Read lumasaaba Yoswa 1 Bible Online

Yoswa 1 - lumasaaba bible

Yoswa 1

¹Lwanyuma lwe khuufwa khwa Musa umwakaanisi w'Omukasya, Umukasya waakanikha isi Yoswa umusooleli wa Nuni, uwaba umuyeeti wa Musa.

²Nga amuloma ari, “Bona ari Musa umwakaanisi wase waafwiile. Ari iwe waakhiile khukhwirekekha uraangilile ba Isiraeli khukhwaambukha luluutsi Yorudaani, mutsye mu shibala sheesi intsya khubawa.

³Nga ni nasuubisa Musa, kane imbawe buli aandu oosi isi kane mube nga musaamba shikyele sheenywe.

⁴Lulwaakha lweenywe kane lwoole khu mubiimbi kukuuli imwaalo we lukiingi Lebanooni, ni khuuniina ingaaki khuutsya khuukhwoolela ilala khu luutsi luboofu Efurati. Kane muyililemo ni shibala shoosi she ba Hiiti, khuutsya khukhwoolela ilala khu nyaantsa imboofu Meditereniani iili ibukwanyaanga.

⁵Yoswa, mbaawo umuundu na mutweela ulinyalisa khukhwiimikha akhuwule iwe ta, mu biifukhu byoosi byeesi ulimala nga uli mulamu. Ise nga ni nabatsaka ni Musa khuumuyeeta, indyo ndi kane imbatsake ni nawe. S'indikhulekhakho na khakyeekhe khari ta.

⁶“Ne ari ikhuloma busa ndi, yiilamo kamaani, ukume kumwoyo, lwekhuuba iwe niye uutsya khuraangilila babaandu bano boosi, khuubayila mu shibala sheesi neetsubila bakuuka beenywe khuushibawa.

⁷Iwe yiilamo busa kamaani, ukume kumwoyo. Bonela ilala uri ufukiilila khuukhola ibyo byoosi byeesi umwakaanisi wase Musa aakhulakila khuukhola. Ukhaakamisa khuuloondelela kamakaambila ta, ni abweene awo, kane ufuuratsake buli aandu oosi isi kane utsyatsake.

⁸Bonela ilala uri shiitabo shino she kamakaambila sishirura mukhanwa mwoowo ta. Shisomatsake, ushambaasatsakekho kumuusi ni shiilo, nio unyale khuukhola byoosi bibyashironebwamo.

⁹N'ushebulile uri ise niye ukhulakiile khukhwiilamo kamaani, ni khuukuma kumwoyo. Ukheyembelela namwe waabakho ni khuurya khwoosi ta! Ise Umukasya Wele woowo kane imbaatsake ni nawe, buli oosi isi ukane utsyatsake.”

¹⁰Lwanyuma kila Yoswa awa biilakilo isi baakhulu be bikuuka

¹¹nga abaloma khuutsya mu libuungiitsi lye babaandu boosi babalome bari, “Nimwiboweleyo biilyo bibiimala. Lwekhuuba mu biifukhu bitaru khukhwaama shaleelo, khutsya khwambukha luluutsi Yorudaani, khutsye khuyile shibala sheesi Umukasya Wele weefwe, aabalomela khuuba shisheenywe.”

¹²Yoswa waakanikha isi bikuuka bya Rewubeni, ni Gadi atweela ni shisiintsa she khabiili she shikuuka sha Manase, nga abalomela ari,

¹³“Nimushebulile nga Musa umwakaanisi w'Omukasya n'ababoolela inywe ari, Wele atsya khubawa shibala shino khuuba shisheenywe, mweesi muli khuutsya khuwolela.

¹⁴Nashiryo bakyelama beenywe, ni babaana beenywe, ni bibyaayo byeenywe, baakha khuurama ano mu shibala sheesi Musa aabawa; ne baselikhale beenywe boosi, baakha bakwaare bye busoolo, baraangile batsye iburaangisi we ba Isiraeli babaaramile, babayeete

¹⁵khukhwoolesa nga nabo baamalile khuuwula shibala sheesi Umukasya Wele weenywe ali khuubawa, beekhalemo ni lukoosi nga nanywe ni muli ni lukoosi. Nga mwaamalile muryo, nio lwanyuma mukobole mu shibala sheenywe shino sheesi Musa umwakaanisi w'Omukasya, aabawa inywe.”

¹⁶Nabo beelamo Yoswa bari, “Buli shiindu shoosi sheesi ukhulomeele khuukhola, kane khushikhole khuuyeeta baalebe beefwe. Na buli oosi isi kane ukhulomele khuutsya, kane khutsye.

¹⁷Kane khukhuwulile iwe nga ni khwawulilatsaka Musa. Naluundi khuloomba khuri khali Umukasya Wele woowo, abeelatsakile ni nawe nga n'abatsaka ni Musa!

¹⁸Buli muundu yeesi ukane akhumiinyaalile, alekhe khukhuwulila byeesi uba waalakiile ta, uyo aakha khukhwiiribwa. Ne shonyene ndi waakha khukhwiilamo kamaani ni khuukuma kumwoyo!”