Read lumasaaba 2 Basesalonika 2 Bible Online

2 Basesalonika 2 - lumasaaba bible

2 Basesalonika 2

¹Ne ari be buulebe, bibiwaamba khu bilomo bye khukhwiitsa khw'Omukasya weefwe Yesu Kristo, ni khubuusanisibwila atweela is'ali, khubekontselela khuri,

²mulekhe khuyeŋaana wangu muryo mukhwaambaasa khweenywe, namwe khukhwisindukha kimyoyo kyeenywe ta. Nga bino bireerebwa lwe bye buŋoosi, namwe khuboolela, namwe ibaluwa, bibifwaana nga bibyaama isi Mwoyo Umukhosefu, namwe nga bibyaama isi khuli nga biloma biri shifukhu sh'Omukasya shayiitsa khaale.

³Mukhafukiilila umuundu yeesi khubawombesa na khafwiiti khoosi ta. Lwekhuuba shifukhu isho sishiliitsa ta, khurusakho nga bumiinyi bwanyoowele khukhwiitsa, n'umuundu uwe khukhwoneka nga bamalile khumurumbula, niye umuundu we khuhela.

⁴Niye alikhaandisana luundi eniinise naabi khufuura buli shiindu shoosi shishilaangibwa shiri wele, namwe sheesi besaaya, nio ekhale Mwisaayilo Likhulu lya Wele, nga eyokesana ari niye Wele.

⁵Inywe si mushebulila muri, nga ise ni naba ni nanywe nababoolela bibiindu ibyo byoosi ta?

⁶Ne ari mwaamanyile muri iliwo shimuwaambiliile niye khubonekha, nio bari amanyikhe lubuula khu mbuka inyene.

⁷Lwekhuuba ari shimoonyo she kamaani ke bubwoonaki shiliwo shiraamba, ni nooyo ushiwaambiilila kane eloosele khukhola aryo khukhwoolesa ni balimurusawo.

⁸Nio lwanyuma balirumbula umuundu uwe bubwoonaki uyo, n'Umukasya Yesu Kristo alimuhesa nga araambisa kumuukha kwe mukhanwa mweewe, luundi amwiirire ilala ni khuumulikhamulikha khwe khukhwiitsa ni khubonekha khweewe.

⁹Khukhwiitsa khw'omuundu uwe bubwoonaki uyo khuliba khulwe buraambi bwe kamaani ka Sitaani, nga kabonekhela mu khukhola bye kamakaanga byoosi ni bye khukhwiyaangisa bye bubeeyi,

¹⁰ni khukhola bye bubwoonaki bwoosi, khuborosa ibo babaatsya khuhela. Babeene ibo balihela lwekhuuba baayikaana khukana bwa ŋali nio manya bawonesebwe.

¹¹Ni lwe lomo yino, Wele abasiindikhila nibo khuborokha khwe kamaani khuraambile mu nibo nio akile bafukiilile bye bubeeyi.

¹²Ni shishaamamo babaakhalile nibo boosi kumusaango ibo babaakhafukiilila bya ŋali ta, ne bekhoyela bubwoonaki.

¹³Bebuulebe, shikhwakhila ifwe khusiima Wele busheele khu lweenywe, nga ni muli babaandu beesi niye akana naabi. Lwekhuuba khukhwaama makiboole, Wele abarobola inywe ari muwonesebwe khulwe khuwaanibwayo buraawa n'Umwoyo, ni khulwe khufukiilila mu bwa ŋali.

¹⁴Wele abalaangila inywe shino khuubirira mu Makhuwa Kamalayi keesi ifwe khwababoolela, ari nio munyale khunyoola shiriifwa sh'Omukasya weefwe Yesu Kristo.

¹⁵Ni nashiryo be buulebe, ni mwiimikhe ni kamaani, luundi muwandalalile mu byeesi khwabawa, nga khubaleekela khuubirira mu lomo namwe mu baluwa yeefwe.

¹⁶N'Umukasya weefwe Yesu Kristo umweene ni Wele Paapa weefwe uwakhukana ifwe, luundi wakhuwa ifwe khuwandalala khukhawawo ta, ni kumwiyikino kumulayi khulwe bubweela,

¹⁷abekhoyese kimyoyo kyeenywe, luundi abawandalase mu buli buraambi bulayi ni mu byeesi mukanikha.