Read lumasaaba 1 Basesalonika 5 Bible Online

1 Basesalonika 5 - lumasaaba bible

1 Basesalonika 5

¹Ari be buulebe, bibiwaamba khu bifukhu ni khu bisiintsa esi bino bilibelawo sishikhwakhila ifwe khubibaronela inywe ta.

²Lwekhuuba inywe mwabeene mwamanya bulayi busa muri, shifukhu sh'Omukasya shiliitsa nga umwiifwi n'etsa mu shilo.

³Babaandu baliba nga baloma bari, “Iliwo lukoosi, mbaawo buubi ta”, nio lubaluba khuhela khwiitse khu nibo nga butsiina bwe khusaala ni bwitsila umukhasi uli shisoombo, ni nabo baryo boosi sibaliwona ta.

⁴Ne inywe be buulebe, simuli mushiilima nio shifukhu shino shibatundubikhe busa nga umwiifwi ta.

⁵Inywe muli babaana be buwaanga, luundi babaana be kumuusi. Ifwe sikhuli babaandu be mu shilo namwe be shishilima ta.

⁶Nashiryo ifwe khukhakona liilo nga babaandu babaandi ni bakhola ta, ne khakhube meeso luundi babamoka.

⁷Lwekhuuba abo babaakona, bakona mu shilo, ni naabo babaameela, bameela mu shilo.

⁸Ne ifwe, ni khuli babaana be kumuusi, khakhube babaandu babaamoka, nga khwakwaarire khuufukiilila, ni khuukana nga ingabo ibatseeta mu shifuba, ni kumwiyikino kwe buwonesi nga ikuutwa itseeta kumurwe.

⁹Lwekhuuba Wele s'akhurobola ifwe khuubonaabona khulwe mu lirima lyeewe ta, ne khulwe khuunyoola buuwonesi mu Mukasya weefwe Yesu Kristo.

¹⁰Niye aafwa khulweefwe nio akile oba khuba meeso, namwe khuukona, khube baalamu atweela ni naye.

¹¹Ni nashiryo, ni mwisanemo kamaani mwenyene na mwenyene, luundi mwombekhane mwenyene na mwenyene, nga esi muli khukhola ari.

¹²Ni naari khubekontselela be buulebe, khukhwiisamo shiriifwa abo babaraamba kumulimo akari mus'iinywe, luundi beesi Wele aarobola khuubaraangilila ni khuubaleekela inywe.

¹³Nga mubeesamo shiriifwa shifuura bukali ni khuukana, lwe buraambi bwaabwe. Ni mube mu lukoosi mwenyene na mwenyene.

¹⁴Naluundi khubakaambila be buulebe, mureewule abo babekhala busa, muwandalase abo babaali ni kimyoyo kimutoro, muyeetatsake abo babaali batoro, mube babekhalilikhi isi babaandu boosi.

¹⁵Ni mubone muri mbaawo umuundu yeesi uwiliyaasa uwashe umukholile buubi nga naye namukholile buubi ta, ne busheele mukhakekho khuukhola bulayi akari enywe mwenyene na mwenyene, n'isi babaandu boosi.

¹⁶Ni mwikhoyatsake bifukhu byoosi.

¹⁷Muloombatsake ndaalo tsoosi.

¹⁸Mubatsake babaasiima mu lomo tsoosi, lwekhuuba shino nisho sheesi Wele abakanisa inywe mu Kristo Yesu.

¹⁹Mukhasimisatsaka kamaani k'Omwoyo Umukhosefu ta.

²⁰Mukhalekelesatsaka bye buŋoosi ta.

²¹Ni mutsematsake bibiindu byoosi, muwandalalile khu biindu bibiili bilayi.

²²Mwiwalabe buli shiindu shoosi shishiili shiibi.

²³Ni Wele umweene uwe lukoosi, abakhole mube bakhosefu ilala musaambo tsoosi. Muliindibwe bulayi mu myooyo, ni bulamu, ni mu mibili nga si mulikho ni khukhwikiitsibwa ta, khukhwoolesa khu shifukhu she khukhwiitsa khw'Omukasya weefwe Yesu Kristo.

²⁴Uyo uwabalaanga inywe ali umwiyikinwa luundi alishikhola.

²⁵Bebuulebe ni mukhuloombelekho.

²⁶Ni musheese be buulebe boosi ni khukwana mu shifuba khukhosefu.

²⁷Imbakhonyakilila mu Mukasya ndi musomele ibaluwa yino be buulebe boosi.

²⁸Bubweela bw'Omukasya weefwe Yesu Kristo bube ni nanywe.