Read lumasaaba Yoswa 5 Bible Online

Yoswa 5 - lumasaaba bible

Yoswa 5

¹Bayiinga boosi be ba Amori babaaba khu luwaande lwe bukwanyaanga wa Yorudaani, ni bayiinga be ba Kanani babaaba khu ndulo khwe nyaantsa imboofu Meditereniani, ni baawulila isaambo isi Umukasya omelesamo kameetsi ke luluutsi Yorudaani, khukhwoolesa ba Isiraeli ni baambukha, baaba ni khuurya khuukali naabi, luundi baawamo kamaani ke khusoolana ni ba Isiraeli.

²Khu mbuka iyo Umukasya waalomela Yoswa ari, “Khola kimibano khukhwaama mu mabaale, ukhebe ba Isiraeli boosi babashiili khukhwiinjila imbalu ta.”

³Aryo Yoswa waakhola kimibano nga Umukasya n'amulakila, waakhebela babaandu imbalu khu khakoongo khakhalaangibwa bari Haraloosi.

⁴Ilomo iyakila nio Yoswa waabakheba imbalu niyo yaba ndi, basaani boosi babaama i Misiri, abo boosi babaaba basoolani, baaba bafwiila mu mubiimbi.

⁵Babaandu boosi babaama i Misiri baaba baayinjila imbalu, ne abo boosi babaasaalikhila khu lukyeendo mu mubiimbi, baaba bashiili khukhwinjila imbalu ta.

⁶Ba Isiraeli baakyeendaana mu mubiimbi khuumala kimiiko kamakhumi kane. Isho shaakila abe basaani boosi babaaba basoolani, baaba baafwa, lwekhuuba baamiinyaalila likono ly'Omukasya. Khukhwaama makiboole abe Umukasya waabalayilila ari, mbaawo umuundu ulibona khu shibala shiyiindifu, luundi shishirurukukhamo kamabeele ni bubuushi bwe ntsukhi, sheesi aasuubisa bakuuka baabwe ta.

⁷Basaani bano baaba baasaala basooleli, ne abe bashiili khukhwiinjila imbalu ta. Nashiryo baaba babeene bano nibo beesi Yoswa aakheba imbalu.

⁸Lwanyuma lwe khuukhebebwa imbalu khuno, babaandu boosi baarama iyo isi baawolela mwibuusanilo lyaabwe, khukhwoolesa kamakoonstyo kaabwe ni kaawona.

⁹Lwanyuma Umukasya waalomela Yoswa ari, “Shaleelo shino naabarusilekho buukhomo bwe khuulaangibwa bari baakulwa mu Misiri.” Shino shaakila shiifwo isho baashilaanga lisiina bari Gilugaali khukhwoolesa ni shaleelo shino.

¹⁰Baryo ba Isiraeli beloosela khuumenya isi baabuusanila awo i Gilugaali, aambi ni kimisaleela kye Yeriko. Abweene awo, khu shifukhu she likhumi na bine she kumweesi kweene ukwo, baaliilawo Kamayiiya ke Khuubirakho.

¹¹Khu shifukhu shisheelakho nikhwo khweesi baaliila biilyo bibinyoowa, bibyaama mu shibala isho: nga niyo iŋaano intsoshe ni kumukaati kukukhabiimba ta.

¹²Ni khukhwaamila khu shifukhu isho, khweesi baaliila biilyo bibyaama mu shibala isho, biilyo maanu byaakama khuukwa. Naluundi khukhwaamila abweene awo, baaba nga balya biilyo bibyaba bitsowa mu Kanaani.

¹³Shifukhu shitweela nga Yoswa ali aambi ni Yeriko, wenyusa tsimoni waabona nga iliwo umusaani umwiimile aleeyikho ibweeni weewe. Umusaani uyu aaba waawaambile lurima mu mukhono kweewe, kila Yoswa amwiisyeendawo aambi, weenamisa kumurwe kweewe aasi, waamureeba ari, “Iwe uli mutweela khu baselikhale beefwe, namwe uli umusiku?”

¹⁴Umusaani uyo naye waamwiilamo ari, “Ise siindikho ni lubeka ta. Ne ndi ano lwekhuuba ise niye umukhulu we liiye ly'Omukasya.” Yoswa weenama aasi khu meesikamo keewe, waamwiisaaya. Lwanyuma waamulomela ari, “Ise ndi umwakaanisi woowo, ari mboolele she khuukhola.”

¹⁵Kila umukhulu we liiye ly'Omukasya uyo amulomela ari, “Ari yinyusamo bilaalo byoowo, lwekhuuba shiifwo shino khweesi wiimikhile, shili shikhosefu.” Yoswa naye wenyusamo bilaalo byeewe.