Read lumasaaba 2 Timosewo 1 Bible Online

2 Timosewo 1 - lumasaaba bible

2 Timosewo 1

¹Ibaluwa yino yaama isi ise Paulo, uuli umurume uwa Kristo Yesu, khulwe khuukana khwa Wele. Ise narumanibwa khukuukuula bibiwaamba khu bulamu bweesi Wele akhulomela ifwe, bweesi khukabananila atweela ni Kristo Yesu.

²Ingironela Timosewo, uuli nga umwaana wase umukanwa. Khali Wele Paapa, ni Kristo Yesu Umukasya weefwe, bakhuweele iwe tsikhabi, shiisa ni lukoosi.

³Ise isiima Wele isi nisaaya ni kumwooyo kukukhalimo khukhwikanakana ta, nga bakuuka baase ni baakhola khaale. Buli lwaweele, kumuusi ni shiilo nga n'imbaloombela inywe, imba ndikho isiima Wele.

⁴Ise ishebulila kamasika koowo keesi iwe walila. Shiilo ni kumuusi nikoomba naabi khukhubonakho, nio nase nitsule kumwikhoyo.

⁵Ishebulila khufukiilila khwa ŋali kweesi uli ni nakhwo khukhuukhalimo khukhwikanakana khwoosi ta, khukhuuli nga khweesi kuukhu woowo Loyisi aaba ni nakhwo, ni khweesi maayi woowo Yunisi naye aaba nakhwo. Aluno ari, ise ishihandalasa ndi khufukiilila ukhwo khuli mus'iiwe.

⁶Nashiryo ari ikhushebusa ndi wikyeleese shiwaanwa sha Wele sheesi wafuna nga ise ni nakhurakho kamakhono kaase.

⁷Khulwekhuuba Wele s'akhuwa ifwe Umwoyo ukhureerera khuurya ta; akhali ndi Umwoyo weewe akhwitsusa ifwe ni kamaani, khukana ni khubona khuri buli mutweela awula buulamu bweewe.

⁸Nashiryo ukhaba ni khuurya mu khukanikha khu biwaamba khu Mukasya ta. Namwe ukhaba ni kamaŋaanyu khukanikha khus'ise, uli umubowe khulwa Kristo ta. Mu shifwo she khuurya, nawe kabananila atweela mu khutaambisibwa khulwe Kamakhuuwa Kamalayi, nga Wele n'aba wakhuwele kamaani khushikhola.

⁹Wele niye uwakhuwonesa ifwe naluundi wakhulaanga ari khube babaandu bakhosefu. Akhuba ndi khulwe buraambi bulayi bweesi khwakhola shonyene ta, ne ni khulwe buulayi bwe shitsiilililwa sheewe ni bubweela bweewe umweene, byeesi akhuwa ifwe khuubirira mu Kristo Yesu khukhwaama biilo ni biilo.

¹⁰Ne aluno ari, Wele wakhwokesanile ifwe bibiindu bino khuubirira mu khwiitsa khw'Omuwonesi weefwe, Kristo Yesu. Umweene uyo niye uwarusawo kamaani ke khufwa naluundi khuubirira mu Makhuwa Kamalayi warumbula buwaanga bwe buulamu bubukhawawo ta.

¹¹Ni khulwe Kamakhuuwa Kamalayi kano, Wele waayindobora ise khuuba ukakuukuula naluundi umurume, ate naluundi umuleekeli wako.

¹²Ise indaambisibwa khulwe'lomo nyene yino. Ne ise seshimaambisa kamaŋaanyu ta, khulwekhuuba ise namanya uyo isi nafukiililamo, ni nase imandalasila ilala luundi siniririkana ta, ndi anyala khukhuniinda ise ni neesho sheesi aambiikhila khukhwoolesa khu shifukhu isho.

¹³Loondelela kumukhoosi kwe bilomo bye'tsamu byeesi wawulila khukhwaama khus'ise, uwandalalile mu khufukiilila ni mu khukana khukhuuli khukhweefwe atweela ni Kristo Yesu.

¹⁴Khuubirira mu maani k'Omwoyo Umukhosefu umenya mus'iifwe, liinda bya ŋali bibyareebwa mu makhono koowo.

¹⁵Waashimanya buulayi nga boosi be mu shisiintsa she Asiya, ise ni baandurakho, nga nimwo mumuuli Fikelusi ni Helemokene.

¹⁶Khali Umukasya awaambiile be mu ntsu iya Onesiforasi shiisa, khulwekhuuba imbuka ingali abe antsisamo kamaani. Si shamuwaambisa niye kamaŋaanyu khubona ari ise ndi umubowe mu minyololo ta,

¹⁷khurusakho ndi khukhwaama lweesi olela mu Roma, akhakakho naabi wameentsa khukhwoolisa n'anyoola.

¹⁸Khali Umukasya amuwaambile shiisa khu shifukhu isho shimaliilisi. Ni nawe wamweene wamanya bulayi bilayi byeesi akholela ise nga ndi mu Efeso.