Read lumasaaba 1 Timosewo 3 Bible Online

1 Timosewo 3 - lumasaaba bible

1 Timosewo 3

¹Shaŋali shili shiri: “Umuundu yeesi n'akana khuuba nabwaayi mu mulimo kwa Wele, aba waakanile kumulimo kwe angaaki.”

²Nashiryo nabwaayi akhila khuuba uyo ukhalikho ni she khuumubiiyisa mu bulamu bweewe ta. Aakha khuuba nga waayila umukyelema mutweela, uwitsililisa naluundi umuundu uwe kamakhula, uuli ni tsisaambo tsindayi, uuli ni bubweela, naluundi umuleekeli umulayi.

³Akhiile khuuba umuundu ukhali umumeesi ta, luundi umuwolu ukhali uwe bituluungu ta, ukhalomana buli khaseela ta, naluundi ukhali umulyaanga mu mapeesa ta.

⁴Ali ni khuuba umuundu unyala khuulolelela be muungo mweewe bulayi, ni khuutsoyisa babaana beewe musaambo tsindayi nga bamuwulila mu buli saambo.

⁵Lwekhuuba, umuundu yeesi n'aba nga s'anyala khuulolelela be muungo mweewe bulayi ta, anyala aryeena walolelela lituuli lye babaandu babafukiilila mu Wele?

⁶Akhila khuuba umuundu uwahangala mu khufukiilila mu Wele, akhuba umuundu uwekyelile umufukiilisi mu Wele aambi ari ta! N'aba nga ashiili khuwaangala mu khufukiilila mu Wele ta, lukana anyala weniinisa angaaki khulwe khukhwibona, waakila baamukhalila kumusaango nga ni baakhalila Sitaani.

⁷Umuundu uyo aakha khuuba umuundu isi ni nabo babaakhali babaafukiilila mu Wele ta, beesamo lukoosi, nio akile alekhe khukwa mu khukhonjelesebwa ni mumureko kwa Sitaani ta.

⁸Badiikoni nga bali nibo babaandu babaayeetakho mu masaayilo, baakha khuuba ni tsisaambo tsindayi, naluundi nga babeyikinwa. Bali ni khuuba babaakhali bameesi ta, bakhali be kumuluungo khu mapeesa ta.

⁹Baakha khuuba nga bali babaandu babaloondelela bye kamakaanga bye khufukiilila, mu mwoyo kumulayi.

¹⁰Ne babaandu bano shaakha banyoowe khuubatsema, babone nga sibalikho ni likoondo ta, nio babafukiilise khukhwakaanisa nga badiikoni.

¹¹Ni bakyelema baabwe nabo baakha khuuba baryo, nga bali be tsisaambo tsindayi, si balekelesa ta, nga bali ni khukhwikhalilikha, naluundi be bubweela mu buli shitweela.

¹²Umudiikoni aakha khuuba umuundu uuli n'umukhasi mutweela, naluundi nga ali umuundu unyala khuulolelela ango ewe ni babaana beewe bulayi.

¹³Lwekhuuba abo babakaanisa nga badiikoni benyoolela babeene lisuno, naluundi baba bali ni khukhwiyikina mu khufukiilila mu Kristo Yesu.

¹⁴Ikhaba nga ndi khuukhuronela iwe bibiindu bino, ne nambaasa khukhwiitsa khaangu isi iwe uli khuukhubonakho.

¹⁵Ne abe nakhaba nga sineetsile khaangu ta, buurone buno kane bukhwokesanise nga buli mutweela uufukiilila mu Wele, n'akhiile khukhwibirisa. Babaandu babaafukiilila mu Wele bano nibo lisaayilo lya Wele, nga nibo intseko ili shisiindi sha ŋali.

¹⁶Imbaawo umuundu yeesi unyala wakhaandisa nga aloma ari shimoonyo she khufukiilila khweefwe sishili sha ŋali ta, lwekhuuba: “Yesu ekyela umuundu aryo waabonekha nga umuundu, Umwoyo Umukhosefu okesana nga niye n'ali umukhosefu, naluundi bamalayika bamubona. Babaandu bakali baatsya isi kamanaambo bakuukuula bibimuwaambakho. Shiibala shoosi shamufukiilisamo naluundi waniinisibwa mu ngaaki, mu shiriifwa.”