Read lumasaaba Yoswa 10 Bible Online

Yoswa 10 - lumasaaba bible

Yoswa 10

¹Umuyiinga Adonizedeki we Yerusalemu waawulila isaambo isi Yoswa aawaambamo luundi wahesela ilala shiriimba Ai n'umuyiinga washo, nga nisho shitweela sheene sheesi aakhola khu Yeriko. Naluundi weelayo waawulila isaambo isi ba Gibiyoni baakholamo ikwangwaani ye lukoosi ni ba Isiraeli, boola khuubamenyamwo.

²Shino shaakila Adonizedeki atweela ni babaandu boosi be Yerusalemu baarya naabi. Lwekhuuba baaba baashimanya bari Gibiyoni shaba shiriimba shiboofu naabi, nga biriimba bibiindi bibyabamo bayiinga ni byaba. Naluundi nga shili shiriimba shiboofu naabi khuufuurakho Ai, ate nga shilimo ni basaani babaaba baasoolani baalayi naabi.

³Kila Adonizedeki arumana baarume khuutsya isi bayiinga basheewe, mumuuli umuyiinga Hohamu uwe Heburoni, Piramu uwe Yarimusi, Jafiya uwe Lakishi, ni Debiri iwe Egiloni.

⁴Nga abalomela ari, “Ni mwiitse munjeetekho inyale khuutsya nibwakale Gibiyoni, lwekhuuba baakholile ikwangwaani iye lukoosi ni Yoswa atweela ni ba Isiraeli.”

⁵Bayiinga bano baraano be ba Amori nga nibo; umuyiinga we Yerusalemu, uwe Heburoni, uwe Yarimusi, uwe Lakishi, n'uwe Egiloni, baabuusanisa liiye lyaabwe atweela, baatsya bebwakala Gibiyoni.

⁶Babaandu be Gibiyoni baarumanisa buurume isi Yoswa nga baabusaniile i Gilugaali bari, “Ni mwiitse mukhuyeete khaangu, mukhakhulekha fwenyene ta. Bona bayiinga be ba Amori, khukhwaama mu shibala she tsingoongo betubaasile atweela khukhwibwakala ifwe.”

⁷Aryo Yoswa ni liiye lyoosi nga lilimo ni basoolani beewe babaafuura buulayi, baakhuumba khukhwaama i Gilugaali.

⁸Umukasya waalomela Yoswa ari, “Ukhabakho ni khuurya khwoosi khulwe bayiinga be ba Amori ta. Ise naabawaanileyo khaale mu makhono koowo. Mbaawo na mutweela unanyalisa khuukhusoolanisa iwe.”

⁹Yoswa waakhuumba ni baselikhale beewe shiilo isho shoosi, khukhwoolesa n'abebwakala nga baakhushimanyakho ta.

¹⁰Umukasya waakwiisa mu baasiku isuundakilisi ngali, kila ba Isiraeli baabeerakila naabi i Gibiyoni. Ba Isiraeli baatimisa babaaramile baabayila baatsya baaboolesa khu lukuuto luluutsya i Besi Horoni. Baryo baatsya nga babeeraka khukhwoola ni mu biriimba Azeka ni Makeda.

¹¹Ne baasiku bano ni baaba nga balikho batima batsya, nga beekhilila khu lukuuto lulwaama i Besi Horoni khuutsya i Azeka, Umukasya waalakasa kamararara kamaboofu khukhwaama mu ngaaki, kaaba nga kabakwiila khuutsya khwoolela ilala i Azeka. Baryo babaandu baakali baafwa lwe khuukhupibwa kamararara kano, khuufuurisa abo babeeribwa ni tsiindima tse ba Isiraeli.

¹²Khu shifukhu khweesi Wele aawaanilayo ba Amori isi ba Isiraeli, Yoswa waalakila inyaanga nga ba Isiraeli boosi babona ari, “Iwe inyaanga, yiimikha mu shifwo shitweela angaaki e ba Gibiyoni, ni nawe kumweesi urame iyo nga ushiili angaaki e Litila Ayijaloni.”

¹³Iryo inyaanga yaarama nga yeemikhile mu shifwo shitweela. Ni kumweesi nakwo kwaarama nga sikukyeenda ta, khukhwoolesa linaambo lya Isiraeli ni lyamala khuuwulila ilala baasiku baabwe. Bino nibyo bibyaronebwa mu shitabo sha Jashari.

¹⁴Ni khukhwaamila abweene awo, abe siyakhubatsakawo, namwe siyaabatsakawo shifukhu shishiindi shishifwaanakho nga isho, musaambo isi Umukasya aarekeereselamo babaandu beewe nga bamuloomba. Ilala Umukasya aaba ali khuusoolanila babaandu beewe ba Isiraeli.

¹⁵Lwanyuma lwe buusoolo khuuwa, Yoswa atweela ni ba Isiraeli boosi beelayo mu shifwo abe isi baabuusanila i Gilugaali.

¹⁶Nga baasiku baalala ni baaba nga belukha batsya lubeka luluundi, bayiinga baraano nibo baatima baatsya beebisa mwifuluma lya Makeda.

¹⁷Kila baselikhale ba Yoswa bamuloma bari, “Bayiinga baraano babanyoolile nga beebisile mwifuluma lya Makeda.”

¹⁸Yoswa naye waabeelamo ari, “Ni mupiringise kamabaale kamaboofu kameene, mukafuunikhe imulyaango, mulekhewo baselikhale baalala khuliinda buulayi.

¹⁹Ne inywe babaaramile mukhakamisa ta. Mwaakha mwiloosele khuutimisa baasiku babaaramile. Mukhabafukiilisa baatsya benjila mu biriimba ta, lwekhuuba banyala baatsya bawona. Umukasya Wele weenywe kane abayeete khuubamalilawo ilala boosi.”

²⁰Aryo Yoswa atweela ni liiye lyeewe baahesela ilala baasiku baabwe, aambi babamalilewo ilala. Ne khuurusakho bakyeekhe bari nibo babaawona lwekhuuba baanyalisa khukhwinjila mu biriimba byaabwe bibyabakho kamatikiiyi.

²¹Lwanyuma lwa byoosi, nga Yoswa ni liiye lyeewe baamalile khuuhesela ilala baasiku baabwe beesi baatimisa abo, baakobolayo i Makeda isi baawolela. Lwekhuuba abe baasiku babaaramile bakyeekhe bari baatimile baatsiile khukhwiibisa mu biriimba byaabwe bibyabakho kamatikiiyi.

²²Lwanyuma Yoswa waalomela baselikhale beewe ari, “Ari ni mutsye muruseyo kamabaale kamaboofu tsana khukhwaama khwifuluma, mundereere ano bayiinga baraano abo.”

²³Baryo baselikhale baatsya bekula lifuluma, baarusayo bayiinga abo, nga mu nibo mulimo uwe Yerusalemu, uwe Heburoni, uwe Yarimusi, uwe Lakishi, n'uwe Egiloni, baabareera isi Yoswa.

²⁴Ni baamala khuuboolesayo, Yoswa waalakila bayiinga abo khuukona aasi butsalaafu khwiloba. Lwanyuma walaanga baselikhale beewe khukhwiitsa waabalomela ari, “Ni musaambe bikyele byeenywe khu mimilo kye bayiinga bano.” Baryo baselikhale beetsa basaamba bikyele byaabwe khu mimilo kye bayiinga abo.

²⁵Lwanyuma Yoswa welooselakho nga abaloma ari, “Mukhabakho ni khuurya khwoosi namwe mweyembelela ta. Ni mwiilemo kamaani, mube bakumu. Lwekhuuba shino nisho sheesi Umukasya Wele weenywe atsya khukhola baasiku beenywe boosi.”

²⁶Aryo Yoswa weera bayiinga baraano abo, lwanyuma waalakila ari babasuunge kimilaambo kyaabwe, buli mulaambo khu kuusaala kwakwo. Kimilaambo kino kyaarama nga kitsuungatsuunga khukhwoolesa antsye ni bwelabula.

²⁷Lwanyuma lwayo Yoswa waalakila ari, “Ni musuungule kimilaambo kino, mukituume mwifuluma mweesi babeele nga beebisile. Nga mwaamalile mufuunikhe imulyaango wako ni kamabaale kamaboofu tsana.” Baselikhale baatsya baashikhola. Ni kamabaale ako kashiiliyo ni khukhwoolesa shaleelo shino.

²⁸Indi ndi luundi Yoswa webwakala shiriimba Makeda, weera n'umuyiinga we shiriimba sheene, ni khuutubakho ni babaandu boosi babaaramile be mu shiriimba, nga n'akhola khu Yeriko.

²⁹Yoswa ni liiye lyeewe benyukhilamo luundi barura i Makeda, baatsya bebwakala shiriimba Libuna.

³⁰Umukasya ndi waabanyalisisa khuuwula shiriimba shino atweela n'umuyiinga washo. Baryo baahesela ilala umuyiinga khuutubakho na buli muundu yeesi, nga n'akhola khu Yeriko.

³¹Yoswa ni liiye lweewe beeloosela khuutsya khu shiriimba shishiindi Lakishi. Baatsya baashibotokhelela naluundi baashibwakala.

³²Umukasya waabanyalisisa khuuwula shiriimba shino. Beeraka buli muundu yeesi uwashibamo nga ni baakhola khu Libuna.

³³Nga bili biryo, umuyiinga Horamu uwe Gezeri weetsa khuuyeeta shiriimba Lakishi, ne Yoswa ni liiye lyeewe babebwakala nabo beera umuyiinga yuno atweela ni liiye lyeewe lyoosi.

³⁴Khukhwaama i Lakishi, Yoswa ni liiye lyeewe belooselayo khuutsya khu shiriimba Egiloni, baatsya baashibotokhelela luundi baashibwakala.

³⁵Nasho baashiwaamba khu shifukhu sheene isho, beeraka na buli muundu yeesi uwashibamo, nga ni baakhola khu Lakishi.

³⁶Khukhwaama i Egiloni, Yoswa ni liiye lyeewe, baatsya bebwakala Heburoni,

³⁷bawaamba shiriimba atweela ni bibyaalo bibishililanile, beera umuyiinga washo na buli muundu yeesi uwashibamo. Baryo bakhola Heburoni nga ni baakhola khu Egiloni.

³⁸Yoswa ni liiye lyeewe beelooselayo baatsya bebwakala Debiri,

³⁹baawaamba shiriimba isho atweela ni bibyaalo bibishililanile byoosi. Beeraka babaandu boosi babaashibamo, nga mbaawo n'umuundu na mutweela isi baalekha nga mulamu ta. Baryo Yoswa ni liiye lyeewe baakhola shiriimba Debiri n'umuyiinga washo nga ni baakhola khu Heburoni ni khu Libuna.

⁴⁰Aryo Yoswa wawaambaka biriimba byoosi bibyaba mu shibala isho, khuutubakho ni biriimba bibiindi bibyaba mu bikoongo, ni mu bikiingi bye shisiintsa she Negevu. Waatsya woola ni mu bikoongo bye bukwanyaanga, nga awaambaka ni bayiinga baabwe beene. Mbaawo umuyiinga namwe babaandu beesi aalekha nga baalamu ta. Lwekhuuba shino shaba nga nisho sheesi Umukasya Wele waabwe aabalakila khuukhola.

⁴¹Mu busoolo buno Yoswa waahesela ilala biriimba bye Kadeshi Barineya, khuutsya khukhwoolela ilala i Gaza, ni khuumalilakho ilala bisiintsa bye Gosheni ni Gibiyoni.

⁴²Yoswa aawula bayiinga bano boosi, ni bisiintsa byaabwe byoosi mu mbuka niyo ndweela, lwekhuuba Umukasya Wele wa Isiraeli, aaba ali khuusoolanila khu lubeka lwe ba Isiraeli.

⁴³Lwanyuma lwa bino byoosi, Yoswa atweela ni liiye lyeewe beelayo isi baaba nga baabusaniile mu shifwo she Gilugaali.