Read lumasaaba 2 Timosewo 2 Bible Online

2 Timosewo 2 - lumasaaba bible

2 Timosewo 2

¹Ni nashiryo ari iwe, mwaana wase, n'unyindalile mu bweela bubuuli mu Kristo Yesu.

²Ne ibyo byeesi wawulila khukhwaama khus'ise nga imbileekela, nawe bileekele babaandu babelama, babanyala nabo khubileekela babaandi.

³Nawe ni wihaambile mu khutaambisibwa nga umusilikhale umwiyikinwa uwa Kristo Yesu.

⁴Umusilikhale yeesi n'aba mu maye, s'eyingisa mu bulamu bwe biindu bye babaandu ba busheele ta; khulwekhuuba niye atsiililila khukhola bulayi kumulimo kwooyo uwamuyila mu maye.

⁵Imbaawo umuundu uli mu masindano ke tsindimo unyala khufuna shiwaanwa ta, akhali nga walondelele kamakaambila ke kiminyawo.

⁶Umulimi uraamba ni kamaani niye uli ni khukabana khu byaamo bibinyoowa bye likyesa.

⁷Yambaasa khu biindu byeesi ise indikho inoma, khulwekhuuba Umukasya kane akhunyalise iwe khubimanya byoosi.

⁸Shebulila Yesu Kristo, uwalamukha khukhwaama mu bafu, naluundi uwaba uwe mu shikuuka sha Dawudi, nga ni bamukanikhakho mu Makhuwa Kamalayi keesi ise indeekela.

⁹Ise indaambisibwa naluundi ndi mu bubowe nga umufuniaki we kamakaambila, khulwe ilomo iye Kamakhuuwa Kamalayi. Ne ise naakhaba umubowe, Ilomo ya Wele shiili mu bubowe ta.

¹⁰Ni nashiryo ise ninyindaalila buli shitweela khulwe babaandu ba Wele babaali barobole, ndi nio nabo banyoole buwonesi bubwama mu Kristo Yesu, bubureera shiriifwa shikhawawo ta.

¹¹Shilomo sha ŋali shili shiri: “Noola ifwe khwafwila atweela ni Kristo, nafwe khulimenya ni naye;

¹²ni khuba khweloseele khuunyindaalila, nafwe khuliba babaawulila atweela ni naye. Ni khumwikaana niye, ni naye akhakhwikaane ifwe.

¹³Ikhaba nga ifwe sikhuli babeyikinwa ta, niye arama nga ali umwiyikinwa. Khulwekhuuba niye s'anyala khukhwiyikaana niye umweene ta.”

¹⁴Babaandu boowo n'ubashebusaatsake bino, naluundi ubakhonyakilile mu bulayi mu moni tsya Wele, uri balekhe khusoolana khulwe tsintsawukhana mu byeesi bilomo bimanyisa ta. Khukhaandisana khuno imbaawo shilayi sheesi khureera ta, akhali ndi khwonakisa busa abo babarekeeresa.

¹⁵Khakakho khubona uri uli umuundu umulayi mu moni tsya Wele, umuraambi umulayi ukhawaambibwa kamaŋaanyu khu lwe buraambi bweewe ta, umuraambi uleekela buulayi buurume bwa ŋali bwa Wele.

¹⁶Ukhehaambila mu nganikha tsitsitaambamo khuurya Wele ta. Tsino tsireerera busa babaandu khukhwiloosela khukhwawukhana khukhwaama khu Wele.

¹⁷Tsinganikha tsifwaanana nga itsyo tsili busa nga likoontsyo lilikhawona ta, ne lililoosela busa khubalaaha. Himenewo ni Fileto nibo bali baandu batweela khu behaambila mu biindu nga ibyo.

¹⁸Bano baamala khaale khurura khu mukhoosi kwe bya ŋali, nga baleekela bari khulamukha khukhwaama mu bafu khwaamala khaale khuubawo. Bakosaasakosaasa khuufukiilila khwe babaandu balala.

¹⁹Ne kumusiinji kumuwaangafu kweesi Wele asimikha imbaawo unyala khuukutengaasa ta; nga kulikho buurone bubuuloma buri “Umukasya umweene waamanya abo babaali babeewe.” Naluundi buri, “Buli umuundu yeesi uloma ari ali w'Omukasya, ali ni khuulekha kumukhoosi kwe bubwoonaki.”

²⁰Muntsu ili imboofu munyolikhanamo tsisowaani ni bipwakhuli bya buli isaambo: bilala babikhola mu feeza, ni bibiindi mu zaabu, bilala bibuumbe khukhwaama mu liloba; bilala bye kimikholo kya buraawa bibiindi bye khuraambisa buli busheele.

²¹Umuundu yeesi n'epyeluusa khukhwaama khu byoonako, aba kane araambisibwe mu buraambi bwa buraawa, khulwekhuuba aba umukhosefu naluundi aba ali uwe kumukaso isi Umukasya. Aba ali mwirekefu khukhola buraambi bulayi bwoosi.

²²Nashiryo ukhehaambila mu biindu bye lusooleli bibikhongelesa ta, ne akhali rabira naabi mu bye bukhosefu, nga ubirira mu khufukiilila, ube uwe khukana, ni lukoosi, nga witubaasa atweela ni naabo babaali ni kimyoyo kimilayi, nga beyikina Umukasya.

²³Ne ukhehaambila mu khukhaandisana khwe busilu khukhukhalimo kamakyesi ta, khulwekhuuba nga iwe n'umanyile tsikhaando tsino tsireera busa khulomana.

²⁴Nga n'uli umwakaanisi w'Omukasya, siwakhiile khuuba umuundu ulomana ta. Uli ni khuuba uwe shiisa isi babaandu boosi, umuleekeli umulayi naluundi uwikhalilikha.

²⁵Abo babaakhukhaandisa iwe, uli ni khubakwalaasa ni kumwoyo kumulayi, manya lukana Wele wabayeeta wabawa ikhabi iye khukhwibiiyisa bibyoonako byaabwe manya boola khu khumanya bya ŋali.

²⁶Shino shinyala khubayeeta belamo khu makyesi babimbukha tsimoni nio akile belukhe khukhwaama mu mureko kwa Sitaani, abe uwabawaamba baaba nga bakhola byeesi niye akana.