Read lumasaaba 2 Basesalonika 3 Bible Online

2 Basesalonika 3 - lumasaaba bible

2 Basesalonika 3

¹Ni bibyaakamayo be buulebe, ni mukhuloombele manya Ilomo y'Omukasya yeloosela khuubalaayisibwa khaangu ni kamaani, luundi shiisiwemo shiriifwa nga ni shaba mus'iinywe;

²luundi mukhuloombele Wele akhuwonese khukhwaama khu baandu baboonaki luundi baabi, lwekhuuba sishili ndi boosi bali ni khuufukiilila ta.

³Ne Umukasya mwiyikinwa, niye alibawandalasa luundi abaliinde khukhwaama isi umusiku.

⁴Ifwe khuli ni bubwiyikinwa mu Mukasya khuri, inywe mulikho mukhola bibiindu biilayi, luundi kane mwiloosele khukhola ibyo byeesi khwabalomela.

⁵N'Umukasya araangilile kimyoyo kyeenywe mwoole mu khukana khwa Wele ni khukhwikhalilikha khwa Kristo.

⁶Bebuulebe, khubalakila mu lisiina ly'Omukasya Yesu Kristo khuri mwiyawule khukhwaama khu buli uwe buulebe yeesi ukyendaana busa luundi nga s'amenya musaambo yeesi khwabaleekela inywe ta.

⁷Lwekhuuba inywe mwabeene mwaamanya nga ni mwaakha khuulondelela ifwe nga ni khwakholatsaka, lwekhuuba ifwe ni khwaba khuli ni nanywe, si khwakyeendaanatsaka busa,

⁸namwe si khwalyakho biilyo by'omuundu yeesi busa nga akhusasula ta. Ne shiilo ni kumuusi khwaraambatsaka luundi khwakhalabana, nga si khukana khwasitowelela umuundu yeesi khwiinywe ta.

⁹Si khwakhola shino ndi lwekhuuba si khwakana buyeeti buno ta, ne ndi khwashikhola lwe khuukana khuuba she khubonelakho shilayi isi muli, nio nanywe mulondelele ikhola yeefwe.

¹⁰Lwekhuuba, ikhaba nga ni khwaba ni nanywe, khwaabalomatsakila khuri, “Noola umuundu yeesi s'akana khuuraamba ta, ni khuulya, s'akha khuulya ta.”

¹¹Shino khushiloma lwekhuuba khuwulila bari, baliyo babaandu babaandi khus'inywe babakyeendaana busa, babeyukaasa busa ne nga mbaawo sheesi bakhola ta, ne njeeba khutaambisa busa bashaawe.

¹²Ne babaandu babafwaana baryo, ifwe khubakaambila naluundi khubareewura mu lisiina ly'Omukasya weefwe Yesu Kristo khuri, bekhale aasi bakhole kimilimo kyaabwe mu mbola busa, banyoole bye khuulya byaabwe babeene.

¹³Ne inywe be buulebe, mukhakamisa khukhola bibiindu bilayi ta.

¹⁴Ne noola umuundu yeesi ekaana khuwulilisa bilomo bino byeesi khuloma mu baluwa yino, ni mumwofwase bulayi, mulekhe khuraambakana ni naye ta, nio akile awaambisiwe kamaŋaanyu.

¹⁵Ne mukhamuyila nga umusiku ta, ne ni mumukaambile nga uwe buulebe.

¹⁶Ni naari, Umukasya uwe Lukoosi umweene abawe lukoosi imbuka yoosi, ni musaambo tsoosi.

¹⁷Ni nase Paulo, naaronile khuusheesa khuno ni kumukhono kwase kumweene, nga nikho khabonelo kha buraawa mu baluwa tsase tsoosi. Ni khuurona khwase nikhwo khuno.

¹⁸Bubweela bw'Omukasya weefwe Yesu Kristo, bubatsake ni nanywe mweesi.