Read lumasaaba 1 Timosewo 6 Bible Online

1 Timosewo 6 - lumasaaba bible

1 Timosewo 6

¹Khayo abo boosi babaali mu bukulwa, bayile bakoosi baabwe nga babaandu babaali ni khukhwisibwamo shiriifwa mu bwitsufu, nio alekhe khubawo ulekelesa lisiina lya Wele ta, ni khuleekela khweefwe ta.

²Ni n'abo boosi babaali ni bakoosi baabwe babafukiilila mu Wele, balekhe khubaleekelesa ndi khulwekhuuba bali babaafukiilila mu Wele ta; ne ndi bali ni khukhwakaanisa ni khuminyisakho awo, khulwekhuuba bubwakaanisi bwaabwe balikho babukhola isi ibo babaali bafukiilisi naluundi bali bakanwa. Uli ni khuleekela naluundi ukhupilise khu biindu bino.

³Ne umuundu yeesi n'aleekela bibiindu bibikhali bya ngali ta, nga s'afukiilisana ni bilomo bye tsamu by'Omukasya weefwe Yesu Kristo ta, ni indeekela iye khuurya Wele ta,

⁴umuundu uyo aba waayitsula bubeeyi ni khukhwiniinisa, ate nga mbaawo sheesi amanyile ta. Aba ali umuundu ukana naabi bye khukhaandisana ni bye khuulomana bibiwaamba khu saambo isi babaandu bakanikhamo bilomo, bibiireera liibuba, tsikhaando, khukhomyaasa, ni khukhwaambaasilisila buubi khu baandi.

⁵Naluundi aba akana naabi khukhaandisana ni babaandu babaakhambaasa bulaayi ta, nga sibali ni bye bwa ŋali ta. Bambaasa bari idiini ili ni khubareerera buyiindifu.

⁶Ni abweene awo idiini ikhola umuundu khuuba umuyindifu, ne khuuba umusangaafu uri byeesi uli ni nabyo bikhumala, ubwo nibwo buyiindifu bwa ŋali.

⁷Khulwekhuuba mbaawo sheesi ifwe khwareera khu shiibala ta, naluundi imbaawo sheesi ifwe khunyala khurusawo khu shiibala ta.

⁸Nashiryo noola khuli ni biilyo ni bikwaaro, ibyo ifwe bikhumala.

⁹Ne ibo babekoomba khuuba bayindifu bakwa mu khutsemebwa, ni mu mureko, kwe khukhwikoomba khukali naluundi khwe busilu. Khukhwikoomba khuno khuli khuubi naluundi khwonakisa babaandu nga khubahesa.

¹⁰Khulwekhuuba khukana kamapeesa nisho isebele iya buli isaambo iye shiibi yoosi. Babaandu babaandi khulwe khukhabilila buyiindifu, indi shamilakho bakoraana, barura mu khufukiilila, benyoola nga kimyoyo kyaabwe kyatiimisiwile ni kumutaambo kumukali.

¹¹Ne ari iwe, wubeele umuundu uwa Wele, ni wisisakule ibyo byoosi. Iwe n'uraambirire bukwalaafu, khuurya Wele, khuufukiilila, khuukana, khukhwikhalilikha ni buwolu.

¹²N'usoolane khuusoolana khuulayi khwe khuufukiilila, nio akile ufune buulamu bubukhawawo ta; khulwekhuuba ni weema mu moni tse babaandu bakali wabuula uri ufukiilila mu Wele, bulamu ubwo nibwo bweesi Wele akhulaangila.

¹³Ikhukaambila mu moni tsa Wele uuwa bibiindu byoosi buulamu, ni mu moni tsa Kristo Yesu, uweema mu moni tsa Pontiyo Pilato, waawayo bujulisi bwe khubuula khuulayi ukhwo,

¹⁴indi n'ulondelelatsake likaambila lino nga s'ulifuniaakakho ta, naluundi nga s'ulikho ni likoondo mu bulamu bwoowo ta, khukhwoolisa khukobola khw'Omukasya weefwe, Yesu Kristo.

¹⁵Khuubonekha khweewe khulibawo mu mbuka inyene iyamanyikha isi Wele, uli ubuyilisibwa naluundi Umuwuli, Umuyiinga uwe bayiinga naluundi Umukasya uwe bakasya.

¹⁶Wele uyo niye ukhalifwa ta; umenya mu buwaanga bweesi umuundu akhanyala wesyeenda ambi ta, imbaawo umuundu yeesi uwabubonakho namwe unyala wabubonakho ta. Bunyala ni shiriifwa bibikhawawo ta, bibe isi umweene uyo. Amiina.

¹⁷Isi abo babaali ni bye buyiindifu bwe bibiindu bye mu shiibala muno, bakaambile balekhe khukhwiniinisa angaaki ta, namwe balekhe khura bubwiyikinwa bwaabwe mu buyiindifu bwe khaseela busa ta. Ne ni bare khukhwiyikina khwaabwe mu Wele, ukhuwa ifwe bibiindu byoosi byeesi khwikanilamo, khulwe bubweela bweewe.

¹⁸Bakaambile babe babaandu balayi, bokesanise buyiindifu bwaabwe mu khukhola bibiindu bilayi, nga bali babaakharomboosa mu baandu ta naluundi nga bali ni bubweela.

¹⁹Nio mu saambo yino babe nga bebiikhila babeene buyiindifu bubuliba kumusiinji kumweene mu bulamu bubwiitsa mu moni, nga nibwo bulamu bwa ŋali.

²⁰Timosewo, n'uliinde buulayi ibyo byeesi wawaambisibwa. Ukhewaambila mu nganikha tsitsikhalimo khuurya Wele ta, ni khukhaandisana mu bikhalimo ta, ibyo byeesi balaanga bari bili bye kamakyesi, ne nga sibilimo kamakyesi ta.

²¹Khulwekhuuba iliwo babaaloma bari bali ni kamakyesi ke saambo iyo, ni shishamamo ndi bakoraana khukhwaama khu mukhoosi kwe khufukiilila. Bubweela bwa Wele bube ni nawe.