Read lumasaaba Bakolosaayi 4 Bible Online

Bakolosaayi 4 - lumasaaba bible

Bakolosaayi 4

¹Ni nanywe bakoosi ni mubirise bakulwa beenywe bulayi, nga ni shaakhila, nga nanywe mumanya muri muli n'umukoosi wenywe mwikulu.

²Ni murabilatsake mu khuloomba, mube meeso naluundi nga musiima.

³Ni nafwe mukhuloombele nga mwikontselela Wele, khukhwikulilawo ifwe kumukhoosi kwe khuuboolela buurume bwe shimoonyo sha Kristo, bubwakila ise naaba mu mapuusu.

⁴Ni munoombele ise nio manya nanyala khuuboolela lubuula, nga ni naakha khuukhola.

⁵Ni mube ni kamakyesi musaambo isi mwibirisamo, isi babaandu be bulafu, nga muraambisa bulayi ikhabi yoosi isi muba ni nayo.

⁶Inganikha yeenywe busheele khayo ibaatsake iye bubweela, nga ilimo itsamu, nio munyale khumanya nga ni munyala khukobolamo umuundu yeesi bulayi.

⁷ Tikiko alibaboolela byoosi bibiimambakho. Niye ali uwe buulebe weefwe isi khukana, umwakaanisi umwiyikinwa, luundi umuraambi uwasheefwe mu Mukasya.

⁸Naamurumanile is'inywe muli ndi ababoolele byoosi bibiikhuwaamba khus'ifwe, naluundi abawandalase kimyoyo kyeenywe.

⁹Niye alikhukhwiitsa ni Onesimo, umufukiilisi uwe buulebe weefwe umwiyikinwa, naluundi umukanwa. Naye ali mutweela khus'inywe. Kane bababoolele byoosi bibiili ino.

¹⁰Arisitaluko, uli umubowe washase, wabasheesele. Ni Mako, wandaaye wa Balunaba, naye wabasheesele. Mwamala khaale khuboolelwa bibimuwaambakho, nga wolele isi muli, ni mumwakaanile bulayi.

¹¹Ni Yesua ulaangibwa Yusito, naye wabasheesa. Bano bonyene nibo babaali Bayudaaya bafukiilisi, babaraamba ni nase khulwe Buyiinga bwa Wele. Babeene bano banjeetile ise naabi.

¹²Epafura naye mutweela khus'inywe luundi umwakaanisi uwa Yesu Kristo, naye waabasheesa. Niye waarabila khuubaloombela inywe, nga ekoontselela Wele ari khali mwimile nga muli bakumu mu khukana khwa Wele. Naluundi ari mube babaakhatengaasibwa ta.

¹³Nashiryo ise imbaŋaŋasa nga n'ali umuraambi uwe kamaani khulweenywe, ni khulw'abo babaali mu Lawodikiya, ni nabo babaali mu Hiliapolisi

¹⁴Luka umukaangi weefwe umukanwa ni Demasi, nabo babasheesele.

¹⁵Ni musheesele be buulebe babaali mu Lawodikiya, musheesele ni Niifa, ni babafukiilisa mu Kristo boosi, babaabuusanila mu ntsu yeewe.

¹⁶Ne nga bamalile khubasomela ibaluwa yino, ni mubone muri basomela ni bafukiilisi mu Kristo, babaali i Lawodikiya. Ni nanywe mubone muri musoma ibaluwa iyaama i Lawodikiya.

¹⁷Ni muboolele Alikipo muri, “Bona uri wolelesa kumulimo kukwakhuwebwa kw'Omukasya.”

¹⁸Ise Paulo imbaronela khuusheesa khuno, ni kumukhono kwase kumweene. Ni mushebulile muri ndi umubowe. Bubweela bwa Wele bube ni nanywe.