Read lumasaaba 1 Basesalonika 1 Bible Online

1 Basesalonika 1 - lumasaaba bible

1 Basesalonika 1

¹Ibaluwa yino yaama isiise Paulo ni Silasi ni Timosewo; nga khubaronela inywe bafukiilisi mu Yesu be mu Sesalonika, babaali ba Wele Paapa n'Umukasya Yesu Kristo. Bubweela ni lukoosi bibe ni nanywe.

²Ifwe khusiima Wele busheele khulweenywe mweesi, nga khubalomakho mu khuloomba khweefwe.

³Buli busheele mu moni tsa Wele weefwe, khushebulila buraambi bweenywe bubwama mu khufukiilila, ni khuukana khweenywe, mwiibyo byeesi mukhola ni kamaani, ni kumwiyikino kweenywe mu Mukasya weefwe Yesu Kristo nga ni kuli kwe khurabila.

⁴Bebuulebe, ifwe khwaamanya khuri, Wele abakana inywe, luundi waabarobola inywe khuuba babeewe babeene.

⁵Lwekhuuba Kamakhuuwa keefwe Kamalayi shikareerebwa isi muli mu bilomo byonyene ta, ne Kamakhuuwa ako ketsila ni mu maani, luundi mu Mwoyo Umukhosefu, ni mukhuŋaŋasa khukhwitsufu. Ni nanywe mwakhumanya nga ifwe ni khuli, nga ni khwaba akari mus'iinywe lwe bulayi bweenywe.

⁶Ni nanywe mwakhakakho khukhwiyikila khusiifwe ni khu Mukasya, ikhaba nga yabawo khutaambisibwa khukali, mwakaanila buurume ni kumwikhoyo kw'Omwoyo Umukhosefu.

⁷Muryo mwekyela she khubonelakho isi bafukiilisi boosi be mu Masedoniya ni be mu Akaya.

⁸Buurume bw'Omukasya bubwaama isiinywe sibwawulilikha mu Masedoniya ni mu Akaya mwonyene ta, ne ni khufukiilila khweenywe mu Wele, khwafuma buli andu osi. Nashiryo, ifwe sikhunyala khwashilomakho shishiindu shoosi ta.

⁹Lwekhuuba nibo babeene baboola bibiwaamba khusiifwe, isaambo yeesi mwakhwakaanilamo, nga ifwe ni khwaba ni nanywe, naluundi nga ni mwashuukha mweela isi Wele nga mulekha bifwaani, muri nio mwakaanise Wele Umulamu luundi uwa ŋali.

¹⁰Ni khuliindilila Umwaana weewe, khukhwaama mwikulu esi alamusa mu bafu, niye Yesu, ukhuwonesa ifwe khukhwaama mu lirima lilikho liitsa.