyakhanile nga Umukasya n'abeyakhila inywe.

¹⁴Ne khu ibyo byoosi ni murekho khukana, lwekhuuba khukana nikhwo khukhubowela ilala bibiindu byoosi atweela.

¹⁵Ni mulekhe lukoosi lwa Kristo luwule mu myoyo kyeenywe. Khulwekhuuba inywe mwalaangibwa mu lukoosi luno, khuuba bisiintsa bye kumubili mutweela. Naluundi mwitsusibwe ni khusiima.

¹⁶Ni mulekhe ni shilomo sha Kristo shimenye mus'iinywe, mu buyiindifu bwasho, nga muleekanila luundi nga muwaana kamakhula, mu makyesi koosi. Ni mwiimbe tsizabuli, ni tsinyimbo, ni kimyeenya kimikhosefu, nga mwimbila Wele ni khusiima mu myoyo kyeenywe.

¹⁷Ne byoosi byeesi mukhola, khayo bibe mu shilomo, namwe mu bikholwa. Byoosi ni mubikhole mu lisiina ly'Omukasya Yesu, nga muwaanayo khusiima isi Wele Paapa, khuubirira mu Kristo.

¹⁸Inywe bakhasi ni muwulilatsake baseetsa beenywe, khulwekhuuba isho nisho shishaakhila mu Mukasya.

¹⁹Ni nanywe baseetsa ni mukanaatsake bakhasi beenywe. Mukhabarafiyilakila ta.

²⁰Ni nanywe babaana ni muwulilatsake basaali beenywe mu saambo tsoosi, khulwekhuuba shino nisho shishikhoyesa Umukasya.

²¹Nanywe basaali mukhakhalasatsaka babaana beenywe ta, lwekhuuba lukana banyala bawamo kamaani.

²²Inywe bakulwa ni muwulilatsake babaandu babaali bakoosi beenywe be mu shiibala mu buli lomo yoosi. Akhuba ndi babaloleelela shonyene khulwe khubekhoyesa ta, ne ni mushikhole ni kumwoyo kwa ŋali, khulwekhuuba murya Umukasya.

²³Mu buli shoosi sheesi mukhola, ni mukhole ni kumwoyo mutweela, nga babaraamba khulw'Omukasya, ne akhuba indi khulwe babaandu ta.

²⁴Khulwekhuuba ni mumanye muri, mulinyoola kumukheemba khukhwaama isi Umukasya, nga shiwaanwa khulwe buraambi. Khulwekhuuba Umukasya Kristo niye isi mwakaanisa.

²⁵Ni nooyo uwibirisa buubi yeesi, alisasulibwa nga buraambi bweewe buubi ni buli, lwekhuuba Wele ayila buli muundu nga n'ali. Imbaawo khukhwimiinila luwaande lutweela ta.