Read lumasaaba 1 Basesalonika 4 Bible Online

1 Basesalonika 4 - lumasaaba bible

1 Basesalonika 4

¹Bibyakamayo be buulebe, khubekontselela luundi khubakaambila mu butweela bubuuli mu Mukasya Yesu, khuri mwaakha khuumenya musaambo iyikhoyesa Wele nga ifwe ni khwabaleekela. Bino byoosi mulikho mubikhola, ne khubekontselela khuri mukhole muryo ni khufuurisakho.

²Lwekhuuba mwaamanya khuukaambila khweesi ifwe khwabawa khulw'Omukasya Yesu.

³Khuno khuli khuukana khwa Wele isi muli: ndi mube babawaanibwayo buraawa, naluundi khuri mulekhele ilala bye buyeyani.

⁴Buli muundu mus'iinywe aakha amanye khukhwiwaanayo mu khuwula kumubili kweewe musaambo iili ikhosefu luundi iye lukoosi.

⁵Ne akhuba mu muluungo kwe khukhwikoomba, nga Banaambo babaashiili khumanya Wele ni bakhola ta.

⁶Ni mulomo yino umuundu yeesi alekhe khukhola yaayawe buubi namwe khumumiinilisa ta. Umukasya aliwa babaandu shitaambiso lwe bibyoonako nga bino, nga ni khwamala khaale khubaboolela luundi khwabareewula.

⁷Lwekhuuba Wele siwakhulaangila ifwe bunyaalu ta, ne khumenya nga babawaanibwayo isi niye.

⁸Nashiryo umuundu yeesi ulekelesa bino aba s'alekelesa umuundu taawe, ne aba alekelesa Wele, ubawa Umwoyo weewe Umukhosefu.

⁹Ne bibiwaamba khu khukana khwe be buulebe, sishikhwakhila luundi khubibaronela inywe ta, lwekhuuba inywe mwabeene mwamala khaale khuleekelwa ni Wele isaambo iye khukanana mwenyene na mwenyene.

¹⁰Ne shili ni shisheene, inywe mukanana ni be buulebe boosi babaali mu Masedoniya yoosi. Ne khubekontselela be buulebe khuri, muminyisewo khukhola muryo.

¹¹Khali shibeele shitsilililwa sheenywe khuumenya buulamu buwolu, nga buli muundu enaanayo lwe kimiboraniso kyeewe, nga muraambilila bye buulamu bweenywe, nga esi khwanyoowa khubaboolela.

¹²Ni musaambo yino kane mwisiwemo shiriifwa ni babaandu be bulafu, naluundi nga mbaawo sheesi mutaamba ta.

¹³Ifwe sikhwandikanile inywe khulekha khumanya ta be buulebe, ni khufuura khwibyo bibiwaamba khu baandu babaafwa, nio mulekhe khuuba mu masika nga babaandu babaandi babaakhali ni kumwiyikino ta.

¹⁴Ifwe khufukiilila khuri Yesu afwa, luundi walamukha. Naluundi khufukiilila khuri ni naabo babaafwa nga bafukiilila mu Yesu, Wele alibakobosa mu bulamu atweela ni Yesu.

¹⁵Ni nashino khubaboolela khulwe Lomo y'Omukasya, khuri ifwe babaashiili baalamu, babaaliwo khukhwoolesa khu khwiitsa khw'Omukasya, sikhuliitsya iburaangisi waabo babaafwa khaale ta.

¹⁶Lwekhuuba Umukasya umweene aliikha nga ama mwikulu ni likono lye kamaani, atweela ni likono lya malayika umukhulu, n'ikhoombi ya Wele ni naabo babafwiila mu Kristo, nibo babaalinyoowa khulamukha.

¹⁷Ne lwanyuma lwabo, ifwe babaashiiliwo balamu khuliyilibwa atweela ni nabo mwifuumbi, khukhwakaanila Umukasya mu ngaaki. Khuryo khubatsake n'Umukasya bifukhu byoosi.

¹⁸Nashiryo, ni mwisanemo kamaani mwenyene na mwenyene nga muraambisa bilomo bino.