Read lumasaaba 1 Timosewo 4 Bible Online

1 Timosewo 4 - lumasaaba bible

1 Timosewo 4

¹Umwoyo Umukhosefu alomela ilala bulayi bubweene ari, bifukhu bibiitsa mu moni babaandu balilekha khuufukiilila mu Wele ta, baloondelele indeekela iye bubeeyi ni khuuleekela khukhwaama isi Kimisaambwa.

²Khuuleekela khukhufwaana nga khuno khuli khuusalanisibwa ni babaandu be bubeeyi, babaakhali n'intsambaasa indayi ta.

³Babaandu bano baleekela bari bukhwaale bukhabawo ta, naluundi bari babaandu bakhalya bibiindu bilala byeesi Wele aabuumba ta. Ate nga Wele aabuumba bibiliibwa bino ari abo babaali ni khuufukiilila naluundi babaamanyile bya ŋali, banyala baabilya nga baamalile khuuloomba.

⁴Khulwekhuuba buli shishiindu shoosi sheesi Wele aabuumba shili shilayi, nashiryo imbaawo shoosi sheesi umuundu aakha khuuloba ta, ni shiba nga umuundu uyo washakaaniile ni khuuloomba.

⁵Lwekhuuba Ilomo ya Wele ni khuuloomba khweesi umuundu awaanayo bikila shishiindu isho shekela shikhosefu, Wele waashakaanila.

⁶Ne n'ukane uwaambe khuleekela khwase khuno ukhwakaaniseyo isi babafukiilila mu Wele boosi, kane wokesanile uri uli umwakaanisi umulayi uwa Kristo Yesu. Kane ube nga wamweene ulikho utsowatsowana mu bilomo bye khufukiilila mu Wele naluundi mu khuleekela khulayi khweesi iwe umenyamo.

⁷Ne ukhehaambila mu bye tsingano tsye busilu tsitsikhalimo khuurya Wele ta. Ni winase khuukhola buulayi.

⁸Akhaba nga shili shilayi kumubili kwoowo khuumanyiilila khuukhola bye kiminyawo, ne khuukhola bye khuurya Wele shili she lisuno khuuminyisawo, khulwekhuuba mulimo khukhwiyikina khwe buulamu bwe aluno ari, ni buulamu bubuuli khuutsya khukhwiitsa mu moni.

⁹Shilomo shino shili sha ŋali, buli mutweela aakha ashakaanile naluundi ashifuukilile mu bwitsufu.

¹⁰Shino nisho shishiikila khwaakhalabana naluundi khwaatitiikhana, lwekhuuba khukhwiyikina khweefwe khwoosi khuli mu Wele, nga niye umuwonesi uwe babaandu boosi, ne khuuminyisa abo babaamufukiilisamo.

¹¹N'ubaleekele, naluundi ubawe khuuleekela khwase khuno.

¹²Umuundu yeesi akhakhulekelesa khulwekhuuba bari ushiili umwaana ta. Ne akhali mu nganikha yoowo, mu ntsibirisa yoowo, mu khukana khwoowo, mu khufukiilila khwoowo, ni mu khwiliinda khwoowo uri nio ube umukhosefu, n'ube she khubonelakho isi babaandu boosi.

¹³N'ure kamaani koowo mu khusoma Ilomo ya Wele, ni mu khuboolela Ilomo ya Wele, ni khuuleekela babaandu babaandi, khukhwoolisa ise samweene n'indiitsa.

¹⁴Ne ukhakayaalila shiwaanwa sheesi wafuna ta; shiwaanwa isho sheesi wafuna khuubirira mu buŋoosi bubwalomekha nga lituuli lye basakhulu ni lyakhurakho iwe kamakhono lyaakhuloombela.

¹⁵Nyikhila khuukhola bibiindu bino, nga wihaanilayo ilala khulwe bibyeene ibyo, nio buli mutweela abone nga ulikho utsowatsowana.

¹⁶Ni witsiililise buulamu bwoowo, naluundi ni wimenielese khuuleekela khwoowo nga ni khuli. Andalalila khu byeene ibyo, khulwekhuuba n'ukhola uryo kane uwonese buulamu bwoowo, ni bwaabo babaaba bakhurekeeresa iwe.