Read lumasaaba Yoswa 14 Bible Online

Yoswa 14 - lumasaaba bible

Yoswa 14

¹Ari bibiilakho bino yaba niyo isaambo isi babaandu ba Isiraeli abe babaashili khufuna, baafunamwo liiswa mu shibala sha Kanani, ibukwanyaanga wa Yorudaani. Umusaayi Eliyazari ni Yoswa umwaana wa Nuni atweela ni baaraangilisi babaandi be bikuuka bya Isiraeli, bekhala baakabananisamwo liiswa lilyarama isi babaandu.

²Khuukabananisamwo khuno isi bikuuka syeenda ni shisiintsa bibyarama, khwaba khubirira mu khukhupa khakokha, nga Umukasya umweene n'alakila Musa.

³Khu mbuka yino Musa aba wamala khaale khukabananisa busikha bwe liiswa isi bikuuka bibili ni shisiintsa ibwaamanyaanga wa Yorudaani. Ne Musa niye s'awakho shikuuka sha Levi busikha bwoosi ta.

⁴Lwekhuuba basooleli ba Yusufu baaba baayamamwo bikuuka bibili, nga nibyo bili shikuuka sha Manase ni sha Efurayimu. Ne shikuuka sha Levi nisho sishafunakho kumukabo kwe liiswa ta, akhali ndi baafuna busa biriimba bye khuumenyamwo, ni biifwo e khukhwaayisila tsikhaafu tsaabwe atweela ni kamasheese ni tsimbusi tsaabwe.

⁵Baryo ba Isiraeli baakabanana liiswa musaambo isi Umukasya aalakilamwo Musa.

⁶Shifukhu shitweela nga babaandu ba Isiraeli bashibuusanila i Gilugaali, Kalebu umusooleli wa Jefune, uwe mu shikuuka sha Kenazi, waatsya waakanikhana ni Yoswa nga ali atweela ni babaandu babaandi khukhwaama mu Yuda. Kalebu waalomela Yoswa ari, “Iwe waamanya buulayi ibyo byeesi Umukasya aalomela Musa, umuundu wa Wele, nga khushiili i Kadeshi Barineya, bibiindu bibiwaamba khwiiwe ni nase.

⁷Ise naaba nga ndi ni kimiiko kamakhumi kane khu mbuka isi Musa umwakaanisi w'Omukasya aandumila khukhwaama i Kadeshi Barineya, khuutsya i Kanani khukhwimenielesa shibala. Ni nakobola isi ali, namuboolela bibiindu bibyeene bibiili bya ŋali ilala.

⁸Ne babaandu beesi natsya ni nabo baakobola baboolela babaandu bibiindu bibyakila baweelamo ilala kamaani. Ne ise neyikinila ilala Umukasya Wele wase mu byoosi.

⁹Indyo khu shifukhu khweesi nakobolelakho, Musa anomela ise ari, ‘Ilala nga n'ubeele umwiyikinwa isi Umukasya Wele, ise ikhwitsubila ndi shiifwo shoosi sheesi utsiile khukhwimenielesa, kane shibe shishoowo ni babetsukhulu boowo biilo ni biilo.’

¹⁰Ne ari bona kyoolele kimiiko kamakhumi kane na kiraano khukhwaama nga Umukasya n'alomela Musa shishiindu isho, ni nase ari bona indi kimiiko kamakhumi shinaane na kiraano. Imbuka iyi yoosi ba Isiraeli babeele nga bakyeendana mu mubiimbi khukhwaama mu shifwo shitweela khuutsya mu shiindi. Ne Umukasya waniindile ise nga ndi mulamu khukhwoola shaleelo, nga n'aloma ari kane ashikhole.

¹¹Ise shaleelo shino ishiilimo kamaani nga ni naba khu mbuka iyo, naluundi ishinyalisa khusoolana mu busoolo ni kamaani keene.

¹²Ninashiryo, ise ikhuloomba ndi umbe shibala isho she mu ngoongo sheesi Umukasya asuubisa ise khu shifukhu isho. Iwe wamweene wabawo, naluundi wawulila nga babaandu babaatsya khukhwiimenielesa ni baaloma bari mu shisiintsa isho shikali, mulimo babaana ba Anaki, naluundi bili biriimba byaabwe biboofu, byeesi boombekhelakho kamatikiiyi. Ne ise nambaasa ndi Umukasya kane anjeete ise, mbaawoonemwo imbile liiswa lyaabwe, nga Umukasya umweene n'aloma.”

¹³Aryo Yoswa waaloombela Kalebu umwaana wa Jefune tsikhabi khukhwaama isi Wele, lwanyuma waamuwa shiifwo isho she Heburoni khuuba busikha bweewe.

¹⁴Shiryo shiifwo shino she Heburoni shaarama nga shili sha Kalebu umwaana wa Jefune, uwe mu shikuuka sha Keni, atweela ni babetsukhulu beewe khukhwaamila abweene awo, lwekhuuba niye aaba umwiyikinwa isi Umukasya Wele wa Isiraeli.

¹⁵Nga bino bishiili khuba biryo ta, Heburoni shino shaba bashilaanga bari shiriimba sha Ariba, (lwekhuuba Ariba yuno aaba umusaani uwe kamaani naabi khufuura babaana ba Anaki boosi). Lwanyuma lwa bino, aabawo lukoosi mu shibala.