Read lumasaaba Yoswa 11 Bible Online

Yoswa 11 - lumasaaba bible

Yoswa 11

¹Umuyiinga Jabini uwe Hazori n'awulila khuuwula khwa Yoswa khuno khwoosi, waarumanisa buurume isi bayiinga babaandi babaaba babesanwa beewe, nga abaloomba ari beetse bamuyeete khuusoolanisa ba Isiraeli. Aryo Jabini waarumanisa isi umuyiinga Jobabu uwe Madoni, ni isi bayiinga Shimuroni ni Akishafu.

²Waaloomba ni bayiinga babaawula shibala she ngaaki she mu ngoongo, ni naabo babaaba bawula bisiintsa bibyaba mu Litila lya Yorudaani, imwaalo wa Galilaaya, waarumanisa ni isi bayiinga babaaba bawula bisiintsa bye mu ngoongo ni Nafasidori shishaba i bukwanyaanga.

³Waarumanisa buurume bubuundi khuutsya isi bayiinga be ba Kanani babaaba i bwaamanyaanga, ni bukwanyaanga weene, isi umuyiinga uwe ba Amori, uwe ba Hiiti, uwe ba Perizi, ni isi bayiinga be ba Yebusi mu shibala shishaba iyo mu ngoongo. Waarumanisa ni isi bayiinga be ba Hiivi mu shisiintsa she mwiitila lya Mizipa, aambi ni lukiingi Herumoni.

⁴Bayiinga bano boosi baabuusanisa kamaye kaabwe atweela, boolesa liiye lye kamaani naabi, lye baselikhale babaasoolanila khu ŋwaaŋwa ni kamakaali. Liiye lino lyaaba liboofu naabi khufwaananakho nga bukali bwe kumuyekhe khu ndulo khwe nyaantsa.

⁵Bayiinga bano ni liiye lyaabwe baabuusanila atweela khu ndulo khwe kameetsi ke Meromu, nga beerekekhile khuusoolanisa ba Isiraeli.

⁶Umukasya waalomela Yoswa ari, “Ukhabalekha baakhuriisariisa ta! Kane ise ikhuyeete khuubawula boosi, ni kumukaamba itsya khwoola tsinyaanga tsino, ukhaabe waabeerire boosi. Nga waabebwakaalile, unyoowa ni khuufuniaakaka bikyele bye tsiŋwaaŋwa tsaabwe, lwanyuma wookhake kamakaali kaabwe ni kumulilo.”

⁷Aryo Yoswa ni liiye lyeewe bebwakala baasiku baabwe shiyifuyifu busa nga baabusaniile khu meetsi ke Meromu.

⁸Umukasya wahaanayo baasiku bano mu makhono ke ba Isiraeli. Ba Isiraeli baabakwamo, baabatimisa baabayila baaboolesa paka i Sidoni, ni Misurefoosi Mayimu, baabayila ni khukhwoolesa ibukwanyaanga mu Litila lya Mizipa. Buusoolo buno bweloosela khukhwoolesa nga buli mutweela khu baasiku waamalile khukhwiiribwa.

⁹Yoswa waabahesela ilala nga aloondelela bilakilo byeesi Umukasya aamuwa, waafuniaakaka bikyele bye tsiŋwaaŋwa tsaabwe, lwanyuma wooshaka kamakaali kaabwe ni kumulilo.

¹⁰Lwanyuma ndi Yoswa weelayo wawaamba Hazori, weera umuyiinga washo. Khu mbuka iyo umuyiinga we Hazori aaba nga niye umukhulu naabi, nga akhulila bayiinga babaaramile be buyiinga bwoosi.

¹¹Baryo bawaamba beeraka babaandu boosi, nga mbaawo na mutweela isi baalekhawo nga mulamu ta, boosha ni shiriimba sheene ni kumulilo.

¹²Aryo Yoswa wawaambaka biriimba ibyo atweela ni bayiinga baabyo beene, wabeeraka ni lurima. Aabahesela ilala boosi nga Musa umwakaanisi w'Omukasya n'amulakila khuukhola.

¹³Ne khuurusakho ndi ba Isiraeli sibooshakho ni kumulilo biriimba bibyaba nga byaayombekhebwa khu biili bibyesuta angaaki ta, akhali Hazori shonyene.

¹⁴Ba Isiraeli baasutaka bibiindu bye buyiindifu byeesi baanyoola mu biriimba bino, baayilaka ni bibyaayo byeene. Ne babaandu babaabibamo boosi beeribwaka, baabamalilawo ilala, nga mbaawo na mutweela isi baalekhawo nga mulamu nakhari ta.

¹⁵Biryo bilakilo byoosi byeesi Umukasya aawa Musa, Musa naye aabiwaambisa Yoswa, naye Yoswa waabiloondelela byoosi. Aryo Yoswa olelesa bibiindu byoosi byeesi Umukasya aalakila Musa.

¹⁶Yoswa ni liiye lyeewe waatsya webwakala luundi weyilila shibala shishaba ingaaki ni mwaalo, shibala she tsingoongo she Negevu shoosi khukhwoolela ilala i Gosheni, khuutsya paka ibukwanyaanga, shiifwo she Araba ni tsinjiinji tsa Isiraeli, ni khutubakho Litila lya Yorudaani.

¹⁷Ni shisiintsa shoosi khukhwaama mu shibala she lukiingi lwa Halaka lulwaba lwalolelela i Seyira, khuutsya khukhwoolela ilala i Bayaligadi, mu Litila lya Lebanoni, mwisina mwe Lukiingi Herumoni. Atsya nga awaambaka bayiinga bano boosi, khukhwoolesa nga n'abeeraka ni lurima.

¹⁸Yoswa asoolana ni bayiinga bano boosi khuumala imbuka indeeyi.

¹⁹Babaandu be shiriimba shitweela shonyene babaakholakho indakaano ni ba Isiraeli, shaba shiriimba Gibiyoni, mweesi ba Hiiti baamenyatsaka.

²⁰Lwekhuuba yaba Umukasya umweene niye uwabakhunisakho kimyoyo kyaabwe nio beeloosela khuusoolanisa ba Isiraeli. Nio shino shaanyalisa ba Isiraeli khuubamalilawo ilala, nga sibabawaambilakho shiisa shoosi ta, nga Umukasya umweene n'alakila umwakaanisi weewe Musa.

²¹Khu mbuka nyene iyo, Yoswa waatsya webwakala luundi waahesa babaandu beesi baalaanga bari ba Anakimu[1], babaaba bamenya mu shibala she mu ngoongo: she Heburoni, Debiri, ni Anabu, khuutubakho ni naabo babaaba mu shibala sha Yuda shoosi, atweela ni mu Isiraeli. Yoswa aahesela ilala babekhali be mu biriimba bino, waabamalilawo ilala.

²²Mbaawo na mutweela khu baandu ba Anakimu isi baalekha nga mulamu mu bifwo bye ba Isiraeli ta. Khuurusakho bakyeekhe bari nibo babaaramakho mu Gaza, Gasi, ni mu Ashidodi.

²³Iyo niyo isaambo isi Yoswa aawaambakamo shibala shoosi, nga Umukasya umweene n'alakila Musa. Aryo Yoswa waakabananisamo liiswa mu bisiintsasiintsa, nga buli shikuuka ashikabila shiifwo shasho. Lwanyuma shibala shoosi shaawolakho busoolo.