Read lumasaaba Yoswa 23 Bible Online

Yoswa 23 - lumasaaba bible

Yoswa 23

¹Mu mbuka indeeyikho, Umukasya ayeeta ba Isiraeli khuumenya mu lukoosi ni babesanwa baabwe, ni Yoswa naye aryo wahangala khuumala kimiiko mikali.

²Shifukhu shitweela, Yoswa walaanga luubuusano lwe baaraangilisi be bikuuka bye ba Isiraeli khukhwiitsa atweela, nga mulimo baasakhalu, baakayi, ni khuutubakho ni baakhulu be mu Isiraeli babaandi. Kila abalomela ari: “Ise ari ndi umuundu umusakhulu naabi.

³Inywe mwabeene mwabona isaambo isi Umukasya Wele weenywe aabasoolanilamo, waabayeeta khuuwula kamanaambo ni khuubanyalisisa khuuyila shibala shino.

⁴Ne bona ari ise naabakabananisile liiswa lyaabo beesi khushiili khusoolanisa khwaawula ta, khuuba nga buusikha bweenywe. Ni khuutubakho ni liiswa lyaabo beesi khwamala khaale khuusoolanisa khwaawula, khukhwaamila ilala khu luutsi Yorudaani, khukhwoolela ilala khu nyaantsa imboofu Meditereniani.

⁵Umukasya Wele weenywe kane abayeete khuuwoonamwo babaandu babaamenyamwo ari, ni nanywe muryo mwiyilile liiswa lino libe lilyeenywe. Shiryo nga Umukasya Wele weenywe umweene n'abasuubisa.

⁶“Nashiryo ni mwiilemo kamaani khuubona muri, mukhola biilakilo byeesi Musa aarona mu shitabo she Kamakaambila. Mukhakhakakho mwaakaruramo musaambo yoosi ta.

⁷Mukhabakho ni khuukholakana ni kamanaambo kakaabebotokheleele inywe ta. Mukhesaaya ba wele baabwe, namwe mwewunamila isi bifwaani byaabwe, namwe mwaakholakho bisuubiso byoosi isi ba wele baabwe na khakyeekhe khoosi ta.

⁸Ne ni mube babeyikinwa isi Umukasya weenywe, nga ni mubeelatsakile khukhwoolesa shaleelo shino.

⁹“Umukasya aabayeeta inywe khuwoonamwo kamanaambo kakaali ke kamaani khuubafuurakho inywe, naluundi mbaawo n'umuundu na mutweela uwanyalisa khukhwiimikhawo khuubakhaandisa inywe ta.

¹⁰Umuundu mutweela mwiinywe aanyalisa khuuwula baasiku shikana shitweela shibuufu, lwekhuuba Umukasya Wele weenywe aabasoolanila inywe nga n'abasuubisa.

¹¹Nashiryo ni mwitsiliilise khuubona muri, inywe mwabeene mukana naabi Umukasya Wele weenywe.

¹²Lwekhuuba inywe ni kane mushuukhe murure khu Wele, mwibowe khu baandu babaaramawo be khu manaambo kano, murakikhe khuuyilana ni nabo: nga inywe muyila bakhasi baabwe ni nabo nga bayila babeenywe,

¹³ni mushimanyile ilala muri, Umukasya Wele weenywe singene eloosele khuubawoonamwo mu shibala shino ta. Akhali ndi nibo kane babe busa nga kumureko isi muli, babe nga babatsiinisa inywe naabi, bafwaane nga kamawa mu moni tseenywe. Nashiryo balibamalilawo inywe ilala khukhwaama mu shibala shino, abe sheesi Umukasya Wele weenywe abaweele inywe.

¹⁴“Ne bona ise ari ndi aambi khuufwa nikhilile kwe makoombe. Ni nanywe mwaashimanyila ilala mu myoyo kyeenywe muri, buli shiindu shoosi sheesi Umukasya Wele weenywe aabasuubisa, shishibawaamba khusiinywe, shaayolelela. Mbaawo na shitweela shishikhoolelela ta.

¹⁵Ne ni mumanye muri, khukhwaama nga Umukasya Wele weenywe, n'abaweele bibiindu biilayi byeesi aabasuubisa nywe, ndi niye umweene kane abareerekho bisiro biikali siinga inywe mumumiinyaalila. Niye kane abahesele ilala mweesi muwewo, khukhwaama mu shibala shino shilayi sheesi abakabiile nywe.

¹⁶Inywe siinga mufuniaaka indakaano y'Omukasya Wele weenywe, mweela khukhwisaaya ni khukhwakaanisa ba wele babaandi, lirima lya Wele kane libe liikali naabi, ni nanywe muryo muhelele ilala, ilekhe khuramawo na mutweela mu shibala shino shilayi sheesi abaweele ta.”