Read lumasaaba 1 Basesalonika 2 Bible Online

1 Basesalonika 2 - lumasaaba bible

1 Basesalonika 2

¹Inywe be buulebe, mwamanya muri khukyeniya khweefwe isi muli sikhwaba khwabusa ta.

²Nga ni mumanyile khwaba khwaamalile khaale khutaambisibwa ni khukhomebwela mu Filipi, ne lwe Kamaani ka Wele khwababoolela Kamakhuuwa Kamalayi, ikhaba nga yabawo khukhaandisana khukali.

³Lwekhuuba khukaambila khweefwe sikhuli khukhwaama mu khuborokha ta, namwe khwe bibyambaaso binyaalu ta; namwe ifwe sikhwipalapatsa ta.

⁴Ne ifwe khukanikha nga babaandu babaamala khufukiilisibwa ni Wele, wakhubiikhisa ifwe Kamakhuuwa Kamalayi. Ifwe sikhukhakakho khukhwikhoyesa babaandu ta, ne khwikhoyesa Wele, ukhakilisa kimyoyo kyeefwe.

⁵Inywe mwamanya bulayi muri ifwe sikhwaraambisakho lulimi lulubawombelesa inywe ta, namwe khuraambisa bilomo bye khubisilisa kumuluungo kweefwe ta. Wele niye umujulilwa weefwe.

⁶Ifwe sikhwaweentsa she khuloma khuri umuundu yeesi akhuruuye ifwe ta, oba khukhwaama isi muli, namwe khukhwaama isi babaandu babaandi ta.

⁷Khulwekhuuba khukhwaama nga ni khuli baarume ba Kristo, khali ifwe khwabatwiikha inywe buusiro. Ne khwaba bawolu akari mus'iinywe, nga maayi umusaali umweene natembelesa babaana beewe.

⁸Ni nafwe khuryo khwabakana naabi, khwaba berekefu khukabanana ni nanywe akhuba Kamakhuuwa Kamalayi kakaama isi Wele konyene ta, ne ni bulamu bweefwe bubweene, lwekhuuba inywe mwekyelila ilala basaale beefwe.

⁹Ilala be buulebe mushebulila muri, mu bwakaanisi bweefwe ni khukhalaabana, khwaraambatsaka shiilo ni kumuusi, nio khulekhe khubasitowelela ta, nga khubaboolela Kamakhuuwa Kamalayi ka Wele.

¹⁰Inywe muli bajulisi beefwe, ni Wele naye aryo, nga ni khwaba ni tsisaambo tseefwe tsindayi tsingwalaafu, nga sitsilikho ni khukhwikiitsibwa akari mus'iinywe babafukiilila ta.

¹¹Luundi mwamanya nga ni khwababoolela buli mutweela khusiinywe, nga paapa n'akholela babaana beewe.

¹²Khwabakhupilisa, khwabesamo kamaani, luundi khwabakaambilila khuri mukyende bulayi mu bulamu bubwakhila babaandu ba Wele, uwabalaanga khukhwinjila mu buyiinga bweewe, ni mu shiriifwa sheewe.

¹³Ni lwe lomo yino kila khusiima Wele buli busheele, lwekhuuba ni mwafuna Ilomo ya Wele isi mwawulila khukhwaama isiifwe, mwashifukiilila, akhuba nga ilomo iye babaandu busa ta, ne nga ilala ni ili Ilomo ya Wele, iraambila mwiinywe babaandu babaafukiilila.

¹⁴Lwekhuuba inywe be buulebe, mwekyela babaandu babeyikila khu bafukiilisi mu Kristo Yesu babaali mu Yuda. Lwekhuuba nanywe mwataambisibwa lwe bibiindu nibyo bitweela khukhwaama isi babaandu be linaambo lyeenywe, nga nibo ni baataambisibwa ni Bayudaaya;

¹⁵babeera Umukasya Yesu ni baŋoosi luundi bakhutaambisa ni nafwe. Nibo sibekhoyesa Wele ta, luundi bali basiku isi babaandu boosi.

¹⁶Nibo baakhakakho ni khukhukhiingilila ifwe khulekhe khukanikhakho isi Banaambo ta, nio manya nabo bawonesebwa. Musaambo yino baaba bayimbisa bye bubwoonaki bwaabwe, ni lirima lya Wele lyamalile khaale khuboolakho.

¹⁷Ne ifwe be buulebe, khukhwaama nga ni khwawukhana ni nanywe imbuka ifwiiti, (akhuba mu mwoyo ta, ne mu mubili) khwakhakakho naabi khubona khuri, khubabonekho luundi.

¹⁸Khwakana khuri khwiitse isi muli, ni nase samweene Paulo, tsifuunda ngali nakana khukhwiitsa, ne Sitaani walekha khukhufukiilila ta.

¹⁹Ne kumwiyikino kweefwe nikwo kuli, namwe kumwikhoyo, namwe lihabi lye shiriifwa mu moni ts'Omukasya weefwe Yesu Kristo nga naliitsa? Simuli nibo inywe, akhuba babaandu babaandi ta?

²⁰Ilala inywe muli shiriifwa sheefwe, luundi kumwikhoyo kweefwe.