Read lumasaaba Yoswa 3 Bible Online

Yoswa 3 - lumasaaba bible

Yoswa 3

¹Kumutikhinyi mu mamilimili, Yoswa ni babaandu ba Isiraeli boosi baawuuna naabi, baabuusa bibiindu byaabwe baarura i Shitimu. Baakyeenda baatsya boola khu luutsi Yorudaani, isi baawolela nga bashiili khwaambukha ta.

²Lwanyuma lwe biifukhu bitaru, baakhulu baabwe baatsya baabakyeendamo

³nga bababoolela bari, “Nga mwaaboone basaayi, nga nibo ba Levi, baasutile isanduuku iye kamakaambila y'Omukasya Wele weenywe, mwinyukhilakho mubaloondekho.

⁴Shino shibayeete inywe khuumanya intsila shiina iye khuutsyakho, lwekhuuba inywe mwaakhwiitsaatsakakho ino ta. Ne mukhababaakho naabi ta, mubalekhelayo buuleeyi bwe lukyeendo inyuma waabwe, lulwoola nga i kilomita ndweela.”

⁵Yoswa waalomela babaandu ari, “Nimwimiliise, mwiŋoonaŋoonele kumukaamba, lwekhuuba Umukasya atsya khukhola bibiindu biikali bibiyangisa akari mwiinywe.”

⁶Lwanyuma waalomela basaayi ari, “Ni musute Isanduuku iye Kamakaambila, mukhuraangilile khukhwaambukha luluutsi Yorudaani.” Baryo basaayi nabo baasuta Isanduuku iye Kamakaambila, baraangila ibweeni.

⁷Umukasya waalomela Yoswa ari, “Khuurakikha ni shaleelo shino, ntsya khukhwookesanisa babaandu bano ndi, iwe uli umuraangilisi waabwe. Naluundi bashimanye bari ise ndi atweela ni nawe nga ni naba ni Musa.

⁸Ari boolela basaayi babaasuta Isanduuku iye Kamakaambila uri, nga baatsiile boolile khu meetsi ka Yorudaani, bakeemikhemo.”

⁹Kila Yoswa akanikha isi babaandu ba Isiraeli ari, “Ni mwisyeende ano aambi, murekeerese bilomo byeesi Umukasya Wele weenywe abalomela.

¹⁰Nga ni mwiloosela khuutsya mu moni, mutsya khushimanya muri, Wele umulamu niye ali atweela ni nanywe. Naluundi mumanye muri, atsya khutimisa khukhwaama mu shibala shino, babaandu be kamanaambo kano: ba Kanani, ba Hiti, ba Hivi, ba Perizi, ba Girugashi, ba Amori, ni ba Yebusi, nga inywe mwaabebwakalile.

¹¹Bona Isanduuku iye Kamakaambila y'Omukasya, uuli Umukasya we shibala shoosi, ili khuutsya mu luutsi Yorudaani, iburaangisi weenywe.

¹²Nashiryo nimwiroboleleyo basaani likhumi na babili, khukhwaama mu bikuuka likhumi na bibili bya Isiraeli, umuundu mutweela khukhwaama mu buli shikuuka.

¹³Nga basaayi babaasutile Isanduuku iye Kamakaambila y'Omukasya, uuli Umukasya we shibala shoosi, baatsiile beemile mu meetsi ka Yorudaani, kane kaakame khukhwiikha. Ni kameetsi kakaama ingaaki, kane kebuuse busa mu shifwo shitweela.”

¹⁴Baryo ba Isiraeli baabuusa bibiindu byaabwe, baarekukhawo baatsya, nga basaayi baasutile Isanduuku bakyeendela iburaangisi waabwe.

¹⁵Beetsa boola khu Yorudaani. Ne kameetsi kaaba nga ketsuule katimila khu ngaaki busa, nga ni kaakholatsaka mu mbuka iye likyesa. Ne basaayi babaaba baasutile Isanduuku ni basaamba bikyele byaabwe khu meetsi bari,

¹⁶kameetsi khukhwaama shangaaki kaakama khukhwiikha, kebuusa kuyuuyi busa lwe ngaaki i shiriimba shishilaangikha Adamu, aambi ni Zaresani. Ni kameetsi kakaaba keekha khuutsya mu nyaantsa ye Araba lwe mwaalo, kaaba kaakhalikhilekho ilala. Ni babaandu baambukha nga babaambukha khuutsya i Yeriko.

¹⁷Basaayi babaaba baasutile Isanduuku iye kamakaambila y'Omukasya, baaba nga beemikhile akari mu Yorudaani khu lwoomu, ni babaandu baabiramo busa nga babaabirira khu lwoomu. Shino shakholekha khukhwoolisa babaandu ba Isiraeli boosi ni baamala khukhwaambukha.