Read lumasaaba 1 Basesalonika 3 Bible Online

1 Basesalonika 3 - lumasaaba bible

1 Basesalonika 3

¹Ne ni khukhanyala khukhwikhaliilikha luundi ta, khwabona khuri shilayi fwenyene khurame i Asene.

²Khuryo khwarumana Timosewo uwe buulebe weefwe, luundi umwakaanisi washeefwe mu khuraambila Wele ni mu khuboolela Kamakhuuwa Kamalayi ka Kristo, lwe khuukana khubahandalasa ni khubayeeta inywe mu khufukiilila khweenywe,

³nio ilekhe khubawo n'umuundu na mutweela khuyiyisibwa lwe khutaambisibwa khuno ta. Lwekhuuba inywe mwabeene mwamanya bulayi muri khwareebwawo lwe bikosi bino.

⁴Lwekhuuba muŋali nga ni khwaba ni nanywe, khwababoolela nga bushiili khuri, khuutsya khutaambisibwa, ni nasho shaaba shiryo nga ni mumanyile bulayi.

⁵Ni lwe lomo yino, ise ni khaanyala khukhwikhalilikha luundi ta, narumanisa nga ngana imanye khu khufukiilila khweenywe. Narya nga nambaasa ndi umusiku akhabakhakilisa ni khukhalaabana khweefwe khwaba khwa busa ta.

⁶Ne ari Timosewo alyoolele isi khuli nga ama isi muli, wakhurereere kamakhuuwa kamalayi kakawaamba khu khufukiilila ni khuukana khweenywe. Wakhuboolele ifwe nga ni mukhushebulila bifukhu byoosi; nga ni mukana naabi khu khubonakho ifwe, nga ndi nafwe ni khuukana nanywe khubabonekho.

⁷Ni lwe lomo yino be buulebe, mu buwaangafu ni mu khutaambisibwa khweefwe, ifwe khweesibwamo naabi kamaani khulweenywe, ni khulwe khuufukiilila khweesi muli nakhwo.

⁸Lwekhuuba aluno ano, ifwe khuli balamu, inywe ni muba nga muli ni kamaani khukhwiimikha mu Mukasya.

⁹Ari khusiima shiina khweesi khunyala khuuwa luundi Wele khulweenywe, lwe kumwikhoyo kwoosi kweesi khusangaala khulweenywe mu moni tsa Wele weefwe?

¹⁰Khuryo shiilo ni kumuusi khuloomba naabi khuri manya khwababonakho luundi, khwanyala khubalooselakho isho shishiiba shibataambakho mu khufukiilila khweenywe.

¹¹Ari khuloomba Wele weefwe, luundi Paapa umweene n'Umukasya Yesu, akhwikulilewo ifwe intsila khwoole isi muli.

¹²Luundi Umukasya abalooselekho khuukana ni khuuminyisa khuukanana mwenyene na mwenyene, n'isi babaandu babaandi boosi, nga khuukana khweefwe ni khuli is'inywe.

¹³Ilala, aryo abawandalase kimyoyo kyeenywe, nio mubonekhe nga babaandu balayi, nga muli bakhosefu mu moni tsa Wele weefwe, luundi Paapa, nga Umukasya weefwe Yesu etsila atweela ni bakhosefu beewe boosi.