Read lumasaaba 2 Basesalonika 1 Bible Online

2 Basesalonika 1 - lumasaaba bible

2 Basesalonika 1

¹Ise Paulo ni Silasi ni Timosewo, khubaronela inywe bafukiilisi mu Yesu be Sesalonika, babaali babaandu ba Wele Paapa weefwe, n'Umukasya Yesu Kristo.

²Bubweela ni lukoosi bibyaama isi Wele Paapa n'Umukasya Yesu Kristo, bibe ni nanywe.

³Bebuulebe, shikhwaakhila ifwe khuusiima Wele khulweenywe buli ndaalo tsoosi, luundi shilayi naabi lwekhuuba khuufukiilila khweenywe khulikho khutsowa naabi, ni khuukana khweesi buli mutweela khwiinywe ali nakhwo isi uwashe khulikho khwiloosela.

⁴Ni nesho nisho shikila ifwe khwebuyila khulweenywe mu bafukiilisi boosi mu Yesu, khulwe khuwandalala ni khufukiilila khweesi muli nakhwo, akari mu khukubyeengebwa ni bitaambiso byeesi mulikho mwikhaliilikha.

⁵Shino nisho shiŋaŋasa shiri khuukhala kumusaango khwa Wele khuli khwa ŋali, ni shishaamamo inywe mubalibwile khuubo babaakhila Buyiinga bwa Wele, bubuuli khukila inywe mutaambisibwe.

⁶Wele ali uwa ŋali, ibo babaabakholesa inywe shiisa, umweene alibaliyila ni shitaambiso.

⁷Ni nanywe babataambisibwa, muliweebwa kumwikhoyo atweela ni nafwe, nyaanga nga Umukasya Yesu wabonekhele ni bamalayika beewe be kamaani, khukhwaama mwikulu ni kumulilo kukumesamesa.

⁸Abo babekaana Wele, ni naabo bakhafukiilila Kamakhuuwa Kamalayi k'Omukasya weefwe Yesu ta, niye alibawa shitaambiso.

⁹Babeen'abo balinyoola shitaambiso she khuhela khwe biilo ni biilo, luundi babekalile ibulafu balekhe khuba mu moni ts'Omukasya ta, ni khulekha khuba mu shiriifwa she Kamaani keewe ta.

¹⁰Umukasya n'aliitsa khu shifukhu isho, alinyoola shiriifwa khukhwaama mu bakhosefu beewe boosi babafukiilila. Ni nanywe muliba batweela khu nibo, lwekhuuba mwafukiilila buurume bweesi khwababoolela inywe.

¹¹Ni lwe lomo yino, ifwe khubeele khubaloombela inywe naabi bifukhu byoosi khuri, Wele weefwe abakaluse inywe khuuba babaakhila khulaangibwa khweewe, naluundi khuri, lwe kamaani keewe, olelese isho shishiili shilayi ni buraambi buulayi bwe khufukiilila khweenywe.

¹²Mu shino khuloomba khuri, lisiina ly'Omukasya Yesu linyale khuufuna shiriifwa mus'iinywe, lwe bubweela bwa Wele weefwe, n'Umukasya Yesu Kristo.