Read lumasaaba Yoswa 21 Bible Online

Yoswa 21 - lumasaaba bible

Yoswa 21

¹Baaraangilisi be mu bukuuka bukyeekhe bwe mu shikuuka sha Levi, baatsya khuukanikha isi Eliyazari, umusaayi umukhulu, ni isi Yoswa Umusooleli wa Nuni, ni baaraangilisi be bukuuka bukyeekhe bubuundi bwe mu Isiraeli.

²Baaraangilisi bano baabatsyayo i Shilo mu shibala sha Kanani, baabalomela bari, “Umukasya aalakila khuubirira mu Musa ari, ifwe khuli ni khuuweebwa biriimba bye khuumenyamo, nga mulimo biifwo bye khukhwaayisilamo bibyaayo byeefwe.”

³Ari khukhwaama nga Umukasya n'aloma aryo, baaraangilisi be bikuuka bibiramile bye ba Isiraeli, baafukiilisana khuuwakho biriimba ni bibyaalo bilala isi shikuuka sha Levi.

⁴Shisiintsa shiikiboole shaweebwa isi khakuuka kha Kohasi. Ba Levi babaaba babetsukhulu ba Aroni umusaayi, baweebwa biriimba likhumi ba bitaru khukhwaama mu bisiintsa bya Yuda, Simeoni, ni sha Benyamini.

⁵Babaramile boosi be mu khakuuka kha Kohasi, nabo baaweebwa biriimba likhumi khukhwaama mu bisiintsa bya Efurayimu, Dani, ni shitweela khu bisiintsa bya Manase she bukwanyaanga.

⁶Babaandu be mu khakuuka kha Gerishoni, baaweebwa biriimba likhumi na bitaru, khukhwaama mu bisiintsa bya Isakaari, Asheri, Nafutaali, ni shisiintsa sha Manase she bwaamanyaanga.

⁷Babaandu be mu khakuuka kha Merari, nabo beetsa buli baandu muungo tsaabwe nabo baweebwa biriimba likhumi na bibili khukhwaama mu bisiintsa bya Rewubeni, Gadi ni Zebuluni.

⁸Baryo ba Isiraeli baakabila bukuuka bwa Levi biriimba ni bibyaalo ibyo byeesi Umukasya aalakila khuubirira mu Musa.

⁹Khukhwaama mu bikuuka bya Yuda ni Simeoni, baakabananisa biriimba mu masina kano,

¹⁰isi babetsukhulu ba Aroni, babaaba bali be khakuuka kha Kohasi, uwaba uwe muunda ya Levi. Nibo babaanyoowa khuuweebwa, lwekhuuba khakokha khakhaanyoowa khaakwa khu nibo.

¹¹Baabakabila nibo shiriimba sha Kiriyasi Ariba (Ariba aba kuukawe wa Anaki), ari shishilaangibwa bari Heburoni, ni khuutubakho bibyaalo bye khukhwaayisilamo bibyebotokhelelawo, mu shibala she tsingoongo sha Yuda.

¹²Ne khuurusakho ndi kimikuunda ni bibyaalo bibyebotokhelela shiriimba baaba baabikabila Kalebu umwaana wa Jefune, khuuba busikha bweewe.

¹³Baryo babetsukhulu ba Aroni umusaayi baabakabila Heburoni shishaba shiriimba she bubwilukhilo shooyo uwaba nga weerire umuundu, Libuna,

¹⁴Jatiri, Eshitemowa,

¹⁵Holoni, Debiri,

¹⁶Ayini, Juta, ni Besi Shemeshi, khuuyililamo atweela ni kamaayilo keene, nga byoosi atweela bili biriimba syeenda khukhwaama mu Yuda ni Simeoni.

¹⁷Khukhwaama mu shikuuka sha Benyamini, nibo baaweebwa biriimba bino, ni bibyaalo byawo bibibotokhelelewo: Gibiyoni, Geba,

¹⁸Anasosi, ni Alumoni; nga bino bili biriimba bine.

¹⁹Biryo biriimba likhumi na bitaru byaweebwa isi basaayi nga nibo babaaba babetsukhulu ba Aroni.

²⁰Ne babaaramile boosi babaama mu bikuuka bya Kohasi, nga nibo be muunda ya Levi, baafuna biriimba likhumi ni bibyaalo bibibotokhelelewo, nga babirusa khu shikuuka sha Efurayimu.

²¹Bano nibo baaweebwa shiriimba sha Shekemu, atweela ni bibyaalo bibibotokheleelewo, nga nisho shishaba shiriimba she bubwilukhilo bw'oyo uwaba weerire uwashe akhali khuushitsililila ta, ni Gezeri,

²²Kibuzayimu, atweela ni Besi-Horoni ni khuuyililamo bibyaalo bibibotokhelelewo, nibyo biriimba bine.

²³Biriimba bibiilakho bino atweela ni bibyaalo byawo bibibotokhelelewo byaweebwa isi basaayi be mu shikuuka sha Dani: Eliteke, Gibesoni,

²⁴Ayijaloni, ni Gasi-Rimoni; byoosi atweela biriimba bine.

²⁵Ni khukhwaama mu shisiintsa she khabili shishiramile she shikuuka sha Manase, ba Levi baaweebwa biriimba bino atweela ni bibyaalo byawo bibibotokhelelewo: Taanaki ni Gasi-Rimoni atweela biriimba bibili.

²⁶Biryo biriimba bibiramile likhumi ni bibyaalo byawo bibibibotokheleele, byaweebwa isi bukuuka bukyeekhe bwe shikuuka sha Kohasi.

²⁷Babetsukhulu ba Gerishoni nga nibo batweela khu be mu shikuuka sha Levi, baafuna biriimba bibili ni bibyaalo byawo bibibibotokheleele, nga babyaamisa khu shitweela khu bisiintsa bya Manase, nga nibyo Golani shishiili mu Bashani, nga nisho shiriimba she bubwilukhilo, ni Be-Eshitera; nibyo biriimba bibili.

²⁸Khukhwaama khu shikuuka sha Isakaari baafuna biriimba Kishiyoni, ni Daberasi,

²⁹Jarimusi, ni Eniganimu, nga nibyo biriimba bine ni khutubakho bibyaalo byawo bibibibotokheleele.

³⁰Be mu shikuuka sha Asheri baafuna biriimba Mishali, Abudoni,

³¹Helikasi, ni Rehobu, nga nibyo biriimba bine ni khutubakho bibyaalo byabyo bibibotokheleele.

³²Khukhwaama khu shikuuka sha Nafutaali, baafuna Kedeshi shishiili mu Galilaaya; nga nisho shiriimba she bubwilukhilo, ni Hamosi Dori, ni Karitani, nga nibyo biriimba bitaru ni khutubakho bibyaalo byawo bibibotokheleele.

³³Biryo biriimba bitaru ni bibyaalo bibibotokhelelewo byaweebwa isi shikuuka sha Gerishoni.

³⁴Ba Levi babaaramile nga nibo be mu khakuuka khakyeekhe kha Merari, baafuna biriimba khukhwaama khu shikuuka sha Zebuluni, nga nibyo Jokineyamu, Karita,

³⁵Dimuna, ni Nahalali, byoosi atweela nga nibyo biriimba bine ni khutubakho bibyaalo byawo bibibotokhelelewo.

³⁶Khukhwaama khu shikuuka sha Rewubeni, ba Levi baafuna biriimba Bezeri, Jahazi,

³⁷Kedemosi, ni Mefaasi, ni khutubakho bibyaalo byawo bibibotokhelelewo.

³⁸Khukhwaama khu shikuuka sha Gadi, baafuna biriimba Ramosi shishiili mu Gileyadi nga nisho shiriimba she bubwilukhilo, ni Mahanayimu,

³⁹Heshiboni, ni Jazeri, nga nibyo biriimba bine ni khutubakho bibyaalo byawo bibibotokhelelewo.

⁴⁰Nashiryo biriimba likhumi na bibili nibyo bibyaweebwa khakuuka khakyeekhe kha Merari khe shikuuka sha Levi.

⁴¹Biryo biriimba ni bibyaalo bibyaweebwa ba Levi atweela byoosi mu shibala sha Isiraeli byoola kamakhumi kane na shinaane.

⁴²Buli shitweela khu biriimba bino byabakho ni bibyaalo bibibotokhelelewo bye khukhwaayisilamo.

⁴³Musaambo yino, Umukasya waakabila ba Isiraeli shibala shoosi sheesi etsubila bakuuka baabwe ari alishibawa. Nashiryo ba Isiraeli ni baamala khuuwoonamwo babaandu baamwo, baashimenyamwo.

⁴⁴Aabawo baasiku babaaba nga bashiiliwo khuusoolanisa ba Isiraeli, ne Umukasya wolelesa shisuubiso sheewe, khuubona ari babaandu beewe bamenya mu lukoosi. Nga abe buli mbuka isi ba Isiraeli baatsiila mu busoolo ni baasiku baabwe, nga Umukasya Wele abayeeta khuubawula, nga mbaawo unyalisa khuuwula ba Isiraeli ta.

⁴⁵Mbaawo shisuubiso na shitweela sheesi Umukasya aalomela ba Isiraeli shishikhoolelela ta. Byoosi byeesi aaloma byoolelela buulayi.