Read lumasaaba Yoswa 19 Bible Online

Yoswa 19 - lumasaaba bible

Yoswa 19

¹Shikuuka sha Simeoni nisho shisharobolebwa khuuba she khabili mu khufuna kumukabo kwe liiswa, khuusiintsiila khu bukuuka bukyeekhe bubwashibamo. Busikha bwaabwe bwe liiswa bwaba shisiintsa sha Yuda.

²Shisiintsa shino shabamo biifwo bino: Berisheba, Sheba, Molada,

³Hazari Shuwali, Bala, Ezemu,

⁴Elitoladi, Besuli, Horuma,

⁵Zikulaga, Besi Marikabosi, Hazari Susa,

⁶Besi Labawosi, ni Sharuheni: bino byoosi byaba biriimba likhumi na bitaru, ni khutubakho bibyaalo bibyesaanewo.

⁷Yabayo bibiindi nga Ayini, Rimoni, Eta ni Ashani: atweela biriimba bine ni khuutubakho bibyaalo bibyesaanewo.

⁸Shikuuka sha Simeoni shabamo ni biriimba atweela ni bibyaalo bibiindi, khuutsya khukhwoolela ilala i Baalasi Beri namwe bari Rama shishaba i Negevu namwe imwaalo. Buno nibwo bubwaba busikha bwa Simeoni, khuusiintsiila khu bukuuka bukyeekhe bubwashibamo.

⁹Liiswa lilyaba nga buusikha bwa Simeoni lyaba mukari mwe shisiintsa shishaweebwa shikuuka sha Yuda, lwekhuuba Yuda aafuna liiswa liikali naabi khufuurisa ni babaandu babaashibamo, shikila baabukulakho liiswa lilala baaliwa shikuuka sha Simeoni.

¹⁰Shikuuka sha Zebuluni nisho shishaba she khataru khuufuna kumukabo kwe liiswa, khuusiintsiila khu bukuuka bukyeekhe bubwashibamo. Lulwaakha lwe liiswa lyeesi baafuna lwatsya paka khukhwoolela ilala i Saridi.

¹¹Khuutsya kwe bukwanyaanga, lulwaakha lwatsya paka i Marala, lwaatsya lwekuunya khu Dabesheesi, lwelooselayo khukhwoola khu kheetsi Jokoneyamu.

¹²Lulwaakha luno lwatsya khukhwaama i Saridi lwaatsya kwe bwaamanyaanga mu shisiintsa sha Kisilosi Tabori, lwaatsya khukhwoola i Daberasi ni khukhwoola i Jafiya.

¹³Khukhwaama ano, lweloosela kwe bwaamanyaanga khukhwoola i Gasi Heferi ni Esi Kazini, lwaatsya lwekukhila i Rimoni, lwaweta lwaatsya kwe Neya.

¹⁴Ibweene iyo lulwaakha lwakatilila ingaaki lweekha kwe mwaalo khukhwoola i Hanasoni, lwaalola kwe bukwanyaanga lwoola khu Litila lya Ifutaheli.

¹⁵Shisiintsa shino sha Zebuluni shawaambilamo biriimba bibibotokhelelewo nga Katasi, Nahalali, Shimuroni, Idala ni Beselehemu, ni khutubakho ni bibyaalo bibibotokhelelewo byeene.

¹⁶Biriimba bino ni khutubakho ni bibyaalo bino atweela, nimwo mweesi bukuuka bukyeekhe bwa Zebuluni bwamenyatsaka nga buusikha bwaabwe.

¹⁷Shisiintsa she khaane shaweebwa shikuuka sha Isakaari, nga bakabananisamo bukuuka bukyeekhe.

¹⁸Shisiintsa shino shabamo bino: Jezureeli, Kesulosi, Shunemu,

¹⁹Hafarayimu, Shiyoni, Anaharasi,

²⁰Rabisi, Kishiyoni, Ebezi,

²¹Remesi, Eni Ganimu, Eni Hada ni Besi Pazezi.

²²Lulwaakha lwatsya lwekuunya khu Tabori, Shahazuma ni Besi Shemeshi, lwaatsya lwaakamila khu Yorudaani. Lulwaakha luno lwawaambilamo biriimba likhumi na bisesaba, ni khutubakho ni bibyaalo bibibotokhelelewo byeene.

²³Biriimba bino ni khutubakho ni bibyaalo bibibotokhelelewo byeene nimwo mweesi bukuuka bukyeekhe bwa Isakaari bwamenyatsaka nga busikha bwaabwe.

²⁴Shisiintsa she kharaano shaweebwa isi shikuuka sha Asheri, nga bakabananisamo bukuuka bukyeekhe.

²⁵Shisiintsa shino shabamo bino: Helikasi, Hali, Beteni, Akishafu,

²⁶Alameleki, Amadi, ni Mishali. Khu lubeka lwe bukwanyaanga lulwaakha lwatsya lwekuunya khu Karumeli ni Shihori Libunasi.

²⁷Lwatsya lwaweta kwe bwaamanyaanga khulola i Besi Dagoni, lwekuunya khu Zebuluni, ni khu litila lya Ifutaheli khuutsya kwe ngaaki khukhwoola i Besi Emeki ni Niyeli. Lwatsya lwakhalisa kwe bwaamanyaanga wa Kabulu,

²⁸Eburoni, Rehobu, Hamoni, ni Kanasi, ni khukhwoolela ilala khu shiriimba sha Sidoni.

²⁹Lulwaakha luno lwamala lwaweta kwe Rama, lwaatsya lwoola khu shiriimba she lumako sha Tuulo, lwanyuma lwaweta luundi khukhwoola i Hosa, lwaatsya lwaakamila khu nyaantsa imboofu Meditereniani. Lulwaakha luno lwaayililamo ni Mahalabu, Akizibu,

³⁰Uma, Afeki, ni Rehobu. Mu shikuuka sha Asheri mwabamo biriimba kamakhumi kabili ni bibili, ni khutubakho ni bibyaalo bibibotokhelelewo byeene.

³¹Biriimba bino ni khuutubakho ni byaalo bibibotokhelelewo byeene, nimwo mweesi bukuuka bukyeekhe bwa Asheri bwamenyatsaka nga buusikha bwaabwe.

³²Shisiintsa sha khasesaba shaweebwa isi shikuuka sha Nafutaali, nga bakabananisamo bukuuka bukyeekhe.

³³Lulwaakha lwasho lwaamila i Helefu, khukhwaamila isi kuusaala kuboofu kukuuli i Zaananimu, khuubirira i Adami Nekebu, ni Jabunilu, lwaatsya lwaamaliilisila khu Yorudaani.

³⁴Lulwaakha lwaweta lwaatsya kwe bukwanyaanga khuubirira i Azinosi Tabori, lweetsa lwaarurira i Hukoko. Lweekha kwe mwaalo lwetiila khu ndulo kwa Zebuluni, khuutsya paka i bukwanyaanga khukhwoola khu Asheri, khuutsya khukhwoola khu Yorudaani, lubeka lwe bukwanyaanga wa Yuda.

³⁵Biriimba bye tsimako bya Zidimu, Zeri, Hamasi, Rakasi, Keneresi,

³⁶Adama, Rama, Hazori,

³⁷Kedeshi, Edereyi, Eni Hazori,

³⁸Ironi, Migadali Eli, Horemu, Besi Anasi, ni Besi Shemeshi. Yabayo biriimba likhumi na syeenda ni khutubakho ni bibyaalo bibibotokhelelewo.

³⁹Biriimba bino ni bibyaalo byabyo nibyo bibyaba busikha bwa Nafutaali, nga baakabananisilemo bukuuka bukyeekhe.

⁴⁰Shisiintsa she kumusaafu shaweebwa isi shikuuka sha Dani, nga bakabananisamo bukuuka bukyeekhe.

⁴¹Bubalaayi bwe shiifwo she buusikha bwasho bwabamo bino; Zora, Eshitawolu, Iri Shemeshi,

⁴²Shalabini, Ayijaloni, Isila,

⁴³Eloni, Timuna, Ekuroni,

⁴⁴Eliteke, Gibesoni, Baalasi,

⁴⁵Jehudi, Bene Beraka, Gasi Rimoni,

⁴⁶Mejarikoni, ni Rakoni, ni khutubakho ni shiifwo shishalolelela i Yopa.

⁴⁷Babaandu be mu shikuuka sha Dani ni baarusibwakho liiswa ilyo, isho shaakila nibo baatsya bebwakala Leshemu, bashiwaamba, naluundi beeraka ni buli muundu yeesi uwashibamo. Baryo baatsya bamenya mu bweene umwo, bashuusa lisiina lyasho bashilaanga bari Dani, nga bashebulila umukuuka waabwe umutaayi.

⁴⁸Biriimba bino ni bibyaalo byabyo byeene nibyo bibyaweebwa isi shikuuka sha Dani, nga bakabananisamo bukuuka bukyeekhe.

⁴⁹Ni baaba nga baamalile khuukabananisamo liiswa khuuba busikha isi buli shikuuka, babaandu ba Isiraeli baakabilakho shisiintsa shitweela isi Yoswa umwaana wa Nuni, khuuba busikha bweewe.

⁵⁰Shino shaba nga Umukasya n'alakila. Baryo baamukabila shiriimba sheesi aakana, nga nisho Timunasi Sera, shishaba mu shibala she tsingoongo sha Efurayimu. Ibweene iyo Yoswa waamiliisa shiriimba shishabayo, waamenyatsaka iyo.

⁵¹Bino nibyo bibyaba biifwo byeesi umusaayi Eliyazari atweela ni Yoswa umwaana wa Nuni, ni khuutubakho ni baaraangilisi be bikuuka bye ba Isiraeli, baakabananisa isi bikuuka byoosi nga bakhupa bukokha. Shino baashikhola nga bali i Shilo, mu moni ts'Omukasya, iburaangisi we Lisari ly'Omukasya. Baryo baamaliilisa khuukabananisamo liiswa lyoosi.