Read lumasaaba 1 Timosewo 1 Bible Online

1 Timosewo 1 - lumasaaba bible

1 Timosewo 1

¹Buurume buno bwaama isi ise Paulo. Wele umuwonesi weefwe atweela ni Kristo Yesu, nibo babaandakila ise khuuba umurume uwa Yesu Kristo. Yesu Kristo yuno niye isi ifwe khwiyikina.

²Imburonela iwe Timosewo, uuli umwaana uwase umweene khulwe khufukiilila mu Wele. Inoomba ndi khali Wele Paapa weefwe ni Yesu Kristo Umukasya weefwe, bakhuwaambiile shiisa luundi bakhuwa tsikhabi. Khali bakhuweele ikhabi iye khuuba ni lukoosi.

³Nga ni nakhulomela nga ndi khuutsya i Masedoniya, n'urame i Efeso nio unyalise khuureesa babaandu balala, balekhe khuleekela ni khuusalanisa bilomo bibiili bye bubeeyi ta.

⁴N'ubareewule baakamise khuumala busa imbuka yaabwe nga bakanikha bye tsingano bibikhalimo itsamu, ni bye kiminyele kikikhakaama ta, kye bakuuka baabwe. Bibiindu bino bireera busa khukhaandisana khwonyene. Sibiyeeta umuundu yeesi khuukhola kimilimo kya Wele ta, khulwekhuuba khukhola kimilimo kya Wele shikoomba umuundu waba ni khufukiilila.

⁵Shitsilililwa shili ndi babaandu baakha babe ni khuukana khwa ŋali khukhwamila ilala khu mwoyo, ni khukhwaambaasa khulayi, ni khufukiilila khwa ŋali.

⁶Iliwo babaandu batweela babaamala khuurura khu biindu bino, batsya behaambila mu biindu bibimala busa imbuka.

⁷Bekoomba bari babe baleekeli be Kamakaambila ka Musa, ne nga sibamanya byeesi bakanikha, namwe bibiindu byeesi basontsoola ta.

⁸Ifwe khwaamanya khuri kamakaambila kamalayi, nga umuundu yeesi waakaraambisile musaambo ikanibwa.

⁹Naluundi khwaashimanya khuri kamakaambila sikaarebwawo khulwe babaandu bakwalaafu ta; ne khulwe bakhali bakwalaafu ta, ni banabumiinyi, babebirisa buubi, babonaki, babaakharya Wele ta, ni n'abo babeera ba paapa baabwe ni bamaayi baabwe, ni babeera babaandu babaandi.

¹⁰Naluundi kamakaambila kaarewawo khulw'abo babebirisa buubi, nga basaani babaashuukhila basaani bashaabwe, ni bakhasi babaashuukhila bakhasi bashaabwe, babaandu babaakumila bashaabwe ni babakulisa nga baakulwa, babeeyi, babetsubaka busa mu biikhalimo ta, ni naabo babaakhola bibiindu bibibonekha nga bikhaandisa khuleekela khwa ŋali.

¹¹Khuuleekela khuno khunyoolekhana mu Makhuwa Kamalayi keesi Wele uwe angaaki luundi uruuyibwa amaambisa ise khukuukuula.

¹²Ise isiima Umukasya weefwe Kristo Yesu, uwaamba ise kamaani khukhola kumulimo kuno. Imusiima lwekhuuba mu khukhalawo khweewe, niye aambona nga ise ndi umwiyikinwa.

¹³Ikhaba nga amataayi ise namufwootsolatsaka, namukubyeenga, naluundi nga imulekelesa; ne amaambila ise shiisa, lwekhuuba byeesi nakhola ibyo, nabikholela mu khulekha khumanya ta, naluundi abe s'indi ni khuumufukiililamo ta.

¹⁴Ne Umukasya weefwe aantsukhakho bubweela mu bwitsufu, nga abirira mu khufukiilila ni khuukana bibibonekhela mu Kristo Yesu.

¹⁵Ni ilomo yino ili iya ŋali naluundi buli mutweela aakha khuukifukiilila, iloma iri: Kristo Yesu eetsa mu shiibala khuuwonesa baboonaki. Ni mu beene abo, ise niye ufuura bubwoonaki.

¹⁶Ni khulwe lomo yino, Wele amaambila ise shiisa, ise ufuurira ilala bubwoonaki, ari nio manya Yesu Kristo okesanise shiisa sheewe shikali she angaaki. Shino shikile ise imbe nga she khubonelakho isi abo boosi lwanyuma babaalimufukiililamo naluundi babaalifuna buulamu bubukhawawo ta.

¹⁷Shiriifwa ni lukoosi bibe isi Umuyiinga uliwo kimiboolo ni kimiboolo, uyo ukhanyala wafwa ta, naluundi ukhabonekha ta, uyo yenyene uli Wele, biilo ni biilo. Amiina.

¹⁸Mwaana wase Timosewo, bufunisi buno indikho imbukhuwaambisa iwe. Butsiila atweela ni bilomo byeesi baŋoosi baaloma, nga bikhuwaamba khus'iwe. N'uraambise bilomo ibyo bibe nga bye busoolo mu khuraamba kumulimo kwoowo bulayi.

¹⁹N'uwandalalile mu khufukiilila naluundi ni khukhwikaambila khuulayi. Babaandu babaandi babaakharekeeresa byeesi kimyoyo kyaabwe kibakaambila ta, baayoonaka khuufukiilisa khwaabwe mu Wele.

²⁰Nga mu beene abo mulimo Himenewo ni Alekizanda. Babeene abo nabawaanayo mu mikhono kya Sitaani nga shitaambiso isi bali, nio beyiike khuulekha khukhomyaasa Wele ta.