Read lumasaaba 1 Timosewo 5 Bible Online

1 Timosewo 5 - lumasaaba bible

1 Timosewo 5

¹Ukharafwiila umuundu ukhuminyisakho iwe bukhulu ta, ne akhali mukanikheyo nga ni wandikanikhile isi paapa woowo. Babaashiili bahele boosi babirise busa nga babandaayo.

²Bekhasi bakhulu babirise nga bamaayi boowo, ni be khaana ubabirise nga bakooko boowo. Khola bino byoosi khulwe khukhwiliinda mu bukhosefu.

³Banamulekhwa babaamenya nga banamulekhwa babeene n'ubawatsake lukoosi.

⁴Noola namulekhwa ali ni babaana namwe babetsukhulu, bali ni khuunyoowa beyike ibyo byeesi Wele akana bakholele be muungo mwaabwe. Musaambo iyo, babe nga babaaliyila basaali baabwe; khulwekhuuba shino nisho shishikhoyesa Umukasya.

⁵Ne namulekhwa umenya, nga s'alikho n'umuundu umuloleleelela ta, uyo aba waayiyikina Wele naluundi ali ni khukhwiloosela khuuloomba ni khukhwikontselela Wele, kumuusi ni mu shilo.

⁶Namulekhwa ukyendaanaka busa nga aweentsa bye shiibala, akhaba nga ali umulamu, ne ali busa nga umufu.

⁷Leekela banamulekhwa bilakilo bino, nio balekhe khunyoolekhana nga balikho ni she khubabiiyisa mu bulamu bwaabwe ta.

⁸Noola iliwo umuundu yeesi ukhayeeta balebe beewe ta, ni khufuurira ilala be mu ntsu yeewe babeene, ali busa nga ukhafukiilila mu Wele ta. Umweene uyo aba umubi ni khufuurakho uyo ukhafukiilila mu Wele ta.

⁹Uyo yeesi uwafwiisa umuseetsa, ne nga s'olisa kimiiko kye bukhulu kamakhumi kasesaba ta, mukhamubala nga namulekhwa ta. Naluundi ali ni khuuba nga akhwaalikha khu museetsa mutweela yenyene.

¹⁰Ali ni khuuba nga babaandu bamukanikhakho buulayi khulwe bikholwa byeewe bilayi; uyo uwatsowesa babaana beewe buulayi, uwe bubweela, uwayeeta bakhosefu basheewe, uwatimiililatsaka abo babaali mu mitaambo, naluundi ali ni khuuba nga uyo uwewaanatsakayo khuukhola bibiindu bilayi mu buli isaambo.

¹¹Ne abo babaashiili baahele ukhabara khu luruungo lwe banamulekhwa ta; lwekhuuba ni bekoomba nga bakana khukhwaalikha, shino sibakhweesa shaabarusa khu Kristo.

¹²Nashiryo shino shikila bafuniaaka khuufukiilila khwaabwe abe khweesi baanyoowa khuulomela Kristo amataayi.

¹³Sishili isho shonyene ta, ne naluundi beyika khuumoola busa nga mbaawo sheesi bakhola ta, nga batangatanga kimilyango, ni khulooselakho khwisho bekyele be luleleembe nga be bubeeyi, nga bakanikha bibiindu bibikhalimo ta.

¹⁴Nashiryo ise imbona ndi khali ba namulekhwa babaashiili baahele bafunile baseetsa, basaala babaana, baba nga benaanayo khu be mu ntsu baabwe, nio balekhe khuba n'imbuka iye khukhwihaambila mu biindu bibiikhalimo ta.

¹⁵Khulwekhuuba banamulekhwa baalala baamala khaale khuuborokha khukhwaama mu diini, baatsya khulondelela Sitaani.

¹⁶Ne noola iliyo umuundu ufukiilila mu Wele uli ni banamulekhwa muungo mweewe, niye naabe ubaloleelela; akhawaamba busiro buno wabusindikhila be lisaayilo ta, nio shibanyalise nibo khulolelela abo babaakhali n'ubayeeta ta.

¹⁷Basakhulu babaali baraangilisi balayi mwakha khubambaasakho nga abo babaakhila khufuna kimikabo kibili, ni khufuurisila ilala abo babatitiikhana nga baleekela naluundi nga bakuukuula Kamakhuuwa Kamalayi.

¹⁸Khulwekhuuba bibyaronebwa bikhosefu biloma biri: “Nga ulikho uraambisa iyeeyi khuusuta buulo, ukhakibowa imunwa kumukosi ta.” Naluundi ndi, “Umuraambi akhila khuuweebwa kumukheemba kweewe.”

¹⁹Ne umuundu umukhulu ukhamala khumukhalakila busa kumusaango uryo ta, akhali nga wemikhile khu bujulisi bwe babaandu babili namwe ta bataru.

²⁰Abo babatsiililila mu khukhola bibyoonako, n'ubekiitsile mu moni tsye babaandu boosi, nio akile babaramile barye.

²¹Ise ikhukhupilisa iwe mu moni tsa Wele, ni tsa Kristo Yesu, ni tse bamalayika babaali barobole ndi, londelelatsaka khuleekela khuno mu bwitsufu, akhali khukhwokesana ikirombooli ta.

²²Yitsililisa naabi mu khuura kamakhono koowo khu muundu utsya khuraamba nga umwakaanisi uwa Wele; namwe ukhewaambila atweela ni babaandu babaandi nga bali khukhola bibyoonako ta, iwe yiliinda nga s'ulikho lisaanda ta.

²³Ukheloosela khuunywatsaka kameetsi konyene ta, ne n'unywatsakekho iviini ifwiiti iri nio ikhuyeete mu byeesi uliile, khulwekhuuba ulwalilila.

²⁴Bibyoonako bye babaandu batweela bibonekhela abulafu, nga byokesana biri kumusaango kukhabafuure. Ne bibyoonako bye babaandi bibonekha lwanyuma lwayo.

²⁵Ni musaambo niyo ndweela bikholwa bilayi nabyo bibonekhela abulafu busa; ne abe akhaba byakhalekha khubonekhela abulafu, imbaawo unyala khubibisa ta.