Read lumasaaba Yoswa 15 Bible Online

Yoswa 15 - lumasaaba bible

Yoswa 15

¹Bukuuka bukyeekhe bwe mu shikuuka sha Yuda bwaweebwa liiswa khu lubeka lwe mwaalo khu lwaakha ni Edomu, ni khukhwiikha khukhwoolela ilala imwaalo ibweene khu mubiimbi kwa Zini.

²Lulwaakha lwa Yuda lwe mwaalo ibweene lwaba imwaalo ibwakamilo we nyaantsa iye Kumuunyu.

³Shiifwo shino shakhalisa shaatsya paka imwaalo i bubiriro bwa Akurabimu khuutsya khukhwoola khu Zini. Luundi shatsya shoola imwaalo wa Kadeshi Barineya. Shiryo sheloosela shaatsya khukhwoola i Hezuroni, khukhwilooselayo paka i Adari, shaweta shalola kwe Karika.

⁴Shiifwo shino sheloosela paka i Azimoni, shaloondelela luluutsi lwe khu lwaakha ni Misiri, lwaatsya lwaatsukha mu Inyaantsa imboofu Meditereniani. Ano nawo aaba lulwaakha lwe ba Isiraeli lwe mwaalo.

⁵Lulwaakha lwa Yuda lwe bukwanyaanga lwatsya lwoolela ilala khu nyaantsa iye Kumuunyu, khuutsya paka isi luluutsi Yorudaani. Lulwaakha lwe ngaaki lurakikhila abweene isi luluutsi luno lutsukhila kameetsi kaalwo mu nyaantsa yino.

⁶Khukhwaama awo, lulwaakha luno lwatsya khukhwoola i Besi-Hogula, lwelooselayo khukhwoola ingaaki wa Besi-Araba, khuutsya paka khu libaale lye Shishebuliso lilyaba lya Bohani, uwaba uwe mu shikuuka sha Rewubeni.

⁷Ndi khukhwaama awo, lulwaakha lwatsya khukhwoola khwi tila lya Akori ne Debiri, lwaatsya lwaawetela ingaaki we litila lilikhalisa i Bubiriro bwe Adumimu lwaatsya kwe Gilugaali. Lulwaakha luno lwatsya paka khu sebele tse Enshemeshi, khukhwoola ni Enirogeli,

⁸ni khuubirira mu litila Hinomu khu shibala shishikhilila imwaalo, paka i Yerusalemu, shiriimba she ba Yebusi. Khukhwaama awo, lulwaakha luno lwaatsya lwaabirira khu ngaaki khwe lukiingi lulwaba ibukwanyaanga we litila lya Hinomu, ni khukhwoola ibwaakamilo we litila lya Refayimu.

⁹Khukhwaamila khu ngaaki khwe lukiingi ukhwo, lulwaakha luno lwatsya lwaaweta lwoola khu sebele tse Nefutowa, lwaatsya lwaarurira mu biriimba bibyoonakisibwa khu lukiingi Efuroni, lwaatsya lwekhilila khukhwoola i Baala, ari balaanga bari Kiriyasi Jeyarimu.

¹⁰Khukhwaama i Baala, lulwaakha lwe ngaaki lwaatsya ibukwanyaanga khukhwoola khu lukiingi Seyiri, lwaatsiila ingaaki iyo we khu lukiingi Yeyarimu, isi Kyesaloni shinyoolekhana, luryo lwekhilila lwoola i Besi Shemeshi, lwaakhalisa khukhwoola i Timuna.

¹¹Lulwaakha luno lwatsya khukhwoola khu khakoongo khakhaali ingaaki wa Ekuroni, lwaaweeta lwaakobola i Shikeroni, lwanyuma lwaatsya paka khu lukiingi Baala. Lwanyuma lwe khukhwiloosela paka i Jabuneeli, lulwaakha luno lwaatsya lwaakamila khu nyaantsa imboofu Meditereniani,

¹²iyaba nga niyo lulwaakha lwa Yuda lwe bukwanyaanga. Bukuuka bukyeekhe bwe mu Yuda bwamenyatsaka mubweene umwo.

¹³Yoswa waakabila Kalebu umusooleli wa Jefune, liiswa akari mu baandu ba Yuda, nga Umukasya n'amulakila. Kumukabo kwa Kalebu nikwo kwaba Heburoni, khu mbuka iyo baaba balaanga bari shiriimba sha Ariba, uwaba umukuuka uwamanyikhana naabi uwa Anakimu.

¹⁴Kalebu aatsya webwakala shiriimba Heburoni waawoonamwo bikuuka bitaru bye ba Anakimu nga nibyo; Sheshayi, Ahimani, ni Talumayi.

¹⁵Khukhwaama awo, Kalebu welooselayo webwakala shiriimba Debiri, makiboole shishaba shilaangibwa bari Kiriyasi Seferi.

¹⁶Waatsya waaboolela basaani beeyo ari, “Umuundu yeesi ukane atsye ebwakale luundi awule Kiriyasi Seferi, kane ayile umukhaana wase Akisa, khuuba nga umukhasi weewe.”

¹⁷Aryo Osinieli, umwaana wa Kenazi, wandaaye wa Kalebu, waatsya waasoolanisa shiriimba Kiriyasi Seferi, waashiwula. Kila Kalebu amuwa umukhaana weewe Akisa, khuuba umukhasi weewe.

¹⁸Lwanyuma lwe khuuyilana, Akisa waatsya waalomela Osinieli ari atsye aloombe paapawe Kalebu, amuwe kumukuunda. Aryo Akisa waatsya khuubona paapawe, ne naaba nga arura khu sikilya yeewe, paapawe Kalebu waamureeba ari, “Shiina sheesi ukana ikhukholele?”

¹⁹Naye Akisa waamwilamo ari, “Ingana umbeyo shiwaanwa. Khukhwaama nga niwaamba liiswa mu mubiimbi kwe mwaalo kwe Negevu, ngana ari umbeyo shiifwo shishiilimo tsisebele tse kameetsi.” Aryo Kalebu waamuwa tsisebele tse kameetsi tseesi baalaanga bari Isebele iye angaaki ni Sebele iye sina.

²⁰Buno nibwo busikha bwe shikuuka she babaandu ba Yuda khuusiintsiila khu tsiingo tsaabwe.

²¹Biriimba bibyaba bye babaandu be mu shikuuka sha Yuda babaaba imwaalo ibweene, khuutsya khukhwoola khu lwaakha ni babaandu ba Edomu byaba nibyo Kabuzeli, Ederi, Jaguri,

²²Kina, Dimona, Adada,

²³Kedeshi, Hazori, Isinani,

²⁴Zifu, Telemu, Beyalosi,

²⁵Hazori-Hadata, Keriyosi-Hezironi (nga shino nisho Hazori),

²⁶Amamu, Shema, Molada,

²⁷Hazari-Gada, Heshimoni, Besi-Peleti,

²⁸Hazari-Shuwali, Berisheba, Biziyoshiya,

²⁹Baala, Yimu, Ezemu,

³⁰Elitoladi, Chesili, Horuma,

³¹Zikulaga, Madimana, Sansana,

³²Lebayosi, Shilihimu, Ayini, atweela ni Rimoni. Bino byoosi atweela byaba biriimba kamakhumi kabili na syeenda, atweela ni bibyaalo byoosi bibibibotokheleele.

³³Biriimba bibyaba mu sina mwe bikoongo byaba Eshitawolu, Zora, Ashina,

³⁴Zanowa, Eni-Ganimu, Tapuwa, Enamu,

³⁵Jamusi, Adulamu, Soko, Azeka,

³⁶Sharayimu, Adisayimu, Gedera, Gederosayimu: bino byoosi atweela byaba biriimba likhumi na bine ni khutubakho bibyaalo bibibotokhelelewo.

³⁷Zenani, Hadasha, Migidali-Gadi,

³⁸Dilani, Mizipe, Jokese-Eli,

³⁹Lakishi, Bozikasi, Egiloni,

⁴⁰Kaboni, Lahimamu, Kitilishi,

⁴¹Gederosi, Besi-Dagoni, Naama, ni Makeda: byoosi atweela biriimba likhumi na bisesaba, ni khuutubakho bibyaalo bibibotokhelelewo.

⁴²Libuna, Eseri, Ashani,

⁴³Ifuta, Ashina, Nezibu,

⁴⁴Keyila, Akizibu, ni Maresha: byoosi atweela biriimba syeenda ni byaalo bibibotokhelelewo.

⁴⁵Ekuroni, ni khuuyililamo biriimba byawo ni bibyaalo byeene;

⁴⁶khukhwaama i Ekuroni khukhwoola khu nyaantsa imboofu, biifwo byoosi bibyaba andulo a Ashidodi, ni khuuyililamo bibyaalo byawo byeene.

⁴⁷Ashidodi atweela ni biriimba byasho ni bibyaalo byeene; Gaza, ni biriimba byasho ni bibyaalo byeene; khuutsya khwoola khu luutsi lwe Misiri, ni khukhwoola khu lwaakha khu nyaantsa imboofu.

⁴⁸Ni mu shibala she tsingoongo, Shamiri, Jatiri, Soko,

⁴⁹Dana, Kiriyasi-Sana (nga nisho Debiri),

⁵⁰Anabu, Eshitemosi, Animu,

⁵¹Gosheni, Holoni, ni Gilo; nga nibyo atweela bili biriimba likhumi na shitweela atweela ni bibyaalo byabyo.

⁵²Biriimba bibiindi byeesi baatubaasakho byaba biriimba bya Arabu, Duma, Eshani,

⁵³Janimu, Besi-Tapuwa, Afeka,

⁵⁴Humuta, Kiriyasi-Ariba (nga nisho Heburoni), atweela ni Ziyori; byoosi atweela biriimba syeenda atweela ni bibyaalo bibibibotokheleele.

⁵⁵Bibiindi nibyo bino, Mawoni, Karumeli, Zifu, Juta,

⁵⁶Jezureeli, Jokideyamu, Zanowa,

⁵⁷Kayini, Gibeya, ni Timuna, byoosi atweela nga byoola biriimba likhumi, atweela ni bibyaalo bibibibotokheleele.

⁵⁸Baatubaasakho ni Haluhuli, Besi-Zuri, Gedori,

⁵⁹Maara, Besi-Anosi, ni Elitekoni. Byoosi atweela biriimba bisesaba ni bibyaalo bibibibotokheleele.

⁶⁰Ni bibiindi bino, Kiriyasi-Baali (nga nisho Kiriyasi jeyarimu), ni Raba, nga nibyo biriimba bibili atweela ni bibyaalo bibibibotokheleele.

⁶¹Mu mubiimbi mwabamo biriimba Besi-Araba, Midini, Sekaka,

⁶²Nibushani, nga nisho shiriimba she kumuunyu, atweela ni Engedi, byoosi biriimba bisesaba ni bibyaalo bibibibotokheleele.

⁶³Ne babaandu ba Yuda sibawoonamwo mu Yerusalemu babaandu ba Yebusi babaaba bashimenyamo ta, isho shaakila ba Yebusi bashiimenya atweela ni babaandu ba Yuda khukhwoolesa ni shaleelo shino.