Read lumasaaba Yoswa 4 Bible Online

Yoswa 4 - lumasaaba bible

Yoswa 4

¹Nga linaambo lyoosi lye babaana ba Isiraeli lyaamalile khukhwaambukha luluutsi Yorudaani, Umukasya waalomela Yoswa ari,

²“Robolayo basaani likhumi na babili, mutweela mutweela khukhwaama mu bikuuka likhumi na bibili,

³ubalakile buli mutweela asute libaale litweela, khukhwaama mu shifwo mweesi basaayi beemikhile akari mu Yorudaani. Ubaboolele bakasute batsye ni nako, bakare mu shifwo mweesi munawolela shiilo shino.”

⁴Aryo Yoswa waalaanga atweela basaani tsana likhumi na babili beesi aarobola,

⁵waabalomela ari, “Ni mutsye akari mu luutsi Yorudaani isi Isanduuku iye kamakaambila y'Omukasya Wele weenywe ili. Buli mutweela abukule libaale litweela, alisute khwibeka lyeewe, alireere isi khubuusaniile. Inywe muli likhumi na babili, ni kamabaale nako kabe likhumi na kabili, lwe bikuuka likhumi na bibili bye ba Isiraeli.

⁶Kamabaale kano kabe khaabonelo isi muli. Nyaanga iburaangisi nga babaana beenywe baabareebile bari, ‘Kamabaale kano kamanyisa shiina?’

⁷Nio nanywe mubaboolele muri, kameetsi ke mu luutsi Yorudaani kaakama khukhwiikha, nga Isanduuku iye kamakaambila y'Omukasya yakoolamo, nga khwaambukha. Kamabaale kano kali she khuushebulila isi babaandu ba Isiraeli boosi, biilo ni biilo.”

⁸Baryo basaani bano baaloondelela bilakilo byeesi Wele aawa Yoswa khuubawa. Baatsya baabukula kamabaale likhumi na kabili khukhwaama akari mu Yorudaani, buli litweela lwe shikuuka shitweela she ba Isiraeli. Baakasuta, baakayila isi baawolela, baakara aasi.

⁹Yoswa waara kamabaale likhumi na kabili tsana ako akari mu Yorudaani, mu shifwo mubweene mweesi basaayi beemikha nga baasutile Isanduuku iye Kamakaambila. Ni kamabaale kano kashiiliwo ni shaleelo shino.

¹⁰Basaayi abo babaasuta Isanduuku iye Kamakaambila baarama nga beemile mu shifwo isho, khukhwoolesa bibiindu byoosi ni byawa, byeesi Umukasya aalakila Yoswa ari babaandu bakhole. Shino nisho shisheene sheesi Musa alomela Yoswa khuukhola. Baryo babaandu baayuubakho khaangu khukhwaambukha luluutsi.

¹¹Baryo babaandu boosi nga baamalile khukhwaambukha, basaayi babaaba baasutile Isanduuku iye Kamakaambila y'Omukasya nabo baambukha, beetsa shanjelekha iburaangisi we babaandu boosi.

¹²Basaani khukhwaama mu shikuuka sha Rewubeni, ni shikuuka sha Gadi, ni shisiintsa she khabili she shikuuka sha Manase, baambukha baatsya iburaangisi we ba Isiraeli boosi. Baaba nga bakwaarire, beerekekhile lwe buusoolo nga Musa n'abalomela.

¹³Bano boosi baaba boola basaani kimikaanda kine (40,000), nga baakwaarire bye busoolo. Baatsya nga bali mu buraangilisi bw'Omukasya, boola mu misaleela kye Yeriko.

¹⁴Khu shifukhu shino, Wele waareerera babaandu ba Isiraeli khukhwiisamo Yoswa lukoosi, nga bamanya bari ali umusaani umukhulu naabi. Baamwiisamo lukoosi biifukhu byoosi bye buulamu bweewe, nga ni beesamo Musa lukoosi.

¹⁵Lwanyuma Umukasya waalomela Yoswa ari,

¹⁶“Lakila basaayi babaasutile Isanduuku iye Kamakaambila, baniine barure mu Yorudaani.”

¹⁷Yoswa waakhola aryo nga Umukasya n'amulomela.

¹⁸Baryo basaayi baaniina baarura mu luutsi, nga baasutile Isanduuku iye Kamakaambila. Ne khaangu nga ni baaruramo khuusaamba khu lwoomu bari, kameetsi ka Yorudaani kaarakikha luundi khukhwiikha, nga ketsuule nga makiboole ni kaaba.

¹⁹Khu shifukhu she likhumi she kumweesi kukuunyoowa, babaandu baarura khu Yorudaani, baatsya ndi baawolela i Gilugaali, khu luwaande lwe bukwanyaanga wa Yeriko.

²⁰Basaani babaaba baasutile kamabaale likhumi na kabili khukhwaama mu Yorudaani, baakareerera Yoswa. Naye Yoswa waakarawo i Gilugaali nga she khuushebulililakho.

²¹Waalomela babaandu ba Isiraeli ari, “Mu miiko kikiitsa iburaangisi, nga babaana beenywe baabareebile bari, ‘Kamabaale kano kamanyisa shiina?’

²²Mulibaboolela muri, ‘Ba Isiraeli baabira mu luutsi Yorudaani nga babaabirira khu lwoomu busa.’

²³Lwekhuuba Umukasya Wele weenywe, omelesa kameetsi ke luluutsi Yorudaani, nio babaandu baambukha. Isho sheesi Umukasya aakhola khu nyaantsa Imbesemu nio khwaambukha, nisho shitweela sheene sheesi aakhola.

²⁴Shino kane shikile babaandu boosi be khu shibala bamanye bari Umukasya Wele ali umunyali wa byoosi. Naluundi bamanye bari akana fweesi khumwiisaaye niye.”